عشق الوصب

الجزء 26

#عشق_الوصب
#الجزء_السادس_والعشرون(26)

(الرواية كوميدية رومانسية حزينة❤️)
.
.
.

(اسفة لأي خطأ او لخبطة..ونشكر Maria AbdOo على مساعدتها ليا في اللهجة الشرقاوية قراءة ممتعة)

لو تزوج قيس باليلى..
لعشق إمرأة ثانية وجُن بها..
لكن الحرمان هو بطل الحكاية وليس العشق!..

__بقلم الرائحة الطيبة__
🌿🌿🌿
كانت العمة هيا وراجلها في الطريق لحوش خوها عشان تطمن على بنت خوها.. ولانه هدرزة تجيب هدرزة انفتح حديث تحديد موعد فضانية مؤيد وماريا..

شافلها زوجها خالد بصدمة: قصدك لي بينهم جدي لعند واصل لي فضانية وتحديد موعد عرس وزواج

اسماء شافتله بأستغراب: علاش انصدمت ماهو من يومك تعرف انهم متسميين لي بعض والعيلة كلها تعرف بالشئ هادا

سارح في الطريق: العيلة كلها؟ محمد وصلاح حتى هما ؟

ضحكت: كيف عاد ..اكيد هم لولين يعرفوا ماهو عاد قتلك الموضوع رسمي

قاطعها و واضح وجهه متغير: نسحابه دوت نسوان انا ماكنت نعرف انها جديات ..هما غادي ماعمره جابو سيرة قدامي على الموضوع

استغربت درجة اصراره على عدم المعرفه: وكان تعرف يعني شن بدير مافهمتش

هني هوا كان واجب عليه التمثيل بدقة عشان ماتشك فيه: كيف شن بندير انا حاط العين عليها..تلخبط وقال...قصدي ولد الشادي(ولد خوه) حاط العين عليها من اخر مرة لما قعدت عندنا ايامات وانتي مريضه..شافها قداش مرة ..وقلي عليها..تكلم بلهجة فيها لوم...وانا عاد ماكنت نعرف وعطيت لولد خوي كلمة نمشيله وضعه مع اهلها تاريته هيا معطيه والنسيب اخر من يعلم

مشت عليها: والله ماصارت لكن ماجت في هدرزة ..ولد الشادي ربي يبعتله زينة البنات يستاهل كل خير كلا مريوما بنت خوي ماتحرج مني ياخالد ماتخيل غير ع ولد وخيي الصقر..اهو حتى هما مصار من الفضانيه لسنه الجايه ربي يتمملهم ع خير

خالد اختار الصمت لعند مايوصلو وباله مشغول...
🌿🌿🌿🌿
واقفة ع سارة وهي تلبس في وشاحها عشان يمشوا مع بعض لحوش عمهم داوود وين ما كل العيلة موجودة..

ماريا بصوت منخفض وهيا تنخص فيها من كل مكان ومش مهنيتها في المكالمة: هيااا بديت صنم واني نراجي فيك

اشرتلها سارة بمعنى شوية بس.. وهي تحكي بالهاتف والواضح تكلم في شخص خاص بالنسبة ليها..

سارة: توا بنمشوا لحوش عمي داوود على سلامة بنت عمي نحكوا بعدين تمام؟....ضحكت بخجل وهيا تقول...حتى اني ..تشوفلها ماريا وهيا تفكر في سبب حمرة وجهها وهيا تتكلم معاه ورعشة يدها البسيطة وهيا ماسكة الهاتف ولي كل هادا يدل على مدى تأثرها بيه..وهني خطر على بالها شيء..هيا ولامرة حست بحاجة بقربه ولامرة حست بخجل او توتر او حتى رهبة ديما قدامه على طبيعتها..حتى قلبها دقاته منتظمة بقربه.. واكيد الكلام اهني على مؤيد لي يملك مشاعر متناقضة تماماً لي ما تشعر به هيا...