" في حروب الارواح مالقيت الا انتِ يالروح الندية "

البارت الرابع والعشرين

بيت ابو سلطان
طلعت الرّيم بسلة الغسيل وهي تتأفف : افف يمه خلاص تعبت !
ام سلطان : خلتس حرّكه وسنعة يابنيه
الرّيم وهي تنشر الغسيل : يمهه اليوم صدق في عزيمه في بيت ابو راشد ؟
ام سلطان : اي به عزيمة
الرّيم : وش المناسبة ان شاء الله
ام سلطان : والله يا امك ولدهم راشد رجع ومعه بنته صبا رجعوا اليوم الفجر
الرّيم : طيب بنروح ولا ؟
ام سلطان : إلا بنروح مير تجهزي
هزت راسها وهي تكمل نشر
دخل ابو سلطان وسلطان
ابو سلطان : بسم الله ولجنا وبسم الله خرجنا وعلى الله ربنا توكلنا يالريّم
الرّيم وهي تحب راس ابوها : سم يبه
ابو سلطان : تحبين الكعبه يابنيتي دوك هالبشت علقيه وانا ابوك وجهزوا غداكم
الرّيم : ابشر
ابو سلطان : بسم الله بك شي يارجال
سلطان وهو منزل راسه : لا يبه
الرّيم : راسك وراه تسذا ؟
رفع راسه : انا مو اخوك الكبير حبي راسي
انفجروا ضحك
الرّيم وهي تضحك : حبيت الثقه اقول مناك بس
ابو سلطان : الله يصلحك ياوليدي
سلطان : والله انك ماتستحين يالقردة
-
بيت ابو نسرين
دخل ناصر وهو ينزل شماغه ويجلس وبداخله دوامة تفكير خايف لو بنته تعرف بحقيقتها هل ممكن تسامحهم ؟ قطع افكاره صوت نسرين
نسرين بأبتسامة تُزين ثغرها : يبه
ناصر بأبتسامه باهته : عيونه وقلبه تبين شي ياوحيدته
استحت من مدح ابوها : لا بس شفيك تعبان احسك مو على بعضك
ناصر : لا يابوك بخير انا مير شايل هم عزيمة ابو راشد
عقدت حواجبها : وليش شايل هم
ناصر : خايف عليك تجلسين لحالك
نزلت راسها بأبتسامه باهته : يبه ايش ماتكمل كلامك خايف علي لأني عاجزه صح ؟!
قام وهو يجلس عندها : لا يابوك مب قصدي ذا الكلام ولا عاد اسمعك تقولين ذا الكلام
رفعت راسها وعيونها بعيون ابوها : يبه ليش ماكملت كلامك ترا مافيها شي ليش محسسين المشلول انه عاجز
بسرعه استوعبت كلامها واطلقت ضحكاتها الساخره على نفسها : وهو فعلاً عاجزة
ناصر : افا ياذا العلم تشكين فا أبوك انه يحسسك بذا الشي !؟
مسحت دموعها : بس كل الناس نظراتهم كذا
ابتسم وهو يحتضن وجهها : بس انا مب كل الناس انا ابوك ابوك اللي يخاف عليك من ظله ابوك اللي يخاف عليك من قطرة المويه انا ابوك يانسرين
مسكت يدينه وهي تبعدها وتحضن ابوها : الله لايحرمني منك
مسح دموعه وهو يبتعد عنها : انتِ منتِب عاجزه هذاك جالسه تتحسنين وتقدرين تحسين برجلك وتحركينها على الخفيف ان شاء الله شهر شهرين بالكثير واشوفك تركضين قدامي
ضحكت وهي تناظر في ابوها : الله لايحرمني منك ومن حسك
ناصر : ولا منك
-

