دخلت اريج الي توجهت للبنات الي يضحكون و الواضح يطقطقون على مين : بنات
رفعوا انظارهم لها بأبتسامه و وقفت ديم تقبّل خذها : سمّي يا عسوله ، ايش الجمال هذا و الكشخه
ضحكت اريج تضرب يد بنتها ال تتسلل لـ يدها لان اسوارة اريج تاخذ العقل و ديم اكثر انسانه مهوسة اساور : جدكم يبيكم كلكم
شتت ورد انظارها وهي تحس في هذا الوقت انها بالغلط جات إلا ان اريج ابتسمت : ورد حتى انتِ ! مو تبين تسلمين عليه
هزت راسها بإيه : بس يمكن يبي بس حفيداته
مدت ديم يدها : تعالي حبيبة قلبي مين يشوفك و مايحبك
اخذت اريج نفس تلف لـ منال : منال روحي معهم
زمت العنود شفتها وهي تاخذ جوالها و تطلع من المجلس
اما ليال و أنهار كانوا يبتسمون لهم بهدوء
_
خرجوا كل الرجال و بقي بس قاسم يتوسط المجلس و رفع نظره من دخلوا كلهم و اصواتهم تسبقهم و ابتسم من زينتهم و الاسوار الي وزعها عليهم بيد كل وحده : ماشاء الله تبارك الله !
رفعت نظرها من نطق بجملته وهي ترفع نظرها ، و عقد حاجبه يشير لها : انتِ زوجة أدهم؟
هزت راسها بالايجاب وهي تتقدم تقبّل راسه : وش اسمك؟
ورد بهدوء : ورد
نفى يشير لها بعكازه على طول جسدها : اسمك كامل
اخذت نفس تشتت نظرها : ورد طلال ماهر آل حازم
اعتلت الصدمه ملامحه و وقف على حيله يشد على عكازه : ماهر !
عقدت حاجبها بأستغراب : ايه ماهر جدي
عضوا البنات شفايفهم لان جدهم مصدوم بشكل ترك يده ترجف بشده على العكاز و ورد المستغربه توقف قدامه : وينه جدك !
ورد : الله يرحمه
لف انظاره للبنات بحده وغضب : كلكم برا بسرعه !
ماعرفوا يتصرفون من شدة حدة جدهم و خرجوا يتركوهم لوحدهم
نفى قاسم يجلس و يمسك يدها يجلسها يمه : حي حي
عقدت حاجبها تنفي : مات و انا صغيره
قاسم : يدور عليك هو
وقفت بذهول : مايعرف اني موجوده اصلًا شلون يدور علي !
مسح قاسم وجهه بتوتر : تعالي شوفي
مد الجوال لها بعد ما فتح محادثاته مع شخص اسمه نقطه : رسلي صورتك و انتِ صغيره اسمعي المقطع الصوتي
اخذت الجوال بيد راجفه و مشاعر مماثله تمامًا "قاسم شوف شوف هذي حفيدتي توي ادري عنها توي ادري ان عندي حفيده ، بعد حياه عشتها ثمنيه و ستين سنه دريت ان عندي اجمل حفيده بالعالم ، ما ادري عنها بس انها الحين كبيره بـ كبير ديم تقريبًا ، ابي اتعرف عليها ابي احصلها قاسم دور معي دور معي عليها "
غيمت عيونها و رجفت يدها اكثر من اول و حمّرت ملامحها ، جدها حي و كمان يدورها؟ و مو يدورها سوء لا يدورها لانه يبيها و يبي يتعرف عليها : بس كيف !
رفع قاسم كتفه : اضطر يكذب على الكل انه مات و سافر و من وصلته صوره لك من رقم غريب و انه عنده حفيده صار يدور عليك له شهر يدور عليك و ماحصلك ، رسل ناس بكل مكان يدورن بس ماحصل لك اثر و هذي فعايل أدهم الي اخفى و جودك بسلطته عشان يحميك من طلال وغيره
فتح أدهم الباب بسرعه وهو توتر من قالت له ديم كل شي ، و شافها تتأمل جده وهي تبكي : ورد !
