عشق الوصب

الجزء23

#عشق_الوصب
#الجزء_الثالث_والعشرون(23)

(الرواية كوميدية رومانسية حزينة❤️)
.
.
(‏ابدأ يومك بذكر الله وشكره والتوكل عليه فمن يتوكل على الله فهو حسبه ومن كان الله حسبه فقد كفاه)

" إن لم نستطع الذهاب لمكان جديد
فسوف نصنع بداياتٍ جديدة هنا " 🍃

__بقلم الرائحة الطيبة__
🌿🌿🌿🌿🌿

وسبب البرود هادا كانت ليه هلبا عوامل مساعدة ولكن اهمهم اهمال عبير لنفسها ولزوجها يعني هيا فارضة على نفسها حياة روتينية في اعتقادها انه الشي لي كان ناقصهم طفل وبكتمال النقص هادا في نظرها مافيش باس لو اطرفت لجوانب اخرى ووجهت اهتمامها ليهم وعادي لو اهملت بعض الامور..لكن الاهمال صح يجوز احيانا في اي علاقة جوزية لكن هادي قاعدة شادة!.والاهمال في حالات معينه وعلى اسباب قيْمه والراجل بالذات ميحبش تكون حياته روتينية او هردميسة او باهته..والبهتان هني واقف على المرا راهو هيا لي بأستطاعتها ياتخلي حياتهم حيوية او خالية من مظاهر السعادة.. واكيد لصبر حدود..

عبير: حيي عليا يامحمد المرا واعدتها كيف تبيني نعتذر  توااا ومانمشيش وهيا العزومة شبه مدايرتها على خاطري.. مش عطيتك علم من قبل علاش تعفس فيا توا

محمد بأعصاب: الله غالب توا حددو ومانقدرش نقول لخوي اجل فاتحتك عندي مراتي معزومة عند صاحبتها

عبير: تتسهوك انتَ ..اني راهو منقدرش نلغي المشية ارفعني ونظموا اموركم انتم هادي فاتحة رجالة مش ملزمة نقعد

محمد شافلها بعد مانحى جواربه ومتوجه للحمام: كيف نظموا امورنا قصدك غدوا فاتحة خوي ومداير بيان تبيهم كلهم يتقلعوا غادي فحوش عمي وحضرة جنابك نرفعك لصاحبتك لانك عاطيتها وعد ..من بيرضالك بيه هادا يامدام قعمزي وهني روحك فوتي غدوا ونرفعك يوم تاني اسكني عندها صاحبتك

عبير بقهر: شنن دخليي انيي ..اني عطيتك علم قبل.. من الاسبوع لفات قتلك يوم الاحد عندي عزومة ..كيف يولي منظري نلغي المشية في اخر لحظة

محمد ببرود: مالياش علاقه بيك اني من الصبح عطيتك علم وقتلك حددنا فاتحة إيهاب غدوا ..ماقتلكش راجي لنصاص الليل باش تكلميها

عبير: اني قلت مستحيل يرضالي الحمشة تو يجي في الليل ونغيرله رائيه

فنص عيونه وقال باللهجة شديدة لعند ما خافت :مش اني لي مرا تغيرلي رأي في اخر لحظة..ياسر من صداع الراس خير مانحلف على المشي لصاحبات مرة وحداا... وكمل طريقه وخش الحمام(اكرمكم الله) وسكر الباب بالقوة لعند انفزعت هيا وبنتها لي كانت راقده مشتلها عشان تسكتها وهيا متعصبة من كلامه و واخده على خاطرها ..بعد ما رقدت بنتها بعتت رساله لصاحبتها لي كانت عازمتها ولامة هلبا صديقات من ايام الجامعه ..كتبتلها مسج اعتذرت وقالت فيه سبب غيابها انه بنتها حرارة ومش حتقدر تطلع بيها.. بعتتها وسكرت هاتفها ..حطت يدها على راس بنتها وهيا تقول"بعيد السو عليك بنيتي"..وناوية تنكد على باها .ظناً منها انها يجي جاي بنكدها ولكن في الحقيقة هوا كل مايمشي غاادي..
********
في المطبخ كانت هديل ادير في العشي ليها ولي خوتها العزارة.. كانو يسمعوا في الدوشة ومستائين..