عشق الوصب

الجزء 27

#عشق_الوصب
#الجزء_السابع_والعشرون(27)

(الرواية كوميدية رومانسية حزينة❤️)
.
.
.
في مقولة مشهورة تقول"جميعنا اشرار في رواية احدهم"..خلينا نتفقوا انه المقولة هادي اكتر من تسعين في المية صح...لانه كل شخص يشوف فينا حسب مصالحه لو نفيدوه في شي حيشوفنا من الاشخاص الصالحين..ولو مكناش على مزاجه او عرقلناله شي حيشوفنا اشرار يعني نظرته لينا سواء ايجاب او سلب متوقفة على افعالنا لي بتالي ياحتفيده ياتوقف في وجهه..
(وهادا لي حنشوفوه يصير في الحلقات الجاية)

__بقلم الرائحة الطيبة__
🌿🌿🌿
في الصباح الباكر ليوم الخميس
2013/2/21..
الساعة 🕗 8:00...

مافاقت إلا بهزة من هاتفها لي ينبأ عن وصول رسالة و لحقت الرسالة اتصال ڤايبر..

وبسبب نومها الخفيف فاقت وهيا كلها طاقة إيجابية بعد الليلة الماضيه لي حركت مشاعر اتجاهه..ماتوقعت فيوم يتحركوا لشخص بطريقة عادي

شافت الهاتف لقت صورته على الشاشة..اتذكرت المكالمة لي جمعتهم الليلة الماضية..كانت معبية حنية ولهفة و عود منه..

المرة هادي تكلمت معاه براحة بعد ماعرفت رد امها على جداها..بعد تأكدت من انه مافيش شيء ممكن يزحزح السعاده قررت تعطي فرصة جدية بعد ماشجعتها نرجس..وفجأة اتذكرتها..

دخلت على الرسائل في الهاتف عشان تطمن انه رسالتها البارح لي وصلتها من هاتف امها زهرة حقيقة..

"اكيد مشغولة عليا خوخه..اطمني اني عند امي بايتة وبخير.. نرجس"

ارتاحت وتقاعدت بتوتر لما رجع الهاتف يرن..

عدلت صوتها وحاولت تصحصح..

خولة: الوو

امير: احلا الو نسمعها في حياتي

خولة ابتسمت وهيا تشوف لنرمين راقدة: بالله بطل مايجيش الكلام هادا..بعدين غير قول صباح الخير

حك لحيته وهوا مبتسم: صباح الخير ياوجه الخير..يادعوة خير من امي ليا..هكي باهي؟

ضغطت على قبضة يدها وهيا تشوفلها..محاولة للتماسك قدام عاصفة العشق لي حتمر بيها معاه..لكن مش معروف هل تقدر تقاومها وتخرج منها بأقل الخسائر..او من اول نسمة ريح تعلن استسلامها..!

امير بنبرة هادية غير معتادة عليها خولة: وين مشيتي

خولة: احم..معاك

امير: ان شاء الله تولي معاي ياخولة ان شاء الله..نشهد بالله انك انتي اول وحدة نتمناها من ربي بصدق هكي..لدرجة كنت نشوف فيك بعيدة ومشعارف كيف نقربك مني

زادها كلامه وهيا مش قده ولاتقدر ترد عليه..ومن قوة شعورها بكلماته وصراحة مشعاره الليلة الماضية دمعوا عيونها..وسوأل كان ملازمها"هوا بجد حبني وتعلق بيا ولا حب شكلي وخلاص؟"