عدت يومين وامي بقت كويسه حتى خالتي مشت مننا وابوي ولا خبر ولا أثر محل مشى دا بعرفو براهو بس كان مخلي قروش كتيرة في دولابو، شيماء نهائي ما قصرت معانا وكانت مهتمة بينا شديد وبالذات أمي وفي اليومين ديل بقيت طبيعي بلقاهم قاعدين يتونسو وبضحوكو وضاربين الهم بالفرح وفي الحقيقة ارتحنا شديد في الفترة دي وبالذات هاجرىبقت تجينا من الصباح وترجع المساء...
قلت بعد الأوضاع هدت كدا أشوف لو ممكن اسجل مع ناس نضال لانو دي افضل فرصة لي منها ح اقدر اوفر مصاريفنا ومنها اكون اكتسبت خبرات جديدة في حياتي، وريت امي الفي البداية سكتت وما قالت شي بس تاني قالت لي مكان الكورس ما يكون بعيد بس!، فرحت شديد وقلت ليها لالا م حيكون بعيد وقلت في نفسي الليلة العصر ح امشي لي نضال في بيتهم مع انهم فاتوني بي يومين بس ح الحق ان شاء الله ، امي قالت لي الكورس بي كم لكن؟، لانو القروش الباقية دي ما مطمنه وانا كمان ما عايزة احرمك منو انت من متين طلعتي لي تعليم؟💔، قلت ليها كلها ٢٥ الف سكتت مسافة وقالت لي خير، قلت ليها اها عشان عايزاها الليلة وامشي اسجل عند نضال ، قالت لي كويس لمن تجي مارقة تعاليني ..
زي الساعه ١١ جا أحمد من مدرستو زهجان وصاري وشو وفي نفس الوقت عيونو مرقرقات ، مر بينا بس ما عاين لي اي زول وطوالي خشا جوا، قمت لحقتو لقيتو رمى شنطتو في الارض ودفن وشو في السرير، قلت ليهو احمد مالك؟، قال لي نسيتي انو الليلة يوم الأحد وقالو لينا نجيب القروش كاملة من يوم الخميس؟، قلت ليهو القروش كامله؟!، نحن اصلا ما دفعنا!، قال لي شيماء دفعت لي ١٣ الف يوم الخميس!، اتفاجأت وقلت ليهو جد؟، انت حكيت ليها؟، قال لي اي وريتها بس ما كنت متخيل انها ح تدفعهم لي، طلعت ظريفة وكلامها حلو ، ابتسمت وقلت كتر خيرها ما قصرت!، يعني هسي ناقصات ٧ الف؟ ، قال لي ايوه وطردوني بي سببها، في الحقيقة ما طردوني براي المدرسة كلها انطردت بس برضو انا ما بقدر اضيع حصصي وبكره امتحاناتنا طوالي💔..
قلت ليهو اممم ما تشيل هم واتجهز لي امتحانات بكرا، قال لي آمنة افهميني!، لو القروش دي ما اندفعت ما ح امتحن وح يصفرو لي درجاتي بس، قلت ليهو اااي عارفة انت بس اقرا عشان تطلع حاجه كبيرة في المستقبل وتسندنا!، قال لي بي حماس حاضر وطلع كتبو وبقى يكتب ويقرا..
مشيت اتوضيت وصليت الضحى وقلت لي امي اديني القروش هسي دي ح امشي قالت لي كويس ومشت جابتهم لي وانا طوالي مرقت على مدرسة ناس احمد وعلى مكتب المدير سددت ليهو ال٧ الف ومشيت لي ناس خالتو أميمة ضربت الباب مسافه حتى فتحت لي بعد سلمت عليها قلت ليها نضال موجوده؟، قالت لي لالا نضال الأيام دي بقت تجي العشاء عديل!،
قلت ليها ايوا ربنا يعينها ، قالت لي لكن بكره سامعاها بتقول ما ح تمرق فتعالي ليها بكره ، قلت ليها خلاص طيب ، قالت لي اها امك بقت كيف؟، كل مرة اقول عايزة اجيكم بحصل لي ظرف قلت ليها كويسه حمدا لله ، ما مشكلة بتجي والله ما بتقصري، وعلى كدا مشيت منها للبيت وحكيت لي امي الحصل..
