عشق الوصب

الجزء(13)

#عشق_الوصب

الجزء الثالث عشر(13)

(الرواية كوميدية رومانسية حزينة❤️)

(الرواية نعم موجودة على الواتباد..سوأل تكرر هلبا💕)

____بقلم الرائحة الطيبة____

‏ولا تنخدع إن رأيتني ضاحكا، إنها أسوأُ أيامي..
.
.
.
4/يناير 2013...صباحًا✨...
يوم العطلة..او بالأحرى يوم الجمعة...زي ما في ناس نايضة تذكر في الله وتصلي على النبي ويا اسفاه في ناس نايضه بعد ما كانت تقوم في فعل فاحش وذنيئ..

فتح عيونه..والرؤية مش واضحة قدامه كويس رجع سكرهم وفتحهم شافها قدامه بلبس شبه عاري...شبه؟؟!...خلينا نقولو عاري افضل.!
قعمز على السرير وهوا يشوفلها ومش قادر يذكر شن صار وكيف راقد جنبها توا...هز كتفها  بشي من العصبية

شاهين: هيي انتي..نوضي....لما ماردتش عليه مشي من جهتها ونحى الشرشاف من عليها

شاهين: سمااح..نوضي

فتحت عيونها بشوي كسل وهي تتثاوب شافاته قدامها ابتسمت بربكة: صباح الخير حبيبي

برفعة حاجب: كيف صار؟

سماح ضحكت وهي تتقاعد عشان تقعمز: زي عادتك تنوض مش مذكر شي...شافتله بحب وعيون يلمعو....امبارح كانت احلا ليلة من بين كل الليالي لي عشتها معاك

يشوفلها بشي من الانزعاج وهوا يحاول يذكر: لما ركبت للدار كنتي هني

تلف في الشرشاف على جسمها كويس: اي كنت نستنا فيك....ابتسمت وهي متابعة تقول....وانتَ فرحت بجيتي هلبا وطول هجمت عليا..الباين مرتك مش مشبعة رغباتك

هوا لما جابت سيرتها تلقائياً عصب..لانه يشوف فيها اقل من إنها تتكلم على شي يمسه بشكل او اخر..قال بعصبية: سكري فمك..توا نعطيك شن تبي و اطلعي روحي طول ومدام عرفتيني تجوزت معش نبي نشوفك اهني....فتح الدولاب طلع منه مبلغ ومدهولها...وهي فرحت بيه هلبا لانها جايه على خاطره

تشوف للفلوس في يدها: مش حنجي تاني لكن انتَ بتجيني وله.؟

شاهين: روحي توا واني كان نبيك نعرف وين نلقاك

سماح: تمام...حطت الفلوس في شنطتها وخشت الحمام(اكرمكم الله) تغير وتطلع تروح

وشاهين طلع يدوش في الحمام التاني وبينزل يفطر..🌿وزوجته شرعاً وقانوناً كانت في الغرفة الخاصة بيها مش خاطرها تنزل تفطر..حاسة بملل واشتياق شديد لصديقات عمرها ليها ايام لا شافتهم ولاسمعت صوتهم وهي مش من عادتها تقعد بعيدة عليهم هكي..وممكن احساس الوحشة لي قاعد في قلبها حتى بعد ماشافت امها هادا سببه..فكرت وفكرت وقررت!!..انها مش حترضى تقعد بين اربعة حيوط ومصيرها مجهول هي اخر شي كانت تخططله قبل مايصيبها ما اصابها انها تلقا خدمة..ولما قالت خدمة وعلى طول مشي تفكيرها للخدمة الغبرة لي مشتلها يوم واحد بس عنده في الشركة...وحطت فبالها اول شي تشوف هديل وخولة لانها محتاجتهم هلبا وممكن يصبروها شوي وبعدين تكمل من وين ماوقفت لعله تلقا حتى مكتب استشارات تشتغل فيه لعند ما يفرجها ربي...وقفت للساكو لي جاباته امها واطلع في تلفونها لي مسكر شحن