تاني يوم مرقت من بيتنا الساعه ٨ وكنت متأخره شديد قلت احسن زاتو عشان ما يطعنوني معاهم، لمن وصلت لقيت إياس برضو وصل ياداب وداخل قدامي ، لمن شافني ابتسم وقال لي الآمنة♡، عجبني اسمي بالطريقة دي وكمان بي صوتو ، ما قادرة اقاوم اكتر من كدا، انا ضعيفة وسهلة جدا قدامو مع انو دائما بحاول اثبت العكس!
قلت ليهو أهلين وتميت طريقي ، وقفني وقال لي دقايق اديني رقم ابوك او ولي امرك ، قلت ليهو لا طبعا ما ح اديك ليهو!، قال لي طيييب الجمعه الجاية ح اجيكم بعد المغرب انا وأبوي!، قلت ليهو تجينا ليه؟، عشان تتقدم لي؟، انا ما عايزاك!، الجملة الأخيرة دي قلتها بي خوف وتحذر وتردد، ضحك وقال لي طيب كدا كدا انا ح أجي ولو رفضتي مع انو متأكد انك ح توافقي يكون كلامك من بيتكم ما في شارع او اتفاق مسبق بينا!، عاينت ليهو ولقيتو جادي وواثق لدرجة ، جاتني الاف المشاعر الملخبطة لكن شعور الخوف كان هو المسيطر ، فقلت ليهو برضو ح تترفض ودخلت جوا ولقيتهم باديين واي زول بطعن في التاني، نضال شرحت لي وقالت لي اقعدي جنب اسراء دي وجربو في بعض، قلت ليها حاضر وبديت انا اول وجربت فيها وانا برجف ويديني باردات وكل مره بقول ليها وجعتك؟، حاره؟،
لحدي ما جا دورها هي واول ما رفعت كم عبايتي وهي مسكت يدي ترزتني ترزة حاااارة لمن فكيتها صرخه كبيره كبرها الصدى زيادة ، نضال جاتنا مخلوعه وطلعت الحقنة واسراء بقت تعتزر لي كتير وانا البكاية نزلت دموعي كلها ، شفت إياس داخل وهو بقول لي نضال في شنو؟، قالت ليهو جاتها في العضل ، جا علي وجاب قطن ناولو لي نضال وبقى بعاين لي بي شماته وعايز يضحك ، قال لي انتي دراما كوين والله ، وواصل بي صوت واطي وقال الله يصبرني عليك بعدين، اتغظت منو شديد وعفصتو في رجلو وكشرت ليهو شي وهو بقى يضحك ومرق،
نضال ادتني قطن بعد ما نضفت لي يدي وقالت لي خليك ماسكاهو لي مسافه وتاني رجعت تنوه وتحذر وتشرح اكتر عن خطورة وضع الحقن في الاماكن الخطأ ومصادفتها للعضل ، وتاني بقت تتكلم عن فصائل الدم والانتيات ، لحدي ما خلصت وطبعا الليلة الوقت جرا اكتر وطلعنا متأخرين، في الباب إياس قال لي انا جادي وري أهلك تمام؟، عاينت ليهو بلامبالة وقلت دا واحد كذاب ساي بي شارع بيتنا ما ح يقدر يجي وواصلت شارعي لي بيتنا ، لمن وصلت لقيت شيماء ومعاها روان ولسه احمد وكمال ما جو قلت ليهم امي وين؟، قالت لي امك دي مرقت مستعجله ولمن سألناها قالت ماشه لي هاجر!، هنا انا استغربت وخفت قلت ما تكون هاجر اتهورت او عوض عرف حاجه لانو ما حيحصل ليها خير وح يقت'لها ح يقت'لها ربنا يستر بس، شيماء قالت لي اها اخبارك انتي شنو؟، والليلة حصل شنو حكيت ليها وقالت لي كويس والله ما جاتك حاجه!، قلت ليها اي الحمدلله، قالت لي تصدقي انا الليلة دي قلت عايزة انزل ادرس في مدرسة بس المشكلة انو اوراقي كلها في بيتنا هناك!، قلت ليها طيب شوفي ناس بيتكم يرسلوها ليك!، قالت لي الا كدا والله بس ابوي لو عرف ما ح يرضى، قلت ليها حاولي بقدر الإمكان تجيبيهم وابوك ما يعرف، دي حياتك انت وانت حره! قالت لي فعلا ح احاول بوري اختي ترسلهم لي..
