عشق الوصب

الجزء24

#عشق_الوصب
#الجزء_الرابع_والعشرون(24)

(الرواية كوميدية رومانسية حزينة❤️)
.
.
(اسفه اسفه اسفه على التأخير سامحوني.. ويارب تكون في المستوي المطلوب والمرجى ..قرائة ممتعه)
.
(‏ابدأ يومك بذكر الله وشكره والتوكل عليه فمن يتوكل على الله فهو حسبه ومن كان الله حسبه فقد كفاه)

العشق شعور افتراضي لا اراضيً
وفكره العشق انتقاء الطرف التاني من بين الجميع، العشق اختيار.. العشق منهج يدرس بدون معلم ،العشق سلعه بدون تمن لأن انت لبتحدد سعر حبيبك انت لتغلي وانت لترخص
،العشق سلاح بس مستحيل تقدر تدافع بيه عن نفسك قدام الشخص لي تعشقه .العشق كل حاصل ضرب الناتج واحد ..سعادتك مرتبطه بالشخص التاني .يعني بأختصار العشق طريق وحدة وكل الطرق تؤدي  الي روما ..العشق وجع للبعيد ودوا للقريب
العشق فكره غير ملموسة في عالم واقعي...

__بقلم الرائحة الطيبة__
🌿🌿🌿🌿🌿
بعد العشي..روحت عمتها لي اصرت تبات في حوش خوها مصباح والصبح بييجيها ولدها سراج يروح بيها لغريان..

جيتها كان واضح فيها إنّ.. بالذات ان امهم مش على بعضها من اسابيع..والاخيرة دخلت على غرفتها وسكرتها

دخلت لدار المعيشة..خولة: وين امك

نيرمين وعيونها على التليفيزيون: في دارها

طلعت ماشيتلها .. طقت على الباب ودخلت بعد سمعت اذن الدخول..

خولة: امي  بترقدي

حولت الغطا وقعمزت على السرير: لا غير بنتكأ لين يجيني النوم .. خيرك شن تبي

قعمزت قدامها: قوليلي

فريدة: شن بنقلك

عقدت حواجبها: مش عمية اني راهو نشوف فيك مش على بعضك .. ادوي يما شن فيه

حطت السبابة والابهام على مقدمة انفها.. وهي حاسة بشوي صداع.. وتفكر تخبرها حالياً وتستشيرها او تحل الموضوع بروحها

خولة: امي متخوفينيش شن في ..سكتت وهيا تشوفلها بقلق

خولة: حالك مش عاجبني من اسابيع من لما جوك اماليك .. هما مقايليلك حاجة؟ في خبر على حد ..ادويي متقعديش ساكته

شافتلها وقررت تحكيلها بعد تفكير دام ايام وأيام :خولة ..نقلك لكن اهدي بنتي

تصنعت اللامبالاة: قولي

فريدة: امي اقترحت عليا اقتراح.. احم.. الاصح خيرتني ...شافت لخولة لي تشوفلها وتبيها تستمر تحكي... اني مقايلتلكم اونه قبل على طارق ولد عمي لي متسمية عليه.. نزلت عيونها وهيا تتذكر في احلا ايام عمرها مع المرحوم... لكن اني عاندت العيلة وغصب عن امي بوي  خديته براني يبيني ونبيه والباقي تعرفوه ... ضحكت وهيا تقول ..هبال بنات لي درته... اضايقت خولة من كلمتها لأنها ادل على ندمها من جوازها من بوها..اما امها قالتها بغرض التمهيد لما ستقول..