صابه الخوف ان جده غلط عليها بشي وسكر الباب يجلس على ركبه قدامها يمسك يدها الراجفه و الخوف واضح بعينه لانه قل ادبه على جده بشكل هو يكرهه و ماعاد يبي يقله : صار شي طالعيني !
لفت انظارها المحمره له بأبتسامه وعيونها كلها دموع : أدهم عندي جد !
وسع عينه بذهول يلف انظاره لجده المبتسم يربت على كتفها : شلون
ورد وهي تمسح دموعها : يكلم جدي قاسم يقوله عني يقوله توي ادري ان عندي حفيده و انه يبيني ، مستوعب يا أدهم يبيني خير مو شر مثل طلال
كشر قاسم مباشره : طلال ابوك مدري مين يهجده ، مسكناه و ماعقل الله يعينك عليه يا بنتي
اخذت نفس تشد على يد أدهم : تدري اني مره سعيده ! مره مره
ابتسم يقبّل يدينها و يوقف يوضح طوله وهو يعدل ثوبه : صابني الهم ظنيت صار شي ، زين انه شي يعدل المزاج
نفى قاسم وهو يلف انظاره لـ ورد : اذا انتِ زوجة اكبر احفادي انا راضي تمامًا
ضحكت بوسط دموعها وهي توقف تمسحها بـ المناديل الي مده أدهم : خلاص نوقف بكي؟
هزت راسها بإيه و لفت انظارها لـ قاسم : اكيد البنات خافوا نناديهم؟
هز راسه بإيه : يلا يا أدهم كلم ديم و اطلع
كانت انظاره على ورد الي كانت عينها بعينه و من ابتسمت وهو اخذ نفس يحاول يمسك ابتسامته الي اول مالف وضحت على وجهه
_
عرفت عنود عن كل شي و انهارت ضحك ان قاسم عصب على ورد : محد يحبها مافيها قبول !
كشرت جُمان : فيها قبول غصبًا عنك شايفه نفسك انتِ ، انتِ و الشيطان تساوون ابليس مالت عليكم تفكيركم واحد وجع
ضحكوا البنات كلهم إلا منال الي تنهدت ماتدري وش تسوي بأختها : عنود لاتغلطين على البنت خلاص
عقدت عنود حاجبها : سحرتك يعني حتى انتِ ؟ كيف تدافعين عنها قدامي كيف !
ردت ديم على جوالها تبعد عنهم : وش صار؟
أدهم : ماصار شي يناديكم روحوا
اخذت نفس تكسر الخط تتوجه لهم يدخلون
_
ابتسمت ديم مباشره من شافت قاسم الي يضحك مع ورد الخجلانه : جدي؟
لف انظاره لهم يوقف وهي بجنبه : اعذروني طردتكم اتعرف على حفيدتي الجديده
منال : يعني ماتبينا؟
نفى يمد يده يقربها منه : يعني ماتبين تسلمين؟
ابتسمت تقبّل راسه و يده و تبعد عشان البنات يسلمون
ابتسمت شديد الابتسامه من قربت ديم : هلا بالزين و الجمال يا اهلًا
ضحكت من حضنها هي غير عن باقي البنات وابعد يأشر لهم يجلسون حوله يتكلمون
_
الرجال اغلبهم مشوا وشالوا حريمهم وبقي القليل و الاقرب للقلب وجلسوا كلهم بالجلسه الخارجيه : نواف فز جيب الشاهي ، جهز امك تقول
وقف و رفس يزن الي كان يرفع بحواجبه وهمس بغضب : ورع
ضحك عمر الي كان يشوف حركات يزن المو معقولة : يزن الحين كيف الدراسه معك؟
كشر يزن يضرب عمر : متعمد على الوتر الحساس انت؟
نفى عمر ببرائه : اجرب اضرب بنفس قوة و جُمل امي
ضحك يزن مباشرة و جا نواف يصب للكل شاهي : يا يزن شيبت و انا عمك متى تتزوج
شهق يزن بصدمه : عمي عبدلله انت الحين تارك كل الموجودين مركز علي ! طيب شوف نواف تراه اكبر مني
