تاني يوم قلت ما ح امشي لانو صراحه كنت خايفة وخايفة شديد كمان بس ما عارفه من شنو؟، انا معجبه بإياس وكمان متحذرة من الارتباط بيهو في حاجه قوية جواني منجرفه ليهو بس وضعي ما بسمح انا ما فايقة لي حاجات زي دي!
انا عايزة اساعد ناس امي وعايزة اشوف نهايتنا شنو؟، عايزة اهتم بي اخواني وبالذات أحمد وكمال في دراستهم، عايزين نعوض امي ويطلع ليها الدكتور والمهندس ووين ما تقبل تلقانا معاها ووراها وحماها، امي تعبت شديد فلازم نجازيها ونسد ليها لانو لو دي اي مره تانية كان زماااان زماااان خلتنا ومشت شافت حياتها وعاشتها،
انا عايزاهو بس دا ما وقتو ابداً فخايفة شديد من جديتو وفكرة تقدمو لي دي ، سكت طول اليوم دا وما حكيت لي اي زول لا امي لا شيماء وكذلك يوم الخميس اليوم الكنت اكتر توترا فيهو، بس المساء ما قدرت اسكت وقلت افضل اتكلم ، حالياً ما بقدر اوري امي لانو احتمال تشاكلني ، ح اوري شيماء وبي طريقتها ح اخليها توري امي
بعد صليت المغرب لقيتها قاعده في سجادتها خلصت من الصلاة وبتسبح، بقيت سرحانه وانتظرتها لحدي ما خلصت وقالت لي الشاغل بالك يتهنى بيهو! ، ابتسمت وقلت ليها عايزة احكي ليك حاجه..
قالت لي طيب قولي!، قلت ليها ارح نخش جوا وحده من الغرف دي لانو ما عايزة زول يسمعنا قالت لي طيب ارح وقامت طبقت السجادة ومشيت معاها لي غرفها بي هناك وقالت لي بعد دا بتقدري تحكي!، قلت ليها والله يا شيماء في واحد قال عايزني وح يجي بكره، شيماء استغربت وقالت لي دا منو؟، قلت ليها دكتور صيدلي في الكورس، قالت لي انتي نزلتي ليك يومين ياداب كيف يقول عايزك؟، يعني عشان كدا ما مشيتي امس والليلة!
قلت ليها لاااا ما كدا هو شايفني قريب الشهرين ووالله ما لف ودار معاي وقال لي طوالي انو عايزني واصر انو اديهو رقم ابوي، قالت لي اممم طيب كان كدا حلو جدا ودا كان جا ح نعقد عليهو طوالي، قلت ليها شيماااء ياخ افهميني انا خايفة!، قالت لي طبيعي تخافي الا كان بتحبيهو وخايفة يترفض😉، قلت ليها ااا اناااا؟، انا ما بحبو ولا شي هوي هوي ما تزيدي علي !، قالت لي خلاص آسفة بس عايزة اقول ليك امشي هسي استخيري والاستخارة دي افضل تكون بين صلاة الشفع والوتر ولا ما بين نافلة صلاة الصبح وما خاب من استخار ما تخافي ما تتوتري وخليك رااايقة تمام؟، قلت ليها طيب ح استخير مع العشاء، وحاجه اخيره كمان عايزاك توري امي!، قالت لي لالالا وريها براك لو وريتها انا ح تزعل وح تقول انك فضلتيها علي، قلت ليها اممم طيب شكرا ليك يا شيماء♡، قالت لي العفو العفو نحن اخوات ما بيننا شكر، بس هسي دي امشي وري امك عشان نتهيأ لي بكره ونجيب حاجاتنا قلت ليها حاضر وفعلا مشيت لي امي..
لقيتها قاعدة في المطبخ وحارسه اللبن الفي البوتجاز لمن شافتني قالت لي شوفي يا آمنة تاني رجعنا للديون ابوك خلى ١٠٠ الف وفي اسبوع بس مع صرف البيت والادوية انتهت!، قلت ليها ما تعكري نفسك يا امي وانتي لسه عمليتك دي ما هينة ارتاحي وخلي خدمة البيت دي لي انا وشيماء!، قالت لي لو ريحت جسمي بالي لسه شغال..
