امي لمن عرفت ردي سكتت ساي وما ابدت اي ردة فعل ولا سألتني ولا اتكلمت معاي وواصلت في البتعملو عادي كأنو ما حصل شي ، عرفت انها زعلانه وكمان زعلانه شديد عشان كدا ما بتستخسر فيني ولا حرف، شيماء حبت تلطف الجو فقالت ح تعمل لينا كيكه مع الشاي وطبعا احمد وروان فرحو شديد ومشو يساعدوها ، المغرب اذن انا طوالي قمت وصليت بعد خلصت شيماء قالت لي امشي تابعي لينا الكيكه في الفرن قلت ليها تمام ومشيت جوا بقيت اتابعها بي عيوني وتفكيري كلو مع إياس!
انا ليه سيئة كدا وبذل في نفسي كدا وشايفة اني دايما بستحق الأدنى وبرضى بالقليل ؟ اكيد طبعا عشان طبيعة البيت الرايق الهادئ الحافينا بالحب والدفء دا!!، انا لسه ولسه ندمانه من قراري ومتألمة لي إياس هسي بكون كيف؟، انا فقدت كتاباتو شديد وحتى الجمل البقولها لي كانت كفيلة انو تخليني قوية ومطمئنة لعشرة سنين قدام،
انتبهت انو خلاص الكيكة نجضت فطلعتها وفصلت الفرن وامي نادتني قالت لي آمنة يا آمممنة تعالي سرعه!، مشيت ليها مستعجلة وقلت احتمال تكون وقعت ولا الحضل ليها شنو ولا شنو؟؟، لمن مشيت ليها لقيتها قاعدة وتلفونها فاتح جنبها قلت ليها امي مالك؟، قالت لي بصوت متقطع هسي اتصل علي عوض و وقال لي..، قلت ليها وانا بخت يدي على كتفها قال شنو؟، دموعها نزلت بغزارة وقالت لي ابوك مااااااات! ،
ما قدرت استوعب اي شي لحدي ما كمال واحمد وروان وشيماء جونا وقالو لينا مالكم؟، كمال قال ليها المات منو يا أمي؟، امي دي كانت بتبكي بي صوت وما قادرة تتكلم لحدي ما قالت بعد تعب اسامه ماات وقطاعتنا قطعتو حتت، في شارع حصل ليهو حادث وقالو لي مرقوهو حتت وكل الاطراف مرقوها منفصلة، وووب علي من الجاتنا ، لا حول ولا قوة الا بالله إنا لله وانا اليه راجعون..
هنا ياداب انا استوعبت انو ابوي مات!، ح يلاقي ربنا كيف؟، قت'ل وعذب وضر'ب وكسر خواطر وسمعنا الاف الكلمات والالفاظ الما بتجي على بالكم، ربنا ح يغفر ليهو؟💔، احمد وروان بقو يبكو وصرخو في امي وشيماء وبقو يقولو ليهم انت القت'لتوه انتو دعيتو ليهو ، وكمال دا ما شفت ولا دمعه نازلة منو وطوالي التفو ومشى الصالون، امي وشيماء بقو ببكو شديد وبي صوت وصراخ لكن هم ببكو عليهو وعلى العملو وما كان ببكو ليهو، هسي دا يرثوهو كيف؟، وين الطيبة ووين الاخلاق وين الحب والعطف؟ وين وين وين؟!!
بقيت زي الفي مسلسل مافاهمة اي شي بس الاحداث بتمشي وتجي بي سرعه، بيتنا في ثواني اتملى والجيران كلهم ببكو فرحاً اننا خلاص ارتحنا واتفكفكنا، هاجر جات تاكلنها من الباب ، والنسوان عايزين يقت'لونا نحن زاتنا من الاحضان والتعزيات الفي راسنا والصداع، متين الرجال جو وكانو كتار شديد عشان ابوي علاقاتو كتيرة وحلوة مع المجتمع الخارجي، متين غسلوهو وكفنوهو ولمن طلبو العفو؟
ماف زول مننا فتح خشمو وقال عافي ليهو ، من جواي انا عافية ليهو بالرغم من العملو فينا برضو عافية ليهو وكذلك شيماء عفت الا امي و هاجر💔
