عشق الوصب

مقدمة عشق الوصب

#عشق_الوصِب

بسم الله توكلت على الله
مقدمه لي #عشق_الوصب...
رواية كوميدية رومانسية حزينة💖..

بقلمي انا الرائحه الطيبه...
عندنا اكتر من عيله حنتعرفو عليها ع السريع اول عيله تكون هيا عيله عبدالحكيم فرج ال**** مواليد 1964وحيد عيلته كل طموحه يغير من حالته الماديه لي ابدا مش راضي عنها ويبي يحسنها بأي طريقه شخص اناني شوي ومش هامه حد عنده لاوادجو وارثه من بوه لاوادجو غسل سيارات وتصليح في نص طرابلس قريب ع وين يسكن متجوز من زهرة زواج تقليدي زهرة تكون ابله دين في مدرسه مواليد 1968 عبدالحكيم مكرها في عيشتها حرفيا وكأن هي السبب في كل مصايبه ومش مضيع فرصه فكل مشكله بينهم عشان يقلها..."نهار احرف اسود يوم خديتك كبرتيني قبل عمري انتي وفرختك بمصايبكم"...ثمرة زواجهم لي مصبره زهره ع عيشتها معاه اسمها نرجس مواليد 1990 متخرجه حديثاً من كليه القانون شخصيتها مرحة بس متخشش في اي حد بسرعة تبي وقت عشان تتعود على حد وتكون ع طبيعتها مواصفاتها ....متوسطة الطول جسمها مائل للضعف بس معدل ماشي مع قدها حنطيه مايلة للبياض عيونها واه من عيونها حرفيا عيون غزال الريم 🦌 واسعات ولونهم عسلي ورموشها طوال وداكنات وخشمها واقف وصغير كان عندها مبسم حلو هلبا ومزين خدها شامة صغيرة كانت تحت عينها تقريبا والباقي نعرفوه اكتر من خلال الروايه وهادي تكون اول بطله فروايتنا....عيله خيري النزام تتكون من ثلاثه شباب....الكبير والكبير الله اسمه محمد مواليد 1980 متجوز بنت عمته عبير مواليد 1985...الثاني إيهاب مواليد 1982خاطب آية بنت عمه..الثالث فيصل مواليد 1987 اعزب...واخر العنقود دلوعة خوتها وبطلتنا الثانيه مواليد 1991 هديل تدرس صيدلة سنه ثانيه هيا المفروض سنه ثالثه بس بعد خدت شهادة الثانوية صار حادث خيري وخديجه امها وبوها توفو فحادث سير شنيع من ثلاثه سنوات اول سنه مقرتش من حزنها عليهم بس خوتها شجعوها تكمل وساندوها لانه الاصغر وتأثرت هلبا بوفاتهم هيا وخوها فيصل.....شخصية هديل متضربة شوي😅متقعدش ع حال واحد ديما تضحك نادرا ما موقف يزعلها قصرونه طولها 148c جسمها معبي بس كل شي في مكانه الصحيح مافيش لاتنيات ولامنحنيات😀 بيضه وعندها غمازتين في خدوها وشعرها كيرلي لونه بُني من لون عيونها وبالمختصر كانت بيبي فِس(وجه طفولي).......
(دهشتت🙂نشاءالله تخيلتو الوصف بس مع هادا حنحط صور للشخصيات)........

والعيلة لي بعدها تكون عيلة الدكتورة فادية شخصيه ترملت فعمر صغير مواليد 1971 ام لبنتين...خولة بطلتنا الثالثه خريجه لغات مواليد 1990 متحصله على وظيفه مُدرسة لي جانب قرايتها لي قاعده تكمل فيها في الدراسات....خولة كانت فعلا بكل المقاييس جميلة جميلة متوسطة الطول ليست بالقصيرة ولا الطويلة كانت وسط...وبشرتها بيضا عيونها من لون السمي(زرق) خشمها واقف وفمها صغير شوي اما شعرها كان يضرب لتحت خصرها جسمها كان حلو هلبا من الاخير خولة فتاة احلام كل شاب وإليكم شخصية بالهجمال كيف حتكون...؟...شخصيتها واعره وشوي مغرورة مع الناس لي مش قريبة منها.....واها عصبية شويتين😅ياسر لباقي تعرفوه من خلال الرواية ان شاء الله
.....البنت الثانيه تكون نيرمين مواليد 1993 سنة اولى طب اسنان حتى هيا جميلة بس عيونها لي بوها خضر ومن الاخير لفرخه شقرا وطرف (تو نحط صورتها حتى هي😩)....
زي ماذكرت بوهم متوفي مع هادا عمتهم وعمامهم مش مخليينهم قاعدين فحوشهم معززين مكرمين متواصلين مع عيله بوهم لي معاهم في نفس الشارع.......علاقتهم بخوالهم مش اوي نزيدو نعرفو لقدام......
اخيراً بنختم بعيلة مش متواجد فيها الا شخص واحد شاهين فرج الزاهد مواليد 1979 صاحب شركة تصدير واستيراد الألعاب...اي العاب وماخفيا كان اعظم...
شخص معروف...
ممكن لو سألتو عليه شخص سوي مش حيعرفه لانه معروف عند فئة معينه من الناس وحيكون ليه اثر قوي في حياة احدى بطلاتنا.........حنوقف لعند اهنا باقي شخصياتنا اكيد حتبان شوي شوي الروايه بآذن الله حتكون معظمها من خيالي واحداثها تبدا من سنة 2012.........
____بقلمي الرائحه الطيبه____

الصلاة على النبي.....