لمن سمعنا صوت راما ورانا التفتنا عليها الإتنين مصطفى بقى يتمتم ساااي ويخبط في الكلام بس اتفاجأنا انها بتقول لي مصطفى بكل برود عايز تتزوج فوقي؟ ما تتوتر ساي انا ما عندي اي مشكلة وكان عايز تجيبهم دسسسستة جيبهم ما عندي فيك دخل بس اوعك تقصر مني ولا من أولادي واهو دا اخوك شاااهد ومشت مننا بي كل هدوء
عاينت لي مصطفى الوشو جاب مية لون وقلت ليهو خفنا ولا شنووو؟🤣، قبل شوية ما عامل لي فيها الأسد النتر الما بتقهر وهسي هبطت واتخلعت!، صر وشو وقال لي هاجر ح اعرسها و انت الله يخليك لي دا!، قلت ليهو انا الله يخليني لي آمنتي،عاين لي وفات لاحق راما،
ما كنا متخيلين ردة فعلها تكون بااردة كدا ، كنا متخيلنها ح تجوط وتكورك وتقوم الدنيا وتطلع مصطفى خاين وهو فعلا خاين ، بس كمان ما تفكر في موضوع تاني وتكون دافنة حاجه او مخططه ليها!، أولادهم اهم شي واي تصرف منهم في اللحظة دي ح يدمرهم تماماً!،
بعد دقايق سمعت صوت امي بتجوط قلت خلاص معناها حصلت الكارثة وامي عرفت بي فكرة مصطفى!، ما عايز صداع وكلام كتيير ، فقمت وشلت تلفوني وسماعاتي وطلعت من البيت شربت لي قهوة بس ورجعت البيت بعد مدة ، على المطبخ لاني جعان وشديد كمان اكلت واهم شي عملت عصير برتقال ، طلعت برا ولقيت امي في الصالة مع اولاد مصطفى قعدت معاهم وامي دي كانت سرحااانه وما مركزة معانا نهائي، ابوي جا وانضم لينا برضو قلت ليهو اها الراجل اعتذرت ليهو؟، قال لي اعتذرت وسبحان الله لو مشيت كان ح تجي راجع لانو لقى زول غيرك قلت ليهو سبحان الله والحمدلله عملت الفي راسي انا، قال لي اها الفي راسك دا ح يتم متين اتقدمت ليها والخطوة الجاية شنو؟، قلت ليهو حاليا ما عندي اي خطوة وانا حاجزها وواعدها بزواج بس لسه لانو ابوها متوفي قريب الا بعد ٣ شهور وانا ما داير اتجرجر في خطوبة وكدا!، لا طوالي ح اعقد، امي ركزت معانا ياداب وقالت لي دقيقة دقيقة هي البت دي من وين واهلها ناس منو وامها اسمها منو وساكنين وين؟، قلت ليها الصراحه نحن عارفين انهم من هنا وساكنين جنب مستوصفنا بس فرق شارع والصراحه تاني ما عارفين عنهم حاجه!،
امي عاينت لي ابوي وقال ليها اي والله حتى راجل خالتها لمن عرفنا بالاسرة كدا طلعنا ما بنعرفهم يعني هم ما ناس مشهورين!، امي قالت لي الله الله وكمان عايز تخش عليهم كدا وانت لا عارف اصلهم ولا فصلهم؟، زواجك دا ملكلك يا إياس لو رجعت لي كان اخترت ليك وحده خلقه واخلاق وحسب ونسب وجمال!، ابوي قال ليها جيبيها لي انا🤣، حمرت ليهو وقامت مننا..
قلت ليهو اها يااا حاج انتو راجعين متين؟، قال لي معقول نرجع الاسبوع الجاي بس اخوك دا انا مافاهمو!، كل مرة يقول لي لا ح نتأخر شوية لا ما عايزين نرجع هسي!، وانا والله شغلي ما بستححمل تأخير منتظراني اوراق ومستندات كتيرة الا اقعد المؤسسة كلها حتى تتوقع!، حتى راما جامعتها ح تفتح نهاية الاسبوع دا يعني كدا كدا ح تضيع محاضراتها لمدة اسبوع ، والاولاد والروضة ويعني كلها حاجات ما مستحمله تأخير!
