" في حروب الارواح مالقيت الا انتِ يالروح الندية "

البارت السابع والاربعين

" بيت ابو راشد "
نجود وهي تلعب بالمطر ومعها صبا
طلعت مايا بشنطتها وهي تحس مالها وجه بعد اللي صار لراشد بسببها
استوقفت نجود وهي تناظر لمايا اللي منزله راسها وتشيل شنطتها
نجود : بتروحين ؟
بلعت ريقها مايا بخجل : اي
نجود : احس ماله داعي تروحين هالشيء ربي كان كاتب انه يصير سواءً منك ولا من غيرك ف انا اقول رجعي شنطتس وادخلي
مايا : لا بروح لبيت جدي بجلس كم يوم وارجع
تقدمت نجود وهي تمسك يد مايا : مايا اتركي شنطتس وادخلي داخل وبنفتح صفحة جديدة معك بصراحة احنا ماشفنا منك انتِ وامك شر ودنا نفتح صفحة جديده ونصير مثل الخوات شرايك ؟
مايا بفرح : يشهد الله انه ماعمري كرهتكم صح حقدت عليكم بس ماكنت انلام وانا ودي اروح لبيت جدي كم يوم وارجع
نجود با ابتسامه : على راحتك ، يلا صبا ندخل
طلعت مايا وهي تطلع شنطتها معها بلعت ريقها من شافت راشد اللي نزل من سيارته وكان يناظر فيها ببرود
راشد : عساك تذوقين اللي ذقته
مايا : راشد !
وقف راشد وهو ينزل يده من على باب بيتهم اقتربت مايا منه : راشد قسم بالله ماكانت نيتي قشرا مثل ما انت تحسب والله كنت منقهره منكم ومن ظلمكم لأمي وكنت ابي امسك عليك أي مصيبه حتى لما شفت صورتها ماكنت ادري انها طليقتك !
راشد : خلصتي ؟
نزلت أنظارها للارض وهي تهز راسها بأي
راشد وهو يرفع سبابته : قسم بالله انك مو كفو احد يوقف معتس غرفتي اللي تخليت عنها شهور عشان تقعدين فيها طلعتي مو كفو بنتي اللي امنتها عند وحده مثلك انتِ تعمدتي تخربين حياتي وانا محذرتس من الدرج لاتفتحينه وبكل سهوله دعستي على كلامي وسويت اللي تبينه !
بكت بغصة وهي تشاهق بخفه
استرق نظراتها لها وهو يحس بشعور غريب اجتاحه حس انه رحمها
راشد : امسحي دموع الشر هذي بس !
مايا بعدم تحمل : ياخي كل تبن شوي !
وسع عيونه بصدمة وهو يسحبها من يدها : عيدي اللي قلتيه ؟!
تأوهت بألم وهي تناظر بعيونه اللي تطلق شرار : ماقلت شي !
دفها بخفه واردف بنبره حاده : غطي شعرتس جعلهم يغطونك بكفنك !
ارتجفت خلاياها من الدعوة سحبت شنطتها وهي تطلع لبيت جدها اللي قدام بيتهم

