كنت في حالة صدمة ما عارفة اعمل شنو ما قادرة ادي نفسي فترة قصيرة عشان استوعب فيها الحصل رعشة في جسمي المتخشب والما حاسه بي اي طرف فيهو ودموعي بدت تنزل!، انا خايفة افتحهم والقى إياس اصابو مكروه او اتخدش ساي!، انا خايفة يكون حصلت لي حاجه !،
كانت في يد على كتفي وبعد مسافة سمعت صوتو وهو بقول "آمنة انتي كويسة؟" ، الأمان بعد الفزع شعور اقوى خسف بالشعور التاني ياداب ارتحت شوية واطمئنيت..، لما ما لقى مني جواب عاد السؤال تاني واضاف عليهو "فتحي عيونك وعايني لي كدا نحن كويسين ما حصل شي!" رفعت عيوني الملتها الدموع ما كنت شايفاهو كويس منها بس كنت شايفة زي الضباب كدا واول ما شفت طيفو اترميت في حضنو وبقيت شادة على التيشيرت حقو ورجعت ابكي كويس خلاني لمسافه لحدي ما رقت شوية وبقيت اتنهد وزحاني منو وقبل لي ورا وبقى يفتش لحدي ما لقى قارورة موية اداني ليها وقال لي دقايق وح اجي ونزل من العربية..
هنا ياداب ركزت انو فعلاً ما حصل لينا شي حمدلله ونزلنا من الشارع الرئيسي بس والمكان كان متدحرج او بالاحرى الشارع هو العالي، وقدامنا كان في ناس كتار واقفين ومن ضمنهم إياس الكان بجوط مع واحد لدرجة عرقو البين حواجبو ظهر وفجأة ضربو كف والناس كلها مشت ،
ما عارفة الحاصل شنو ولي الراجل داك ما ابدى اي ردة فعل على الكف بس إياس جا بي نفس الإنفعال ركب في العربية وقفل الباب بقوة وزفر لمدة طويلة ومسح وشو واستغفر وعاين لي قال لي احسن؟، هزيت ليهو راسي ودنقرت راسي مسحت دموعي واخدت نفس طويل وقلت ليهو الحصل شنو؟، إياس تاني رجع لي انفعالو وقال لي الك*لب داك جاي داخل خطأ قدامي كان في عربية كبيرة وهو جاي من الاتجاه المعاكس ولافي ودخل بينا ، لو انا ما اتصرفت وانحرفت بي نفس الجهة القطعنا بيها كان دخلت فيهو والحمدلله ربنا ستر وفي حال تحصل حالة زي دي طوالي بنضرب كف عشان كدا ضر'بتو، كان بتنفس بي سرعة شديدة وكل مرة يستغفر ختيت يدي على يدو وقلت ليهو إياس خلاص قول بسم الله وكمل ما حصل شي!
عاين لي وهز راسو وشرب موية وتاني رجع كمل سواقتو عادي ، قلت المره دي ما ح أنوم واحاول اتونس معاهو والطف الجو لانو لسه كان متوتر اكتر مني عديل، قلت ليهو إياس احكي ليك نكات؟، عاين لي بي طرف عينو وقال لي بي زهج قولي! قلت ليهو في كمساري مات دفنوه في آخر محطة!، ابتسم وزح الابتسامة بي سرعة قلت ليهو طيييب استاذ رياضيات فلس سرق جيب الزاوية!، برضو ابتسم لي بي مجاملة قلت ليهو طيب في ضب نجح ابوه جاب ليهو حيطة!، المرة دي سفهني عديل قلت ليهو آخر وحده طيب!، قال لي اهاا قلت ليهو في واحد بحب اللون الأزرق شديد في عرسو جاب الفنانة حنان Blue Blue..
عاين لي وما ابدى اي ردة فعل قلت ليهو إياس ياااااخ أضحك كدي انا ما متعودة عليك كدا!، برضو ما رد هنا انا عايزة ابكي عديل قلت ليهو بي صوت بريء يا حبيبي ما تضحك كدا وفرفش!، خجلت شديد لمن ركزت مع الكلمة القلتها بعد فوات الأوان بس هو ضحك وقال لي كلمة يا حبيبي طالعة منك زي العسل!♡، قلت ليهو يا غياااظ ٤ نكات ما ضحكتك الا كلمة واحدة؟، قال لي آسف والله الموضوع مزعلني لسه!، قلت ليهو طيب معناها اعمل حسابي لانك طلعت زعال!، قال لي ما كدا انا باخد في خاطري وما بنسى بي سهولة بس!، قلت ليهو ما ياهو زعال!!!، ابتسم وغير الموضوع وفضلنا نتونس كتير لحدي ما وصلنا الدامر وعطبرة ونهر عطبرة♡، كان وقت الفطور جا فوقفنا في كفتريا واخدنا فطورنا وواصلنا ،
