ما عارف وقفت كم من الزمن وانا بعاين لي باب بيتهم وبضحك براي زي المجنون وما انتبهت الا على صوت تلفوني لمن طلعتو لقيتو اتصال من أبوي! ، وقبل ما ارد انا المكالمة فصلت ، قلت خلاص انا اصلا كدا كدا ح ارجع البيت بس اول ح امشي الصيدلية اودع محمود ، وانا في طريقي ليهو لاقيت دعاء!
كانت باهتة لدرجة وحتى ملامحها اختفت عديل لو ما الخاتم بتاع الفضة البتلبسو على طول ، قدامها كان في راجل جاريها من يدها بي همجية شديدة، للحظات حنيت عليها وكنت ح اتدخل بس هي كمان عملتها في نفسها لا تغفر كمان لمن لصقتني معاها؟
عملت نفسي ما شايفها واتخطيتهم ومشيت قدامهم كأنو ما حصل شي، وصلت الصيدلية ولقيت محمود مدنقر ورا البترينات لمن حس انو في زول دخل رفع راسو وطقاهو بالقزاز ، لمن شافني خت يدو في راسو وقال لي ياريت لو اغمي علي وما شفتك!، ضحكت عليهو وسكت وهو كمان كمل وقال لي وهو بشوف تلفونو الساعه بقت ٩ الا ربع معقول انت هسي تكون طاير في الجو الجابك شنو يا أخينا؟ ، قلت ليهو قلت للكابتن طرف بالجنبة انا اشتقت لي محمود وما بقدر افوتو🤣 ، قال لي لا انا جادي والله! في زول بفوت اغتراب ٦ سنين من السودان؟، والله انا اغتراب مصر راضي بيهو بس اطلع من البلد دي!، وانت انت!!، عض يدو وقال لي اعمل ليك شنو يااخ!
قلت ليهو عصير برتقال مركززز كدة وتكون ما قصرت، عاين لي بي نظرة انا متأكد لو قلت شي تاني ح يخنقني!، قلت ليهو احم احم، يلا شوف!، انا ح انزل بكره ان شاء واداوم اليوم كلو واريحك، قال لي تماام منتظرك ، ودعتو على كدا ومرقت البيت، لاقيت عبد الوهاب مارق من بيتنا وحمدالله ما شافني لانو كان ح يشغلها لي، الباب كان متاكى فلزيتو ودخلت ولقيت عناصر الحكومة كلها قاعدة في سراير الحوش..، مصطفى لمن شافني قال لي اوووو مغترب ال ٦ دقايق!، طولنا منك شديد وضحك ضحكة استهزاء ، أبوي بي كل هدوء قال لي تعال اقعد هنا وفعلا سمعت كلامو وقعدت بعيد لكن، قال لي مشيت ليه؟، سكت وما قلت حاجه، تاني عاد سؤالو وقال لي فوت مواعيد الطياره ليه؟
عارف كمية الخسارات والقروش الخسرناها؟، ولا عارف ردة فعل الراجل الدافع قريب المليار جنية سوداااني من تجهيز جوازك لي حق التذكرة والإقامة ووو، وانت في ثواني تتسحب؟، طيب الراجل داك لو عرف دا كلو ح ينجلط والله!، إياس والله حركتك دي شافع ما بسويها!، الناس كلها بتطمح للاغتراب والخروج من البلد دي لانو مستحيل تحقق فيها حلم وانت لمن جاتك الفرصة على طبق من ذهب وبدون اي جهد ولا تعب ولا وساطات ولا مليم ما دفعتها بس عليك تقوم تمشي بس!
عشان كدا جيت بي كل بساطة وقلت لينا يا جماعه انا ما ح اسافر! انت مجنون يا ابني؟؟!، ورينا عشان نلحقك اقرب مركز إعادة تأهيل عشان ما معروف تعمل شنو تاني!، او كدي هسي احكي لي دوافعك الخلتك تتراجع عن السفر شنو؟ في زول عرض عليك عرض مغري اكتر من كدا ولا الحصل شنو ارح برر لي! ، هنا بعد تردد كبير وصراع قوي جواي قلت ليهم مشيت اتقدمت ليها تاني..