نفى عبدلله وهو يعرف كيف يجيب يزن : ادري بس مو عاقل مثلك انت عاقل و فاهم هو سبك
تنحنح يزن بثقه : بعتبرها مدحه الله يطولي بعمرك
ضحكوا كلهم من كشر عبدلله يشرب الشاهي و يضحك معاهم
وعند زياد كان بعيد عنهم كل البعد يهوجس وتمتم بهمس : اكيد انا مسحور ليش احس كذا ، يمكن غِيم سحرتني ليش اتضايق ، ايه ايه سحرتني متأكد انا ولا شدخلني هي تتزوج و انا احس بضيقه ، يوه لازم اروح لشيخ يقرا علي ، حسبي الله عليك يا غِيم اوريك
_
انتهى يومهم بس انتهى يومهم بس هالمره و ورد متأكده ان الجاي بيكون افضل و احلى لحياتها هم رجعوا لبيتهم بعد تعافيها و الحمدلله و أدهم كل صباح بشغله ما يرجع الا العصر و ينام الين العشا ويصحى يجلس معاها شوي ثم ينامون زي كذا روتينهم كان مُمل لان أدهم كان مضغوط
وهي من صباحها بالجامعة بس ماتتأخر بالرجعة كثير ، وكانت امورها كلها سليمه..
مسكت الجوال بتوتر وهي قدام أدهم الي يجلس قدامها : رسل رقمه !
ابتسم أدهم يمسك يدها الراجفة : ما قاله صح؟
نفت تشد على يده : يقول كلميه و فاجأيه
اخذت نفس تحط عينها بعينه و من ابتسم لها هي ابتسمت تضغط على رقمه ، حاوطها يقربها له على السرير لحد ماصار ظهرها يلاصق صدره و وراسه عند عنقها يقبّله بهدوء ، رجفت مشاعرها من سمعت صوته المستغرب : الو؟
لف انظاره لها وشاف دموعها الي تنزل بكثره : جدي
كانت نبرتها راجفه بكشل هو ماتوقعه ابدًا بشكل ترك حتى قلبه يرجف معاها ، وشد عليها يضمها لعنده اكثر ، و عقد ماهر حاجبه : مين؟
ارخت راسها للخلف على كتفه تغمض عيونها تاخذ قوتها منه : انا ورد يا جدي اخت سيف و حفيدتك
وقف ماهر بصدمه و لف انظاره المذهوله لحبيبة قلبه الي عقدت حاجبها تناظره وغطى وجهه بيده من نزلت دموعه تمشي بين شيب وبياض دقنه : ورد انتِ؟ ورد حفيدتي؟
بكت وهي تلف على أدهم تحشر راسها بصدره و تبكي مثل ما بكى ماهر بضعف : قالوا لي ضـروك ضـروك يا بنتي ضروك بكـل شي ! حرمـوك من حياتك؟ كذبي كلامي طلبـتك قولي لا مو كذا قولي لا انا عشت حياتي يا جدي ، لاتكـسريني فيـك يا بنتي طلبتك
شدت على تيشيرته وهي تشهق بطريقه خلته ياخذ الجوال يحطه بأذنه وعقد حاجبه بألم من بُكى جدها و كيف نبرته الراجفه تطلبها : اعطيها وقت و تكلمك
نفت ورد تهمس : لا تسكر الخط لا
هز راسه بزين وهو يقبّل راسها يترك الخط مفتوح بس يعطيها وقت تلم شتاتها
توجه ماهر لـ زوجته الي عاش معاها اكثر سنين عمره مو زوجته ام طلال لا ، هذي زوجته الي اخذها بعد طلاقه من ام طلال اخذ ذهب زوجته و شريكة حياته : ذهب ذهب ورد تكلمني ، حفيدتي عرفت عني يا ذهب تعرفني هي !
حضنته ذهب بـ بيدها الي تملئها التجاعيد دليل على حياتها الطويله و عبورها مشقات الحياه : اذكر الله
بكى يحط راسه بحجرها و دموعه تاخذ طريقها بين تجاعيد وجهه تعلن عدم احترامها لـ كبر سنه وشيبه : لا إله إلا الله لا إله إلا الله
