عشق الوصب

التكملة

#عشق_الوصب
#التكملة
🌿🌿🌿🌿
معتز : زي قبل تفترشي الدنيا وماتعرفيش تعتذري وبعدين نجي اني لانه قلبي حليب ومنقدرش على جفاك و نسامحك

هيا هني نست كلامه نست الجرح لي داره في قلبها نست كل شي وفرحت بمسامحته..عشقها لي تكنهوله كان اكبر من انها تشد اكثر في قلبها عليه حتى لو هوا غالط فيها لنخاع.. تقعد تحبه..

هديل بأبتسامة ماقدرتش تخفيها: خلاص تسامحنا

بكبر: تقدري تقولي هكي

هديل ضرباته بيدها الثانية على كتفه: يادراه

معتز : خلاص تسامحنا..شد على يدها لي ماسكها..لكن ياهديل لو تكررت بينا مشكلة زي هادي نوعدك بأنه مش حيصير صلح بينا مرة ثانية ..تمام؟

خافت هلبا من نبرته: مستحيل مزال نزعل منك ولا انت تزعل مني ولا؟

معتز : اكيد حبي.. شد يديها الثنين وباسهم

معتز : كان تعرفي قداش الدنيا نسودت في عيني واحني متباعدين.. كل شي بديت نشوف فيه هديل.. هديل ..هديل... وكان مع كل كلمة يقرب منها ..كان حيوصل لمبتغاه..لكن هي بسرعة عطاته بجنب..وباس خدها

حضنها بقوة وهوا يقول: مسمومة يافرخة انتي

لفت يديها عليه وهيا تضحك: قتلك مش بساهل

نزل يده لخصرها ويده ثانية لافها على شعراتها الكيرلي: نحبك هلبا عندك علم ولا؟

هديل كانت كل حواسها مع حركات يديه لي مذوبينها ومش قادرة تسيطر او توقف لي قاعد يصير: تؤ..ماعنديش علم

شافلها مطولاً وهوا يتأمل في حالتها الضعيفة بين يديه...معتز : نعترفلك بحاجة

هديل: شنو

معتز : نحب حالتك لما تكوني معاي نحسك متقدريش تسيطري على روحك وانتي جنبي عكس قبل

بعدت عنه شوي : عكسك اني مضايقة من شي هادا اني فعلا معاك ننسا كل شي انت مسيطر على كل خلاياي.. لكن لي مطمني إنه اني معاك انتا وانت مستحيل اضرني...وقالت كلماتها الاخيرة بعيون يلمعوا من الحب

معتز ابتسم : صح

هديل: تمام انا حنطلع توا ..نتلاقو بعدين

معتز هيا اطلعي حتى اني طالع

هديل: ستنا نطلع اني قبل .. مشت فتحت الباب وطلعت وهوا يشوفلها ع طلعتها من الدار شافتها عليا وهيا داخلة للدار..شافتلها من فوق لتحت وخشت وهديل ابدا ماحبتش نظرتها.. ورجعت للصالة لي لقت فيها حماة عمتها وبناتها التنين..والحديث لي كان مسيطر على العقدة بقدرة قادر اتغير بالصدفة لموضوع اخر قبل دخول هديل .. وفي طول القعدة لحسن حظها او سوءه مانفتحش بتاتاً
🌿🌿🌿🌿
___بقلم الرائحة الطيبة___
.
السبت..2013/2/16....
نزلت من السيارة وسكرت الباب بقوى وهي تنفخ ..حتى لو ماتكلمتش حواجبها المعقودات واحمرار وجها يتكلموا عن مدى عصبيتها.. وهوا نزل بعدها ولحقها..

