يوم وانا قاعده في البيت من الصباح بكنس وبمسح واطبخ كالعادة الباب دق فمشيت فتحتو ولقيت آدم وتالين قدامي ما صدقت اني شفتهم وضميتهم علي مع انو آدم نافر مني بس تالين بقت تصرخ بي فرح بي كلمة "ماما" بعد سلمت عليهم وانتهيت من الاحضان والبوس في وشهم انتبهت انو عوض واقف وراهم ، طوالي قلبت وشي وقلت ليهم خشو وسقت اولادي وخليتو واااقف في الباب ،
امي طلعت من غرفة وقالت لي الفي الباب منو،؟، قلت ليها بي نرفزة عوض ومشيت منها وبقيت اتونس مع اولادي، تالين قالت لي بابا امس ودانا المنتزه ولعبنا كتييير واكلنا بيتزا وايسكريم ابتسمت وقلت ليها الله حلو شديد♡، قالت لي ولمن سألت بابا ح نجي تاني متين قال لي المره الجاية انتي برضو ح تمشي معانا، ابتسمت ليها وسكت ،
آدم قال لي ماما انتي ح ترجعي معانا؟، ولا ح تمشي مع الراجل داك!، قلبي وجعني مع جملتو الاخيرة دي ومسكتو من يدو ووقفتو قدامي وقلت ليهو شوف يا آدم!، انا غلطت بس اتحملت غلطي وصلحتو وما ح امشي ليهو تاني ، مهما يحصل انا ح افضل امكم وبحبكم والله بس ما عارفة الحصل لي شنو في الفترة ديك بس كنت زعلانه من بابا ومضغوطة لكن انا حاليا اتراجعت عرفت؟، قال لي يعني ح ترجعي معانا؟
هنا سكت وما عرفت اجاوب ليهو بي شنو لاني الصراحه ما عندي رد مناسب انا ما عايزة ارجع لي عوض دا نهائي ما ح اقدر اغفر ليهو الفات ولا عندي نية اسامحو ، تالين كملت وقال لي هسي بابا قال لينا ح ترجعي معانا، انا عايزاك تعملي لي كيكه لمن نرجع يا ماما!، ابتسمت وقلت ليها حاضر ح اعملها ليك وسكت لانو صراحه عوض ختاني في موقف ضيق بس برضو ما راجعه ليهو!، امي جات وقالت لي عوض دا دايرك امشي ليهو!، قلت ليها ما دايرة!، قالت لي هاجر يا بتي!، احسن تمشي ليهو وتبقو على بينة وهو جاي لي صلح وعايز يرجعك والله!
ما تستعجلي وتطلعي احكام ساااي من راسك، افهميهو وشوفي عايز يقول شنو!، ومعقول زاتو انتي التمشي تعتذري ما هو لانو خيانتك ليها فاقت كل العمايل العملتيها ليهو!، قلت ليها خلاص يا أمي والله حفظت الكلام دا حفظ ما كل مرة تذكريني وتوجعيني بيهو!، غلطت وخلاص اي شي انتهى!
قالت لي ما انتهى اطلعي شوفيهو عليك الله بس لو بتعزيني!، قلت ليها سمح سمممح ولبست توبي كويس ومشيت ليهو لقيتو في الصالون اول ما دخلت قلت ليهو عايز تقول شنو ؟، قال لي قولي السلام عليكم اول!، قلت ليهو وعليكم السلام اختصر انا ما عندي ليك زمن!، قال لي جيت اعتزر ليك يا هاجر!، انا اسف عن كل مرة أذيتك ووجعتك فيها وضر'بتك انا ما كنت عارف بفكر كيف او بعمل كل دا باي منطق،
انا قمت في بيت الراجل فيهو ما بعتزر وانت البتمسك زمام الأمور وانت الكلمتك مسموعه فصراحه أنا لاقي صعوبة في اعتزاري ليك دا بس أعفي لي عليك الله!، قلت ليهو عافية ليك واعتزارك مقبول ارتحت؟، يلا اتفضل امشي!!، قال لي ما ح امشي بدونك والله انا جيت عشان ارجعك لي بيتك، قلت ليهو ما راجعه، اعتزارك قبلتو بس ما بجيب لي شي ما بيمسح لي او يخفف عن الآلآم الجاتني منك!، ضربتني وذليتني وهنتني وعملت السبعه وزمتها ودا كلو كنت مستحملاهو منك لمدة ١١ سنة واكتر تقريبا وجاي تمسح الحصل في ال ١١ سنة بي كلمة "آسف"؟؟، قال لي هاجر انتي برضو تصرفك ما كان صاح وانا حاليا ما بلومك وشايف التقصير دا كلو مني انا لانو لو عرفتي في بيتك الامان والاحترام ما كان مشيتي ليهو لي برا وللاسف ما صنتي بيتك وحفظتي نفسك وكنتي ح تخونيني مع صاحب عمري؟ بس امسي وامسحيها في وشي وخلينا نبدا تاني من جديد!،
