حقيقة دي أفضل فترة تمر علي في حياتي مع إياس♡، يومين استعدنا فيهم راحتنا وما طلعنا من البيت الا للكورنيش الصباح بنشرب شاي هناك وبنقعد نتمشى، إياس أفضل راجل في حياتي دي كلها وأثبت لي أنو بجد بحبني ما كلام ساي!،
امو كان اتصلت ليهو وطلبت تكلمني وفعلا اداني ليها لاحظت من كلامها انها انسانه حاده ورسمية بعد باركت لي وكدا قالت لي خلي بالك من نفسك ومن ولدي قلت حاضر ان شاء الله ، قالت لي لحدي ما تجي وتنورينا ابتسمت وقلت ليها البيت منور بي ناسو ، قالت لي تسلمي يا بتي وودعتني وقفلت الخط، صراحه كلامها كان واضح وبسيط بس طمني شوية وزاتو ما اتخيلت تتكلم معاي بالطريقة دي!، ياربي هي نست انو اختي عايزة تخرب بيت ولدها؟ ما عارفة المهم علاقتها حلوة معاي..
في اليوم التالت لينا مشينا السقالة واكلنا سمك ورجعنا البيت مرخمين ونعسانين ونمنا وما صحينا الا بالسخانه وقطعة الكهرباء والساعه كانت ٥ مسااء والواطة زاتها كاتمة ، صلينا المغرب وبقينا قاعدين مسخنين، إياس قال لي ارح البلكونة بتكون باردة قلت ليهو طيب دقايق اجهز حاجة قال لي كويس وسبقني وانا مسافة ما جهزت شاي وبسكويت وجيت لقيتو فرش البلكونة في الأرض وجاب مساند من الصالة والجو كان حلو شديد وبارد قعدت جنبو وبقينا نشرب الشاي ونتونس..
قلت ليهو انت يا إياس إسمك دا معناهو شنو؟، ، قال لي من آساه او يؤاسيه يعني يصيبه بالخير ومعناهو برضو العطاء ، قلت ليهو حلو شديد ونادر السماك بيهو منو لكن؟، قال لي سمتني بيهو أمي طبعاً على إسم الصحابي إياس ابن بُكير، قلت ليهو غريب ومختلف وحلو شديد ما شاء الله♡، قال لي حبيبي ♡، عايز احكي ليك!، ختيت الكباية وعاينت ليهو وقلت ليهو أحكي!، قال لي طبعا صفوني من الصيدلية فعشان كدا كنت متضايق..
قلت ليهو ربنا كاتب ليك الخير في مكان تاني اصبر واستغفر كتير وربنا ح يفتحها عليك ما تشيل هم نحن مع بعض ماف حاجه بتقلق!، قالت لي اكيد اكيد♡، ربنا ح يفتحها علينا قلت ليهو بس حاليا ما تشيل هم الجاي احلا!،قال لي بوجودك معاي كل شي ح يتصلح❤..
فضلنا كدا لي بعد العشاء والكهربا ما جات فزهجنا واياس قال لي نتوكل ننوم هنا احسن صح؟، قلت ليهو اكيد جوا الكتمة ح نستوي على الاخر ضحك وقال لي طيب انا نعسان تصبحي على خير!، ابتسمت وقلت ليهو وانت من أهلو واتوسدت يدو ونمت على طول..
في اغلب الايام بنشرب الشاي في الكورنيش ونراقب شروق الشمس وريحة البحر والبواخر وفي مكان بيعملو فيهو ترابيز القهوة بالصدف وشكلهم كان حلو جدا وحتى شلت صدف اشكال والوان واحجام ، مشينا الكوخ الغاطس وشفنا الاسماك بي كل انواعها والوانها ورحلة بحريه وانا مبسوطة وإياس خايف وكل شوية بعاين للموية ومتوتر شديد وبقول لي ح نرجع متين ؟، هسي كان متنا هنا نعمل شنو؟، ضحكت وقلت ليهو ما هو متنا تاني في شنو في يدنا عشان نعملو؟، وغايتو عدينا اليوم دا بي خوف شديد من إياس، عدينا الاسبوعين وكانت افضل اسبوعين في حياتي وذكراهم ح تظل في قلبي قبل زاكرتي♡، ورجعنا رغم توتري انو تحصل حاجه تانية في الشارع زي المرة الفاتت بس حمدلله ما حصل شي والشارع كان مليان بي ونساتنا وضحكنا لحدي ما وصلنا بيت ناس إياس وامو وخالتو واخوه وزوجتو رحبو بينا كتير وطوالي ضبحو وعملو كرامة مختصرة علينا وعلى الجيران القراب حتى امي جات حضرتها ولمن شفتها ما صدقت وسلمت عليها كأنو لي سنتين منها ما اسبوعين!،