شاهين: كنتي رفعتيه معاك الباب بالمرة علاش مخلياته راكب في السيارة

اتمتم وهيا داخلة: المرة الجاية

يمشي وراها: شن تمتمي عليه صوتك

نرجس بنفتره: ماتمتمتش فوتنيي

سرع مشيته وشد رسغ يدها بقوة: مع من تدوي انتي هكي وبعدين لما نتكلم معاك تتمسمري قدامي تسمعي فيا ولااا... قال كلامه الاخير بعصبية

نرجس برغم وجعتها الشدة لكن مبينتش: ارتاح مالا في جديد مش حنقعد لانه مافيش داعي نتكلم ولاندوي ولا نفتح فمي اساسا  ..مادام انت ماتبيش من يدوي في وجودك علاش ندوي اني نتبكش بكل خير وله؟

شاهين زاد ضغط على يدها بسبب التحدي لي اصبح يشوف فيه في عيونها: انتي خيرك غبية حماارة ماتفميش.. قلتي نبي نخدم ومليت من الحوش خدمتك عندي ..خلاص ياسرك شن مازال تبي .. اول مالقيتي كلب اجرب جاملك بكلمتين هوا يكدب فيهم اساسا صدقتيه وتبي تقبلي عرض خدمته؟

بلعت ريقها وعيونها لمعوا بدموع...بنبرة بتهكم قال: قصدك صدقتي كلامه انتي؟

شاهين: مافيش منها الدوة لي قال هالك..ياغبية هوا بيستغلك يا اما بيوصل بيك ليا او بسبب سمعة بوك لمليحة بيوصلك انتي..وبالذات بعد اخر عملة دارها كان مش لاقينك متجوزة وشوفي من واخدة عاد.. كان هادا كلاب الشارع مش مخلينك في حالك

غمضت عيونها بعصبية هيا حاولت تتناسي الامر لكن كيف بتنسي يانرجس في وجود شخص في كل مرة ناجح في انه يذكرك بالأضافة انك المفروض ماتنسيش لانه افعال الاب تقعد لاحقتنا ولاحقة اولادنا لاخر عمرنا

حاولت تجبد يدها وقالت بصوت عالي وهيا اعصابها تكاد ان تتلف: خلاص خلااص..ضروري تذكرني تسحابني فرحانة بيه بوي ولا سعيدة وفي كل مصيبة نصفقله اني وامي باش تحكيلي.. شن دخلي بيه تجبدلي في سيرته الوسخة شن تستفيد وانت تشوف فيا متحشمة بيه لشن تبي توصل معاي ...زاد علي صوتها ودموعها عبوا خدودها كانت تدوي بأيدها اليمين بينما ايدها الثانية كانت ترجف بين يديه... تكللم لشن تبي توصل شن هوا لي تبيه منيي علاش تأذي فيا اني مادرتلك شي علاش الكلام الجارح هادا توا ....

يكدب لو يقول ماوجعتاش كيف ماتوجعاش وهوا لي حامل كل العشق لي فقلبه ليها وبوجدها في حياته بالنسبة ليه بمثابة خروج خيوط الشمس بعد غروب طويل وكأنه الربيع هل على قلبه.. لكن المشكلة لا الوقت ولا المكان مانسبين لحبه ..وهوا مش شاهين زمان توا قدامه هدف وانتقام لازم يوصله ولانها حتى هيا مش بنت عادية او على الاقل بالنسبة ليه مايقدرش يستغلها لرغباته..في نظره هيا انقى من هكي بهلبا...
وهادا سبب حالته معاها المعاكسة تماماً لي ما في داخله..

تنفست بالقوة وهي تشهق وتبعد في يده : حول خليني نرقا لقبري وتتريح من شوفة وجهي حول

حاوطها من ظهرها ويدخل فيها: اشش..خلاص اني اسف مش قصدي نعايرك انتي فهمتي غلط

بسبب لحالة لي فيها ماركزتش شن قال...

نرجس: بعد من عليا ماتمسنيش تواا....

يتبع...

___بقلم الرائحة الطيبة___

الصلاة على النبي..
🌸