تاني يوم بعد روتيني المعتاد وقبل صلاة العصر اضطريت اقطع دوامي عشان اوصل الست شفق، ما عارف انا اهلنا ديل كلهم بكرهم وما بطيقهم نهائي وبالذاااات شفق دي عشان هي لصققققة وبتاعت تكاليف رهيبة والحمدلله، مشيت ليها وانتظرت برا بيتهم ساعة عشان هي تجهز طلعنا قالت لي ارح نمشي المطعم الفلاني انا ما اتغديت مشيت تاني قالت لي وديني السوق عندي هيلز ولا شنن كدا ما عارف عايزة تشتريهو تاني قالت لي صحبتي منتظراني في المكان الفلاني ارح ليها لمن مشيت على وصفها انتظرنا نص ساعه تاني كمان عشان صحبتها دي تجهز سقناها وحتى الحمدلله وصلتهم لمركز التجميل دا ولمن نزلو ما فاضل لي الا اسجد شكر لي ربنا،
عبيت بنزين وواصلت في مشاويري تاني وما عندي دخل بي لمة وجوطة الخطوبة دي..، تاني يوم امي وخالتي مشو لي ناس آمنة كتعارف صغير بس والاسبوع الجاي ح تبدا كل الترتيبات الصح، مصطفى جا داخل والتعب ظاهر في وشو واترمى في اقرب سرير وغمض عيونو امي قالت ليهو مصطفى انت كويس؟، قال ليها اي بس عايز انوم قالت ليهو سمح نوم وخليناهو ورجعت تتناقش معاي تاني في باقي التفاصيل وقالت لي افضل الملابس تشتريهم على مزاجها فعشان كدا اديهم مال متكفي قلت ليها تمام طيب بكرا عندي صرفة وح اجمع قروشي كلها اديك ليها قالت لي سمح، كدا ياااداب ارتحت وارتحت شديد كمان كلها اقل من شهر وانا وآمنة نجتمع في بيت واحد♡..
__________________
بعد اتصال طويييل مليان بي اطمئنان بعضنا اننا ح نواصل مع بعض وزواجنا ح يتم قفلت منها ولبست وطلعت وبقيت أتمشى لحدي ما وقفت عند ست شاي في شارع طويل، القعدة كانت جميلة تحت شجرة كبيييرة ظليلة والمكان مرشوش بي موية وريحة الدعاش والابتسامات الدافئة البتوزعها ست الشاي كلها حاجات كانت كفيلة انها تسوق رجليني ليها سواقة لانو قعدة زي دي في لندن اكيد ما ح تتلقي!، بعد اخدت كباية القهوة قعدت في كرسي وبقيت اتصفح في تلفوني مرة وآخد رشفات من القهوة مرة تانية، جو راجلين قعدو جنبي وواحد بدا يحكي للتاني وصراحه اتشديت لي كلامو الأكترو كان بتخللو كلمة "ندمت" ..
_قلت ليك اني ندمت والله!، ندمت اني بعدت من زوجتي وشتت اولادي، ندمت جدا على زواجي التاني دا ، صاح هي فطرة فينا ولمن تجيك في راسك لاااازم تصمم وتصر عليها ولو تقيف في وش الدنيا كلها ، تعرس وبتكون في البداية ملهوف ومتحمس انك مع وحده تانية ووش تاني ودلع تاني وياااخ بتحس بي تجديد كدا ونسيت القدام لي شهر عديل وتاني رجعت للتلتة الصاح والفترة الوردية دي انتهت..
بقيت يوم هنا ويوم هناك والمصاريف والأكل والشراب تودي لحمة وخضار ومواد تموين بي هنا ونفس دا كلووو كمان توديهو بي هناك وتلتلة عجيبة ياخ مصاريف الأولاد العادية ورسوم مدرستهم بقيت بدفعها بي تلتلة وناقصة وزمان كان بدفعها كاش وماف التعب دا كلو والمرتب مبرووك ولمن ينتهي بكون لاقى موعد مرتب الشهر التاني لكن هسي المرتب بقى ينتهي في اسبوعين بس! ، دي نقطة النقطة التانية انك جسديا بتكون تعبان وما عايز تشوف وش اي واحد من افراد الاسرة الجديدة زاتها بتكون كرهتها والانبهار انتهى..
