رواية معشوقي كلي معاك معاك حتى للهلاك

الجزء 39

كانوا راكان وزياد عند أبوهم بـ المستشفى ولسا يتكلم .. قال ودموعه تنزل على الخبر إللي عرفه عشان زوجته .. : يابوك ترااها ماكانت زعلانه عليكم .. كان هذا تخطيط بس عشان نضغط عليكم بـ الموضوع إللي تعرفونه ..
رااكان : عارف إنها ماهي زعلانه ولا غضبانه .. لإنو عصر الحادث كنت متصل فيها واسولف معاها وتسولف معاي عادي ولا كأنها زعلانه .. وهذا إللي ريحني كثير ..
زياد : الحمدلله ..
أبو راكان : جدكم وين ؟؟
راكان : بـ الخبر ..
أبو راكان : أقصد عمي محمد ..!!
رااكان : ما أدري عنه .. { باقي شايل عليه }
زياد : ترا مكتوب لك خروج اليوم ...
أبو راكان : الحمدلله على كل حال ..
ودخلت عليهم الماسه وفهد وديما .. سلموا عليه وسلموا على راكان وزياد ..
وسولفوا شوي وطلعوا من عندهـ .. لإنو خلاص راح يطلع لـ بيته ..
حجز أبو راشد في فندق جناح له ولـ الماسه بيرتاحون شوي وبعدين بيطلعون
لـ عم الماسه أبو طلال وبيرجعون للخبر بعد يومين .. وديما طلعت ويا زياد وأبوهـ وراكان ..

بعد شهر من الأحداث إللي صارت كلها .. سُلطان وجوهرهـ ووليد رجعوا من عند وسن وحاتم قبل أسبوع وتركوها تكمل علاج ومعاها حاتم وشريفه ..

للشوق لذعه '' والوله طعنته غير
وفـ القلب ما باقي فضـــا للخسـاير
يا ليـل قلّــه كلمةٍ دون تقصير
قطع الوصل << قطع الحشا والضماير

كانت ريناد جالسه بـ الصاله وإهي تناظر موبايلها .. صارت ماتحس بـ حماس إنها تشيله نفس أول .. قبل كان بدر يمسج لها يتصل فيها كل لحظه والثانيه .. ذا الحين ولا شيء منه .. شافها جالسه .. ناظرها ومشى للجناح .. وقفت وإهي تقول بصوت فيه الصيحه : بدر ..!!
في داخله .. لبيه يابعد من قام عن الأرض وقعد فيها ..
شافته وقف وفي خاطرها " مستخسر حتى يرد " قالت : لـ متى هـ الوضع ..؟؟
من غير لا يناظرها قال واهو يقسي قلبه : شـ فيه وضعنا ..!! هذا أفضل شيء لنا .. ودخل وتركها واقفه مصدومه .. نزلت دموعها وجلست على الكنبه تبكي .. هذا مايحس فيها . .! شنو سوت عشان يعاملها كذا ويشوف وضعهم أفضل شيء ..!!!
دخل للجناح واهو متضايق مرهـ دخل ياخذ له شاور واهو بـ داخله " حسبالك شييء بـ كيفيي .. هذا شيء غصب علي .. شيء فوق تحملي .. "

بـ الرياض وميعاد جالسه عند راكان قالت : طيب لا تروح ..
راكاان : شـ اسوي هنا .. ؟؟ بس عشان الإهانات والتقلع ..!!
ميعاد : أبوي مردهـ يتراجع عن كلامه ..
راكان : ماتراجع بسبب وفاة أمي الله يرحمها وكرر علي نفس الكلام .. يعني ماخذ السالفه جد وقلعني للمرهـ الثانيه .. وإذا بيتراجع مستحيل أرجع اـنا .. خلاص أبوي مافيه إلا العافيه وأبوي مايبي إلا جدي وجدي مايبي إلا أبوي .. { ياحياتي حاسس الكل مايبيه :( }
ميعاد : راكان فكر من جد ..
راكان : ميعاد السالفه مايبي لها تفكير .. خلاص .. زياد سبقني واـنا طالع وراهـ .. إللي علي كوني مقلع من عندكم ولا أحد يبيني فيكم .. اتصل أزوركم من وقت
لـ وقت .. واي شيء تحتاجونه إتصلوا فيني .. هذا إللي عندي ..
ميعاد : ما راح تحضر الملكه ..؟؟
راكان : إنتي ربي يوفقك واهو أبوي .. وكل شيء غصب عنك وعن أبوي .. كل شيء بتخطيط جدي وجدتي عشان أبوي لا يتغير عليهم ..
ميعاد دمعت عيوونها قالت : أدري إنو غصب عننا . . لكن مابـ إيدي شيء اسويه .. كنت مفكرهـ بعد زوجي الله يرحمه مستحيل أتزوج غيرهـ .. لكن أبوي وأمي ماتركوني أسوي إللي آبي ..
راكان : كملي حياتك وإنسي كل شيء .. خلاص .. ربي كاتب لك نصيب مع أبوي .. سبحان الله فـ كل شيء حكمه .. وعندك هوازن وسارهـ .. { واهو يوقف ويبوس راسها } ربي يوفقك ويسعدك ..
ميعاد : ويوفقك ويسعدك إنت مع إللي تتمنى ..
راكان لمع فـ عيونه الدمع وقال : أدعي لي .. محتاج الدعاء أـنا ..
ميعاد حزنانه عليه تشوفه وحيد بهـ الدنيا .. زوجته غصب عليها بـ الخارج وأبوهـ وجدهـ حاقدين عليه ولا يبونه .. غصب تبكي على وضعه : مايحتاج توصيني .. مو عاد تنساني ولا تتصل ..
ضحك وقال : إنتي أحلى شيء بـ الرياض .. كيف أنساك ولا أتصل ..
ضحكت وقالت : مو قصدي ذا الحين .. أقصد إذا رجعت وسن بـ السلامه إن شاء الله ..
تنهد وقال : ساعتها إذا ذكرت منو أـنا كويس مني ..
ضحكت وقالت : وتقول ما أـنساك !!
ضحك وقال : ما أحد يلومني فيها . . يلا مع السلامه .. وطلع من عندها وسلم على جدته إللي ماتكلمه كلش ومر على أبوهـ بـ الشركه وسلم عليه ومر على جدهـ إللي عطاهـ كم خناقه لكن من الواجب يسلم عليه .. وطلع من عندهم للخبر .. موادع الرياض للأبد بـ نظرهـ .. وإذا بيجي لها راح يجي زيارهـ يومين ويرجع .. أبوهـ وجدهـ مايبونه إذا ماطلق بنت سُلطان .. واهو مستحيل يسوي الشيء هذا .. مابعد فقد عقله عشان الشيء هذا .. جدهـ وأبوهـ إللي غلطانين مو اهو .. هذا إللي كان في باله ..