غمضت عيونها وختت راسها على كتفي بي كل أريحية وأمان وبعد دقايق انفاسها انتظمت دلالة على نومها، كانت زي الملاك الصغير البريء وملامحها وقت سكونها كانت ابسط وأجمل والطف بكتير.. ، شلتها براحه وختيت جسدها الصغير في السرير وطلعت من الشقة ومشيت لاقرب بقالة واشتريت حاجات بسيطة عشان اجهز غداء خفيف ومشبع في نفس الوقت،
سجوك وبطاطس وجبنة مضفرة وزيتون ، جهزتو وكنت عايز اصحي آمنة بس شكلها وهي نايمة ظاهر عليهو تعب وارهاق واكيد بتكون سهرانة ومحتاجه للنوم أكتر من الأكل فخليتها وانا زاتي رقدت جنبها ونمت،
الحنية!، شعور لو اتبادل بين الراجل وحريمو على طول الدنيا ح تكون حلوه والله!، بس في الأغلب الشعور دا معدوم ولو في راجل اتعامل بيهو وبالذات لو راجل شرقي وسوداني كمان يبقى زي العيب كدا ورجوله ناقصة ويقولو خلاص مرتو كتبتو ولا قهرتو ولا بخاف منها ومستحيل يتعامل معاها بالحب والحنية دي ودا كلو تمثيل وانننن،
بس كتصحيح مفهوم انا شايف انو دا ما عيب!، وكمان بالعكس كدا الرجولة بتكمل بس لو شايفين الرجولة صوت وخشونة وقوة وقسوة تبقو غلطانين!، الرجولة لين وحب واحترام ومعاملات الرجوله مواقف وما مستحيل انو راجل يتعامل بالطريقة دي بس اغلب او كل الرجال قايمين في بيوت شايفين فيها تعامل حاد وصعب من ابآئنا لي باقي الأفراد ودائما في خوف واضطراب منو وبالطريقة دي انا ح اتعامل بنفس الطريقة دي مع افراد اسرتي الح اكونهم بعد ما شبعت من المواقف الفي بيتنا، نحن محتاجين نغير اي مفهوم خاطئ ونتعامل -بحب- مع اي فرد..
ما عارف نمت كم من الزمن بس لمن صحيت وعاينت للشباك الوقت كان مساء شلت تلفوني بي كسل ولقيت الساعه ٦ مساء والمغرب أذن زمان ونحن لا لحقناهو هو ولا صلاة العصر، آمنة لسه نايمة فصحيتها بي ربتات خفيفة على كتفها وطبعت قُبلة على خدها فتحت عيونها ببطء وقالت لي بصوت ناعس اقول صباح الخير ولا مساء النور؟، ضحكت وقلت ليها مساء النور، ارح قومي فوتنا موعد صلاة العصر والمغرب قالت لي طيب وقامت لحقنا الصلاتين وانا دفيت الاكل واكلنا، العاجبني فيها كمان انها كانت بتحاول تتعامل معاي عادي رغم انها لسه ما متعودة علي وخجلانه ومتوترة تطلع اسدالها وتكشف شعرها ، اتفهمتها وقلت عادي جدا لاني قبل ساعات قليلة كنت ما بحل ليها فانا متفهمها ومع الايام ح تتعود وتتعامل عادي..
_______________________
آمنة: -
بعد صلينا إياس غاب دقايق في المطبخ وبعدها ناداني لمن مشيت لقيتو مجهز الغداء بعد خلصنا هو غسل الاطباق الوسخانه وانا جهزت الشاي وطلعنا بيهو برا في الصالة وحاولت افتح مواضيع وابين ليهو اني عادية ، قلت ليهو حاسه اني لسه ما بعرفك كويس فاديني نبذة عنك كدا يا استاذ إياس، إبتسم وقال لي طيب..، انا إياس محمد اسم ابوي واضح وهو نائب مدير لمؤسسه حكومية في لندن وهو هناك من ١٠ سنين او اكتر تقريبا وامي اسمها دُرة خريجة كلية الاقتصاد وأخوي مصطفى قاري محاسبة وشغال مع ابوي في نفس المؤسسة وماسك قسم الحسابات،
