عشق الوصب

الجزء28

#عشق_الوصب
#الجزء_الثامن_والعشرون(28)

(الرواية كوميدية رومانسية حزينة❤️)
.
.

#الوله "ذهاب العقل من شدة الحزن"

__بقلم الرائحة الطيبة__
🌿🌿🌿
كان الكل في الصالة..بما فيهم هيا لي اكيد بعد التعارف والسلام والسؤال عن الحال قعدوا فيها..ينتظروا في العشاء يجهز...وهي كانت مركزة فيهم واهتمامهم بيها المبالغ بيه في نظرها او هي هكي قالت وقتها!..

حسام بضحكة: ابعد غادي انا نخدم مرتي...بحنية..تبي وسادة ثانية عمري

هيا تلقائيا خدودها احمروا خجلاً لانها مش متعودة على وسط فيه كمية الراحة في التعامل هكي...اما لي نقالتلها الكلمة اكتفت بضحكة وهي تقول: خنقتوني خلاص خلوني نهدرز على المرا..شرقت بريقها وسعلت

شاهين بخوف قدملها طاسة المية لي على الطاولة: اشربي وادوي بالشوي مني يجري وراك

شربت وهيا تشوفله ونزلت الكوباية: انتم..احم احم..شافت لنرجس..قوليلي نرجس بالله خوي خانقك هكي

شافلها برفعة حاجب..والاخيرة بدون ماتشوفله: بالعكس مخليني على راحتي ..حتى انه مايحبش يوصلني لمشاويري ويقول عليهم زايدات هادا علاش دارلي سيارة باش يفتكى من الرفوع والجيبان ...شافتله ببرائة..شاهين مقتليش حقا جهزت السيارة؟ ولا قاعدة في الورشة

هوا متفاجئ بيها كيف حطاته في الامر الواقعي قدام اخته وهوا لي مايحب حد يفرض عليه حاجة..

نسرين بأستغراب: قصدك مخليك تسوقي..شافتله على جنب..الله يرحم ايامات كان يقول فيها ..مراتي بنحبسها في الحوش لاطلعة لاخشة

شافتله وفي عقلها"لا حتى هوا مش مقصر من الناحية هادي" والاخير فهم عليها واشرلها بمعنى تنوض وحيلحقها..

وهيا لانها خايفة  من عواقب ماقالت زادت غطست في الكنبة وشافت لنسرين وابتسمت بربكة: ان شاء الله ماتعبتوش في الطائرة؟

حسام شاف لنسرين بحب: نسرين تعبت شوية لانه ترانزيت لتونس قبل..لكن الحمدالله مشت على خير

شاهين يشوفلها بحزن مكتوم وساكت..

ونرجس فهمت شي ثاني من اهتمامهم...رن هاتف حسام..

حسام: هادا يحيى(صديقه المقرب)اكيد بيطمن كان وصلنا..وقف وهو يقول..عن اذنكم

شاهين: اذنك معاك

نسرين تشوف لزوايا الفيلا وهيا حاسة روحها "بتتقيأ": كبدي داره

نرجس بصوت منخفض وابتسامة: شكلك تتوحمي؟

شافت لخوها وكانت حترد...والاخير و وقف قرب من نرجس شد يدها وقفها معاه..وقفت وهي مش فاهمة

شاهين: تعالي شوية

ومشوا للمطبخ.. شافولهم فجر وشادية بأستغراب..طلع من باب المطبخ ورده وراهم وجي واقف قدامها اما هيا كان خلفها الساس(الحيط)