عشق الوصب

الجزء21

#عشق_الوصب
#الجزء_الواحد_والعشرون(21)

(الرواية كوميدية رومانسية حزينة❤️)

.
.
(‏ابدأ يومك بذكر الله وشكره والتوكل عليه فمن يتوكل على الله فهو حسبه ومن كان الله حسبه فقد كفاه)

__بقلم الرائحة الطيبة__
🌿🌿🌿🌿🌿🌿🌿🌿
"أحيانًا تبدأ حياتُنا عندما نلتَقي بأحدهُم"
.

.
حط على الرقم وعقد حواجبه لما طلعله مشغول مرة تنين الثالثة شد وردت بأنفعال لانها تعرفه هوا وهادا رقمه برغم مكانتش مسجلاته عندها..

خولة: نعم نعم شن فيه؟.. قعدت حواجبها بأستغراب وهيا تسمع في صوت انثوي يرد عليها

وسامية لي خدت الهاتف من امير: السلام عليكم معاي انسة خولة؟

امير بهمس: متصلة بيها من متوقع يرد عليك يعني...شافتله سامية وعضت على شفايفها عشان يسكت..

خولة: ان شاءالله مني معاي

سامية بخجل على الموقف لي حطها فيه: معاك سامية ..اخت امير الشارف صاحب الرقم هادا..اكيد تعرفيه

وهني بدون سابق انذار الخجل انتقل ليها مش لشي ولكن كونه عطاها تكلم حد من عيلته شي يربك اي بنت حتى لو مافيش شي في قلبها ليه....ومع هادا مهما كان لازم تكلمها بطريقه محترمة..

خولة: تشرفت بيك كيف حالك انتي والاهل ان شاءالله بخير؟

سامية بلطف: الله يسلمك حبيبتي بخير كلنا كيف حالك انتي وعيلتك

خولة: في نعمة الحمدالله.. تفضلي نقدر نساعدك بشي

وامير يراقب بتوتر شديد..وكل أماله انه يتغير شئ بالمكالمة هادي..

بلعت ريقها : بصراحة اني طلب مني امير نكلمك...سكتت شوي ورجعت تقول بعفويتها المعتادة.. خولة الحق الحق مانعرفش نلف وندور بالكلام وندوي بمقدمات خوي توا شد فيا هلبا نكلمك شافك واعجب بيك وحاب يتقدملك واني قتله ليش متقولش لكلام هادا ليها طول وهوا في قولة مش عاطيتني نفس مش عاطيتني نفس لعند قلت هادي تجبد في الاكسجين شوره..وشافتله مع اخر كلمات قالتهم وهوا مصدوم بطريقه كلامها وكأنها تعرفها من قبل..

ابتسمت من عفوية كلامها وتذكرت طريقة كلامه لي تشبه هلبا لطريقتها في الكلام..مع هادا شعور لوية البطن هوا لي سيطر ع اركان جسدها..كيف لا وهيا لي اول مرة تحس بجديته معاها في موضوع ارتباطه بيها..يعني هوا مش ولد طرابلس لي يبي يتسلى ويضيع وقت زي ماراسمة في عقلها.!

مع هادا هي خولة..ولانها خولة عندها قوة وسيطرة على مشاعرها غير عادية (وخليكم متذكرين الكلمات هادم) لهاذا كانت حذرة جداً في اختيار الكلمات لي تخرج منها

خولة: بصراحة اني مش مفكرة حالياً في الارتباط والزواج والكلام هادا كله عندي زايد ..وياريت ماتفهمينيش غلط رفضي مش لشئ محدد او لشخص خوك.. ان شاءالله تفهميني