"هاجر اتطلقت"
دي اول جملة سمعتها من امي لمن جيت داخله البيت!، خلاص نحن انتهينا وهي ح تعمل الفي راسها امي زعلانه ودمعتها في عينها من وجعتها على هاجر، هي مبسوطه وبتجهز في بسبوسة في المطبخ واولادها قاعدين جنب امي وببكو💔، اتصدمت وقلت لي امي دقايق هو الحصل شنو بالضبط وهاجر جات متين ودا كلو حصل كيف ومتين انا ما فاهمة شي!.
قالت لي انتي مشيتي بي جاي جات عديمة الاحساس دي فرحانه اولادها قدامها ببكو من قبيل وراجلها وراها بحنس فيها وقدر ما اتكلم معاها هي سفهاهو وما نطقت معاهو بحرف، يعني انا قلت مشت مني مصيبة وكمان هسي تجيني مصيبة زي دي؟، اصلو دمكم ما زي دم ابوكم انا اتوقع شنو مثلا؟، قلت ليها آسفين والله يا امي بس دي هاجر نحن ما عندنا ذنب ولا ح يجي يوم ونزعلك ولا نغضبك!
قالت لي لمن جاني حرقان منها حسبي الله ونعم الوكيل ياااخ انا تعبت والله!، عايزة اقوم امشي لي هاجر كدا هي جات وشايلة صينية كبيرة في يدها فيها حاجات قهوة كااااملة ، قبل ما تختها امي طقطقت ليها يدها وقالت ليها رجعي سرييييع انحشي بيهو براك اكل المجانين دا ما بضمنو، هاجر ولا اترددت وطوالي التفتت ورجعت وامي قعدت تتحسبن ، آدم كان بعاين لي بعين غريبة لحدي ما قال لي امي الراجل الدايرة تعرسو ماما اخو الاتقدم لي آمنة!، هنا كرهت آدم وشميتو شمة وما باقي لي الا اخنقو في داعي للفتن دي؟، امي قالت لي الله!، يعني فاكرة ح يوافق بيك بعد ما يعرف بي دا؟ ح يقول انك زي اختك ويسيبك و، قاطعتها وقلت ليها امي انا اسفة على المقاطعة بس اياس ما ح يتخلى عني هاجر واخوهو براهم وما عندنا معاهم اي دخل وزواجنا ح يتم..
امي قالت لي طيب وامو لمن تسمع؟، فاكره ح ترضى؟، قلت ليها اياس الح يتزوجني ما هي!، زمت شفايفها وقالت لي كويس!، انتي واختك اعملو العايزنو بس اوعكم بعدييين تجني باكيات بسبب تهوراتكم دي!
قلت ليها حاضر وقمت منها لانو راسي قفل وهي زاتها بعد دا ما بتستحمل اي نقاش لقيت هاجر في العريشة بتشرب في قهوتها بي مزاج عااالي وضاربه اي شي بعرض الحائط قلت انا براي مصدعة ف ما ح اتناقش معاها ولا افتح خشمي معاها لانو خلاص تاني بقت لا بتسمع ولا بتفهم وانا احسن اركز مع نفسي..
أحمد جا من مدرستو وطوالي مشى لي امي وقال ليها عايز كوره!، عارفه انو ما عندنا قروش كافية بس امي ما حبت تكسر خاطرو وقالت ليهو سمح خلي كمال يجي تمشو تجيبوها سوا ، لكن تلعب بيها انت وادم فهمت؟، قال ليها حاضر حاضر وطلع برا وهو فرحان ومبسوط، بعد دقايق الباب دق وقدر ما ندهت على احمد واولاد هاجر عشان يفتحوه ماف واحد فيهم سمعني فقمت انا لبست توب وفتحتو وكان كمال،
بس كان فيهو حاجه غريبة!، ملابسو وجسمو كلو ريحتو سجار وعيونو حمر انا افهم شنو من دا؟!، وحتى بعد ما سلم علي مشى على الحمام اول استحمى وغير ملابسو حتى مشى سلم على الباقيين!
