تاني يوم بقيت بفكر في كلام هاجر وبعاين لي أولادها بي حسرة وامي دي زعلانه منها وما بتتكلم معاها واها لمن هاجر شافت معاملة امي ليها طوالي لملمت شفعها ورجعت بيتها، مشيت الطبخ عايزة اشرب موية لقيت شيماء بتجهز في الغداء، بعد شربت قلت ليها اساعدك في حاجه؟، ابتسمت وقالت لي لالا خلاص خلصت بعد دا، قعدت في كرسي وقلت ليها انتي لي بتتعاملي معانا كدا؟، قالت لي كيف؟، قلت ليها ما معاملة مرت ابو!، وانتي زاتك بي طيبتك دي قبلتي ابوي كيف؟ والخلاك تتزوجي راجل مره شنو؟
ضحكت وقالت لي برااحه برااحه بحكي ليك، انا يستي ما بحب المشاكل يعني بطبعي كدا طيبة ومسكينة الحمدلله على النعمة دي..، خريجة كلية الآداب والعلوم الانسانية جامعه الخرطوم عمري ٣٠ سنة من دنقلا ، وابوك دا قريب ابوي من بعيد كدا وحجزني من بين اخواتي ليهو واهو بقيت ساكته لحدي ما وصلت هنا، قلت ليها طيب ردة فعلك شنو لمن عرفتي انو راجل مرة وعندو ٥ اولاد؟، قالت لي والله انا ما عرفت انو متزوج الا لمن وصلت باب بيتكم دا ووراني يعني اكيد لو عرفت من البداية ما كنت ح اوفق ولا اضايق مرة في راجل ولا اولاد في ابوهم..
قلت ليها بالعكس ما ضايقتينا بقيتي اضافه جميلة لينا وما قصرتي ووازرتي امي في الفترة الفاتت لكن برضو دمرتي نفسك وجيتي لي أوهن البيوت ، ابتسمت وقالت لي دا واجب انا عاملتكم كأخواني وأولادي..، يلا نادي أخوانك للغداء ، قلت ليها حاضر ومشيت ناديتهم، بعد إتغديناعملنا قهوة وشاي وفشار ولقيمات يعني عملنا لينا قعدة كدا حلوه وعزمنا خالتو اسماء واميمة والحاجه الحلوه انو نضال جات مع امها♡، طوالي مشيت سألتها عن الكورس، قالت لي والله يا آمنة الكورس دا بديناهو من أمس فاا ما عارفة؟!، قلت ليها مرو يومين بس ح الحق وانا فهمي سريع والله ما ح اتعبكم! قالت لي طيب عايزة ياتو كورس؟، هنا طق جاتني نقطة انو قروشي ناقصه!، ناقصه ٧ الف كمان قلت ليها اا انا والله عايزة كورس التمريض ، قالت لي للاسف العدد خلص بس ممكن تدخلي حق الصيدلة!، هنا كأنها اتزكرت حاجه وقالت لي لالا خلاص بدخلك في تمريض، ابتسمت وقلت ليها طيييب دقايق، ومشيت اديتها ال ١٨ الف وقلت ليها الباقي ح اجيبو خلال الاسبوع دا بإذن الله، قالت لي لالا ما مشكلة بجو، قلت ليها اها بكرا ح اجي متين؟، ووريني عملتو شنو خلال اليومين ديل؟ قالت لي من الساعه ٨ في النادي الرياضي البعد المدرسه واخدنا مقدمة في العلوم الطبية عامة واخلاقيات المهن الطبية وبدت تحكي لي عن التفاصيل لحدي ما خالتو اميمة قالت انهم لازم يمشو وحمدالله كان نضال حكت لي اغلب التفاصيل فقدمناهم للباب ومشو..
رجعت لي امي وحكيت ليها فالت لي طيب انا مش اديتك القروش كامله؟، قلت ليها اي لكن دفعت لي احمد باقي رسومو، قالت لي الله عليك يا آمنة لو مت ح اكون مرتاحه انك سند لي اخوانك ، قلت ليها ربنا يبارك في عمرك يا أمي♡، شيماء جات ماره وقالت لي مالك بكرا ماشه وين؟، فحكيت ليها بالكورس قالت لي كويس والله والتمريض دا زاتو مجال حلو جداً بس ح تتعبي فيهو ربنا يعينك يا أمون♡ ، قلت ليها اميين يارب، وبقيت اليوم كلو مبسوطه وفرحانه شديد وبفكر بكره ح البس شنو واعمل شنو؟، كنت متحمسه شديد ومتأكده انو حياتي ياداااب كدا ح تبدأ صح كدا ياداب ح اكتب قصتي❤...
