تاني يوم كنت متشوق شديد لرؤية الآمنة فصحيت بدري كعادتي ومشيت المسجد وجيت لقيتهم نايمين فعملت الشاي وشربتو وطلعت، لقيت محمود موجود فسلمت عليهو وباشرت شغلي ،لي وقت الفطور جاتني دعاء وقالت لي ارح امرق يلا!، ضحكت على استعجالها وتحمسها وقلت لي محمود ح امشي واجي ، قال لي تمام ما تتأخر بس انا الساعه ١١ ح اطلع قلت ليهو تمام وطلعت مع دعاء لمطعم قريب وطلبنا وبقينا منتظرين..، دعاء كانت مبسوطه وبتتكلم بي عفوية وتلقائية، بطريقة مباشرة قلت لبها امس البت ديك جاتك قلتي لي؟، قالت لي بي خيبة أمل كبيرة وحزن اي جات!، ابتسمت وسرحت في عالمي وقلت ليها احكي لي الحصل شنو؟ ،قالت لي اممم جات وبعد ما خلصت ادتني القروش كاملة وطلبت مني شاش، هنا قلبي وجعني جدا! ، يعني تاني ما ح تجي؟ اختارت كدا معقول!، انا كنت عبيط للدرجة دي؟!، ااه ياخ كان طارت منك تعمل شنو يا إياس!، اتقل شوية كدا ح تحس انك فارض نفسك عليها !،
انتبهت لي دعاء البتأشر لي على طلبنا وبتقول لي بابتسامه برد!، ركزت وقلت ليها اسف وبقينا ناكل ونتكلم في مواضيع ومواقف بتخص الشغل ، دعاء قالت لي طبعاً ح نعمل كورس صيدلة وتمريض ، قلت ليها اها كويس ح يتعمل متين؟، والاشراف على منو؟، قالت لي ماسكو دكتور عبدالرحمن إبراهيم اما الزمن دا فلسه ياداب بنخطط وبنرتب لكن غالباً بداية الشهر الجاي ومن هسي بدينا التسجيل ، قلت ليها ايوا لو لقيت طريقة ح اشارك فيهو، ابتسمت وقالت لي لازم تشارك فيهو!، ح يستمر ٣ شهور وفي النهاية ح يكون في رحلة كدا وتوزيع شهادات وياااه حاجات حلوة يعني يوم مفتوح، قلت ليها اممم خلاص ان شاء الله اشوف دكتور عبدالرحمن..، نمشي بعد دا؟!، مطت خشمها وقالت لي لسه ياخ ما شربنا قهوة ولا شاي!، قلت ليها اسف والله محمود دا شريتو هسي الساعه ١١ وتلت ، قالت لي خلاص طيب مع السلامة، قلت ليها ما راجعه تداومي؟
قالت لي لا راجعه البيت وابتسمت ابتسامه صفراء، هزيت ليها راسي ومشيت الكاشير حاسبت وطلعت على الصيدلية لقيت محمود قاعد ومتمحن اول ما جيت قال لي بالغت ياا أخينا دا كلو خلط؟!،قلت ليهو محمود ياخ!، قال لي ساعتين ونص ساااااعتين ونصصص، كنتو بتقولو في شنو؟، قلت ليهو ونسة و الزمن جرا قال لي تمام تمام انا مارق يلا مع السلامه ، واتخطاني ومرق وعبدالوهاب جا وانا باشرت دوامي..
مع الزحمة واللخمة البتحصل في الفترة النهارية دي شفت الآمنة♡، بس المرة دي كانت لابسة توب وكان جميل جدا عليها لمن ركزت لقيت انو في اطفال معاها!!، معقول؟، تكون متزوجة؟!، لالالا كان طلاق ح تطلق مستحيل اخليها!، جات علي بي ثقة وادتني الروشتة الفيها ادوية حمل ومنظمات سكري ، لمن شفت ادوية الحمل رفعت راسي وعاينت ليها بعدم تصديق وبلاهة كدا!، متزوجة؟، معقول!،
في اللحظة دي شفت الولد داك الاسمو آدم معاهم لمن شافني سلم علي بي فرح وقال لي إياااس!، كيفك؟، ابتسمت ليهو وقلت ليهو حمدا لله بخير وانت، قال لي تمام والله انت شغال هنا؟، قلت ليهو ايوه قال لي بيت ناس حبوبتي قريب من هنا تاني طوالي ح اجيك، قلت ليهو تنور في اي وقت، وبقيت أعاين ليهو واعاين للآمنة واطلع الشبهه بس كان مافي!، آدم قال لي دي خالتي آمنة!!!،