حوريه : اقول يا الهنوف متى بتجهزون للعرس تراه قرب والعروسه ماجهزت
الهنوف بتذكر : يوههه تو نسيت ان وراي عروسه اليوم ان شاء الله بنروح
الجدة ليالي : اي مير العرس قرب ماظنتي تتخلص الا اذا اسرعنا !
افنان بصوت شبه عالي : فوق هذا فستان العروس بنقعد ندجّ بالسوق على ما نلقى
حست با الانحراج وهي تشوف امير يناظرها وهو يضحك
حست انها مو قادره تنزل عيونها من عليه حست انها لوهله حس با الانجذاب له !
امير وهو ياكل زيتون : ماعليك يا اخت زوجتي مرتب كلشي بكرا ان شاء الله بنروح للرياض نجهز فستانها
قاطعه ضربة عصاة جده فز امير بخوف والم
امير : وش سويت !
الجد جابر : ياقليل المروة تتاخذها وانتم مابعد اعرستوا !
امير : لا اله الا الله ! ياجدي مملك عليها وبعد كم يوم عرسنا وش له تطق فيني
الجد بعدم اعجاب لكلامه : لا لا هالشي ماهوب صاير سُرعان مارفع عصاته وهو يضرب فايز بخفه : وانت تتخليه ياخذ بنتك بدون مايعرسون ! وش بيقولون عنا الناس !
شرق فايز بالشاهي وهو يكح : اعوذ بالله يبه علامك حولت علي وبعدين بنيتي مب مع احد غريب مع ولد عمها زوجها مايحتاج لا زواج ولا شي خلاص ملكوا
الجد جابر : اني داري انه رجلها مير العربان وش بيحكون عنا لا روحت معه للرياض قبل عرسها بعدة ايام والله لينقدون علينا اسمع يارجال يا انك تاخذهم كلهم للرياض ولا تقعدون هنيا ماعندي خرابيط اخذ مرتي قبل العرس عشانا مملكين اوحيتني ! ( سمعتني )
امير برضاء : ابشر اجل اجهزوا بكرا ان شاء عقب صلاة العصر مشينا للرياض
ماجد ابو عُدي : انا مب رايح بجلس مع ابوي وبجهز حاجات الزواج من سيوف وعزايم وذبايح و عود وكلشي يخص العرس
فايز ابو جُمان : حتى انا بجلس معكم انا وصقر وعُدي وامير يروح معهم
صقر بتأفف : ياعيشتن قشرا ابك انا وين اروح لامنكم قعدتوني بالديره بذا الحر خلوني اروح معهم
ابو عُدي : تبينا نخطبلك ؟
كح بخفه وهو يستعدل جلسته : اءءء والله ي ياليت ت تخطبون لي لأني مليت من العزوبيه
انفجروا ضحك وهم يشوفونه متحمس
حورية : حاط عينك على وحده ولا تبي على نظري ؟
صقر بحماس : على نظرتس يابعيدي. بس متى ؟
رفعت يدها وهي تشرب قهوتها : لامنها حجت البقر على قرونها
انمسحت ابتسامته : بالله صادقه محمسين واخر شي لاحجت البقر على قرونها
الجدة ليالي : ماعليك من امك انا بخطبلك وش رايك ؟
صقر : تم ابشري بس منهي ؟
الجدة ليالي : عندي لك وحده باضا وشعرها حدر ذنبها تبيها مير انها مزيونه قليلة الاصل تهبلللل ياوكك يازينها تبيها ؟!!!
صقر : وش اسمها ؟
الجدة ليالي : مدري 
عقد حواجبه وهو يناظر ف العيال : كيف ماتدرين البنت شسمها ياجدة ؟
الجدة ليالي : مدري ما اعرفها مير بعرس امير وجُمان بعزمها واخطبها لك منها جمعنا راسين بالحلال ومنها نخطبلك
انفجروا يضحكون وهم يشوفون وجه صقر اللي مايدري هي صادقه ولا تكذب عليه
فزوا بخوف من دخول مايا عليهم وهي تسكر الباب الخارجي ب اقوى ما اؤتيت من قوه
مناهل وهي تغص : اعوذ بالله ماء ماء !
الهنوف وهي تسحب المويه لا اختها : بسم الله عليك !
الجد جابر بفزع : وشفيتس امتس بها شي ؟
مايا بهدوء مرعب : لا مافينا شي بس بجلس عندكم ولا بتطردوني انتم بعد ؟!
حورية : عدلي اسلوبك واقعدي وقولي وش صاير بك !
مايا بعدم اهتمام : جدي ابوي ماراح يجيني ؟
استقفلهم الصمت وهم يناظرون بعض با استغراب من سؤالها لأنها ماقد سألت عن ابوها
حس الجد بشي وهو يناظر بعيونها : ماقد سألتي عن ابوتس من يوم وانتِ هالكبينات ( وانتِ صغيره اتوقع تنقال كذا )
اردفت بصوت متحشرج والدموع عالقه بعينها : واذا قلت اني بسأل عنه بتعاقبوني بتحرموني منه ؟
الجدة ليالي بخوف : لا ياقليبي ماراح نحرمتس منه ولا نعاقبتس ذا ابوتس ولتس حق تسألين عنه نفس ماهو يسأل عنك
مايا وهي تمسح دمعتها من خدها الناعم برقة : انا بروح لغرفة امي فوق لاتقولون للخدم ينظفون غرفتي
نزلت شنطتها وهي تدخل داخل البيت
-
( بيت ابو راشد )
سلطان وهو عند شباك هند تحت : انا مليت كلينا تبن لين قلنا بس كلما حددنا العرس كنسلتوها وشبلاكم انتم !
هند وهي تهديه : ماعليه خيره ان شاء الله
سلطان : طيب سولفي لي ، وين تبين نروح لشهر العسل ؟
هند بحماس وتفكير : تصدق مدري بس شرايك نروح لندن احس عاجبتني ب الحيل!
سلطان وهو يضرب الشباك بحماس وفرح : ابد ابشري لندن لندن
ضحكت وهي تلعب بشعرها
سلطان ب انهبال : والله لو اقدر اخذتس بعبايتس خذيتس وانتِ ماتشوفين الدرب
هند : لأنك حيوان
سلطان : افا !
هند : امزح امزح ترا انا مليت كلشي جهزته بس باقي فستان الزواج !
سلطان : وشرايك نروح نشتريه ؟
فزت هند بحماس : صدقق ؟
سلطان : اي صدق