الأيام بقت متشابهة وبايخه ومتكرره وبعد اخر نقاش زهجت من إياس ويئست في فكرة اني اصل للطلاق لانو مصر شديد على موقفو "ما بطلقك يا آمنة ، فترة وح نرجع احلا من اول" دي كانت جملتو البصدني بيها دائما وسامعاهم بقول العقد يوم الجمعة اللهي بعد بكرة!، صراحة انا متضايقة وحاسه نفسي بموت في اليوم الف مرة ، إياس من اول موقف اتخلى عني او هو ممكن يكون انضغط واتجبر بس برضو معقول يجاهد ويعمل المستحيل عشاني!💔
ناس البيت كلهم مقاطعني وما بتكلمو معاي نهائي وما بتجمعنا غير صينية الاكل حتى انا كتير عشان ما الاقيهم واحتك بيهم باكل وجبة واااحدة بس وصراحة وزني قل شدييد وانقسمت نصين ووشي شحب وبقى باااهت شديد، صراحه ما قادرة اكمل نهائي وعايزة اقعد قعدة اخييرة مع اياس ونفهم الحاصل،
بقيت منتظراوهو للمساء كدا فلمن المغرب اذن قلت احسن اصلي طوالي وما أأخرو وفي المسافة دي هو ح يجي ، قمت اتوضيت وصليت المغرب والنافلة واستخارة كمان ودعيت ربنا كتير "انو يلهمني الرُشد" ومسافة ما اسبح واقول اذكاري إياس جا داخل وطوالي قعد في الكرسي القصادي وخت وشو على يدو وقال لي قولي الكلام الفي قلبك احسن من ما ترمقيني بالنظرات دي باقي اليوم!، قلت ليهو اولا صليت؟، قال لي حمدلله ربنا يقبل
قلت ليهو تمام، يلا شوف يا إياس.. ، الطلاق بلجأو ليهو لمن كل الطرق تتقفل وتجوط والحالة يكون ميؤوس منها ، انا شخصيا بعد دا ما قادرة اتقبلك ، بحبك بس ح اواجهة آلآم انا ما ناقصاها وفي غنى عنها ، معاملة أبوي لينا علمتنا حاجات كتيرة كتيرة شديد قلنا ياريت لو عملناها او من هنا لي قدام ح نعملها اولها اننا ما نرضى بالقليل نهائي ما نرخص من نفسنا نهائي ، بعد العملو ابوي ما ح نسامح زول أذانا بي اي طريقة جسدية نفسية وكسر قلبنا وحسسنا اننا عاديين وهمشنا او قال لينا كلمة جارحه ساي ، ما ح نغفر لاي زول رفع يدو علينا قولا وفعلا اللاقيناهو من ابوي ما هين وما ح نغفر لي زول بعدها
وانت؟، أذيتني بطريقة ظهرت في نفسياتي وجسدي شزف بقيت ضعيفة وباهتة كيف؟، بعد زواجك التاني انت ح تكون لي 'نص' نص مشاعر نص جسد نص معامله نص وقت ، وقبل كدا انت كنت لي كامل!، مشاعرك واحاسيسك وشخصك وافعالك ومعاملاتك كلها لي ووقتك كلو معاي يعني حصل شنو؟ حصل نقص في حاجه انا بحبها وما برضى بيها كدا *إما الكمال او الزوال* انا انسانة ما بتليق بي انصاف الأمور انا عزيزة وما ح اذل نفسي وارضى بالقليل♡..
وبعدين في حاجه اسمها "مقدرة" وتحمل ، زي ما في ناس بقدرو يتحملو التعدد وتقسيم الأيام انا ما بقدر على دا انا بحب اي شي يخصني معناها خلاص بخصني انا وماف انسان عندو حق ياخد جزء منو وما بقدر اتحمل تعدد نهائي وما ح احمل نفسي فوق طاقتها واعيش في الم وكَدر ، انت فاهم اي كلمة بقولها كويس وعارف قراري شنو وبالمناسبة الاتنين ح نتألم في البداية بدون ما نكذب على بعض بس بعدين ح نرتاح شديد والله، اتنهدت وقلت ليهو إياس ولآخر مرة انا بقول ليك عايزة الطلاق..
