سلطان العشق ﴿الجزء الاول من سلسلة أصابك عشق﴾

الفصل الواحد والثلاثون

كان يجلس على كرسيه المتحرك يطالع المارة فى الشارع من نافذة غرفته وهو شاردا غير منتبه لأى شئ يدور حوله...

دلفت إليه تتقرب منه ببطء ظنا منها انه نائم كعادته على كرسيه كما يفعل دائما ولكنها تفاجئت به متيقظا لتطالعه بنظرات لائمة وهى تحدثه:-ليه كده يابابا مش احنا اتفقنا انك لازم ترتاح يعنى لا عاوز تنام على السرير ولا حتى عالكرسي.

استدار اليها بنظرات حزينة دامعه يحدثها بلسان ثقيل :-حب..حبي..حبيب....

سبقته هى سريعا تقول:-حبيبة قصدك حبيبة يابابا مش كده..

اومأ لها وهو يتطلع إليها متسائلا ،لتخبره باسمه وهى تحتضن يده تقبلها:-والله بسأل عليها على طول عالعموم حاضر ياحبيبى هسأل عليها تاني واطمنك بس عشان خاطرى حاول تنام الوقت اتأخر وكده غلط عليك ياحبيبي الدكتور قال انه راحة الجسم مهمه للعلاج عشان نخف بسرعة..

أستدار بكرسيه مرة أخرى تجاه النافذة يطالع الشارع بأعين دامعه لتتنهد هى بحزن وهى تغمض عينيها تشعر بالاسف والحزن على ماصار لهم ولأبيها بالاخص لتتجه نحوه تجثو على ركبتيها أمامه تحدثه باسمه بضعف:-مالك بس يابابا اعملك ايه بس ياحبيبى عشان تبقى كويس وترجع زى زمان..

وقتها لم يتحمل وانهمرت دموعه سريعا وهو يحدثها بتعلثم وثقل:-ان..انا الس..السبب..فى ..كل حاجة..ان..انا..كل..كل..ححا حاجة..راح..راحت بسب..بسببى...اخ..اخوك..اخوكى مات بسبب ..بسببى..وف..وفلوس..فلوسنا ضاعت بسبب...بسببى..وان..وانتي..

قاطعته دامعة وهى تهز رأسها برفض:-لا يابابا لا ياحبيبي ماتقولش كده انت مالكش دخل باللى حصل علاء الله يرحمه ده عمره واحنا أمانة ودايع وربنا اخد أمانته واحنا مش بأيدينا حاجة وحكاية الفلوس دى مش مهم ابدا عمر الفلوس ماكانت تمن سعادة بالعكس وبعدين انا مالى فيا ايه ماانا دكتورة اهوه ولا حضرتك بقى ناسي انى دكتورة ودكتورة كبيرة كمان ..

ابتسم له من بين دموعه يطالعها برفق باكيا:-ان..انتى..دل..دلو..دلوقت الل..اللى ليا ..مع..مع انى..ما..مااس..تهالكيش..إن.. أنتى حني.. حنينة عليا..بعد..بعد كل ..قس..قساوتى..وجب..جبروتى معاكى..

قبلت يده سريعا باكية:-ماتقولش كده ياحبيبى ماتقولش كده ابدا انت بابا وحبيبى وكل اللى ليا ودنيتي كلها وبعدين اللى انت عملتوا ده كان الصح واللى انت فاكره قسوة وجبروت ده كان أحلى حاجة حصلتلى ولا انت ناسي ان بسبب اللى حصل بقيت جِد ،اوعى تفكر كده اللى انت شايفه عذاب وجبروت انا حسيته حب ومصلحة انا بنتك ودلعوتك الوحيدة حتى لو كنت انت شايف العكس اوعى تلوم نفسك عليا يابابا اوعى..

طالعها وقتها باكيا والدموع تنهمر من عينيه بقوة ممتنا لها بينما طالعته هى باسمة بضعف وهى تحتضن يده بيد ويدها الاخرى تزيل دموعه الساقطة بندم من عينيه ، ليدلف اليهم وقتها شاب بالعقد الثالث من عمره طويل القامه بجسد رياضي متناسق ذو بشرة خمرية اللون وزوج من الأعين بندقية اللون ذات نظرة حنون باسمة وشعر اسود حليق وشارب اسود منمق كان يرتدى قميص ابيض وبنطال جينز رمادي يحمل بين ذراعيه طفلتهم الصغيرة بعمرها الثانى بيضاء البشرة وذو ملامح ملائكية جميلة وعيون زرقاء اللون وشعر احمر داكن اللون ناعم ورثته عن والدتها ..