بيت ابو راشد تحديداً الساعة ٢:٠٠ الظهر
سُعاد : لا لا مو هناك حطه هنا
سليمان : خاله وين احطه هنا بيضيق على المدخل
سُعاد وهي تمسك راسها : ياوككك خلاص حطه اجل هنا نايف وين ناده يجي يساعدك
نايف وهو شايل الخروف : هنا يمه امري
سُعاد وهي تغطي عيونها من الشمس : اربط الخروف وتعال عاون اخوك
نايف : ابشري نجود يانجوودد
نجود وهي طالعه : هاااااااهه
تصنموا مكانهم من صراخها
سُعاد بصدمه : وجعه انتِ بنيه ولا
سليمان : الله يخرشك
نايف : تقلعي جيبي الحبل
نجود وهي تسحب الحبل : افف طيب
تقدمت وهي تمد يدها : هاك
نايف وهو يفك الخروف عليها
نقزت وهي تصارخ وهم يضحكون منها
نايف : خلاص بمسكه
نجود وهي تبكي : انقلع والله ما اعطيك الحبل
سُعاد وهي تضحك : حرام عليك تعالي يا امك ماعليك منه ماراح يفكه عليك
سليمان وهو يضحك : اثاريك بكيه يا البكايه
سُعاد : ولد خلص شغلك وانت اربط الخروف وتعال عاون اخوك واحنا بندخل
سليمان : اي ادخلوا واحنا خلونا نموت هنا
سُعاد : خلصوا شغلكم قبل يصحى ابوكم وانتِ تعالي ياحبيبتي بنعاون امك والبنات بالمطبخ
-
في المطبخ
سُلاف : هذا كأنه صراخ نجود ؟
هند وهي تحط الكيك بالفرن : هذي من يوم ماعرفتها وهي تصارخ ماتهجد
سُلاف وهي تضحك : صادقه
العنود : بس انتِ وياه لحد يتكلم عن بنيتي
دخلت سُعاد وهي حاضنه كتف نجود : ادخلي ادخلي
نجود وهي تركض تحضن امها
العنود بأستغراب : بسم الله وشبك ياحبة عيني
سُعاد وهي تضحك : العيال فكوا عليها الخروف وصاحت
انفجروا ضحك عليها
العنود وهي حاضنه بنتها وتضحك : خفتي

اردفت وهي تمسح دموعها : اي اي اضحكوا
هند : اهههخخ بطني يعورني من الضحك ماتوقعتك تخافين منها
سُلاف وهي تضحك : صدز انتِ تخوفين بلد ماتخافين
ضحكت نجود
العنود : يلا يلا كل وحده على شغلها وانتِ يا ام راشد روحي ارتاحي رجولتس تعورتس
سُعاد : لا ماتعورني توني بنت بزهرة شبابي
ضحكت العنود : عز الله كدينا خير يلا يازهرة شبابك تعالي عاونينا
سُعاد وهي تفصخ برقعها : هند اخذيه وحطيه بغرفتي يلا شسوي الحين
العنود : خذي ذا واحمسيه
سُعاد : سُلاف طلعي القدر واحمسيه انا بروح امدد رجولي وجعتني
العنود : هاوو ياسُعاد تعالي يازهرة شبابك
سُعاد : مافيني حيل خلي نجود تكمل
نجود وهي تجهز الفناجيل : وانا وشدخلني !
-
اذن العصر وقام ابو راشد يوضي للصلاة سحب عكازه وهي متوجهه للحوش يشوف عياله : يلا يا عيال صلاة صلوا وكملوا شغلكم
نايف وهو رابط ثوبه على خصره : يبه الخروف متى نذبحه
ابو راشد : عقب صلاة العصر نبدا ذبح
راشد : ابشر يلا اقفوا بنروح نصلي ونكمل
-
بيت ابو سلطان
ام سلطان وهي لابسه جلال الصلاة : الرّيم يا امك قومي صلي
الرّيم : ادخلي يمه ادخلي
ام سلطان بأنبهار من طلة بنتها : وش ها الجمال حصنتك بسم ربي بس مو كأنه بدري على الكشخة ؟
الرّيم : بالعكس يمه عشان نكون خالصين
ام سلطان : طيب صليتي
الرّيم : لا بصلي الحين