"واحد بي واحد تخرب لي اخربها عليك!!"مع جملتو دي حسيت بالخطر وما بعيدة من مصطفى يسويها اصلا نحن الاتنين عنيدين وبتاعين تحديات فما حيحصل خير نهائي في الفترة الجاية دي..، بعد ما الكورس انتهى بقى ماف موضوع ولا جرجرة والأمور كانت ماشه كويس في الصيدلية وفي شغلي عموماً
يوم وانا نازل من الاستراحه بعد ما صليت العصر لاقيت دعاء في السلم لابسة توب ومُبلمة بيهو بس عرفتها كانت مُتْعَبة وباهتة وضعيفة وبطنها ظاهرة بالحمل ، ما كنت عايز اتكلم معاها واعمل اني ما شفتها وح اتخطاها بس اول ما زحيت مسكتني من يدي وقالت لي دقايق ٥ دقايق بس من وقتك يا إياس وعيونها اتملت دموع ، قلت ليها لا المكان ولا الزمن ما مناسبين آسف بس هي استعجلت وقالت لي الموضوع ليهو علاقة بي آمنة!، سكت مسافة وقلت ليها طيب انجزي الصيدلية فاضية تحت!
اتنهدت لمسافة وقالت لي اولا انا آسفة يا إياس!، العملتو ما هين وممكن يدمرك لو انصعت ليهو بس انت برضو غلطت وما سترتني!، لمن مشينا للمستشفى التانية وعملنا الفحص التاني هناك ناس المستشفى شكو انو انا ما متزوجة طيب جبتو من وين؟، معناها انا غلطت ووقعت في الحرام، اترقبونا لحدي بيتنا والحله كلهااا عرفت واهلنا وقرايبنا واختي خطيبها خلاها وامي بقت في لسان النسوان في الجبنات وناس الشرطة بدو تحقيقات معاي ومع أهلي واتسجنت لمدة اسبوع لحدي ما وريتهم كل المعلومات الطلبوها واتوصلو ليهو واتزوجنا غصب ، والصدمة الاكبر ليهم لمن عرفو انو ولد عمي حصلت مشاكل اكبررر وعمي وابوي عايزين يوصلو للقت'ل عديل والعالم كلو انقلب ضدنا، هو شايفني رخيصة وانا شايفاهاو ما راجل وعايشين في نقاشات وتوترات عجيييبة كل الناس نافرة مننا وكارهانا
لي كل دا؟، عشان انت كنت عايز تظهر انك ما غلطان ولو على حساب الباقيين ما ختيت في راسك انو سمعت ابوي ح تنتهي ولا سمعتي انا ولا..، قاطعتها وقلت ليها هو انتي من البدااااية وقت خايفة وعارفة انو بعد ما تمشي وتلعبي مع واحد لمدة دقايق وبعدها تجيبي طفل للحياة بسبب هفوات ولحظات كان الشيطان فيها معاكم وسمعة أبوك ح تنتهي وانتي كمان ح تكوني زيك وزي الجزمة والجزم زاتها أغلى منك ومطلوبة أكتر ،
انتي عارفة دا كلو من اول لحظة بينك انتي وناقص الرجولة داك وعارفة انو دا كلو بي سببك انتي لو ما لعبتي معاهو وبي سبب طيشك وانانيتك وفهمك الغريب دا ولصقتيني معاك يعني مفضلة تخسري الدنيا كلها عشان انا افضل معاك ولو بي حساب نفسي؟
وفعلا اذا انا ما غلطان ما ح اتحمل اغلاط غيري دي حياتي وانا حر فيها واااي انا اكتر انانية منك وبفضل نفسي على الكل!، انتي من البداية كان تستري نفسك وتحفظي شرفك وماف غلطان غيرك وانتي المشيتي ورا غرائزك ونسيتي سمعة ابوك وسمعة نفسك، ماااا تعيشي لي دور الضحية لو سمحتي وما تبرري سااي انا ما ح استفيد في شي ، دا غلطك انتي اتحمليهو كااااملا وما تدخلي فرد تاني لو سمحتي!
