عشق الوصب

الجزء22

#عشق_الوصب
#الجزء_الثاني_والعشرون(22)

(الرواية كوميدية رومانسية حزينة❤️)
.
.
(‏ابدأ يومك بذكر الله وشكره والتوكل عليه فمن يتوكل على الله فهو حسبه ومن كان الله حسبه فقد كفاه)

__بقلم الرائحة الطيبة__

كل أنثى على وجه الأرض خاضعه تنتظر من يستحق خضوعها.. ولكن تلك الخاضعه ستختفى وتذوب عميقا لو شعرت يوما بالندم على إظهار أجمل ما فيها.!

🌿🌿🌿🌿🌿🌿🌿🌿

حاوطها من ظهرها ويدخل فيها: اشش..خلاص اني اسف مش قصدي نعايرك انتي فهمتيني غلط يانرجس

بسبب لحالة لي فيها ماركزتش شن قال وهوا نفسه مانتبهش كيف طلعت معاه الا بعد ماقالها..

نرجس كانت حالتها مش طبيعية وكأنه بالكلام لي قاله خلاها تفقد اخر ذرة تحمل...بأنفعال كبير قالت: بعد من علياا ماتمسنيش..توا اكيدد تريحت بعد ما بخيت سمك فيا.. تريحت ولااا...علت صوتها وهي تقول فيها وعلى وجهها تتلاحم ملامح البكاء والوجع

والاخير لانه مش متعود يتعامل مع الجنس الناعم..شاهين: مااتعيطيش ..رجع مسك يدها بقوة...تعالي نتكلموا فوق مش اهني

جبدت يدها بغضب وبصوت اعلى قالت: بنعييط شن دخلك بياا حتى هادي بتتحكم فيهاا ماليكش بيا علاقه.. تنفست بقوة ورجعت تقول.. ماتشوفليش هكي فااده منك راه فااده من حركاتك وكلامك المسموم يأذي فيا بالك تسحابني حجر زيك.. نحس انا نحس لحم ودم ...سكتت لما زاد الالم حطت يدها في مكان معين في بطنها...وهوا مركز معاها وحس من ملامح وجهها انها تتوجع واكيد صابه الخوف عليها..

ثني رقبته لمستواها: خيرك وجعك شي؟

هيا معش قدرت تتحمل مشت مسرعة للحمام (اكرمكم الله)تستفرغ.. مشي بعدها طول عشان يشوفها.. واكيد على اصواتهم هادي كانت كل من فجر وشادية حاضرين الموقف ولو انهم عن بعد وماقربوش..

كانت طالعه من الحمام لي جنب مكتبه وقفت في الباب بتعب شديد وهيا ثانية ظهرها شوي وتبكي من كل شي..

شد يدها اليمين وهي تمسكت فيه لانها في اشد حالات ضعفها و وجعها..

شاهين: نرجس تسمعي فيا

هزت براسها و وحاولت توقف على طولها وهي تقول ببكاء: نبي نرقد ارجوك نبي نرقد بس

لأول مرة من وقت قلبه يوجعه..والوجع جاه من خلال انسان قاعد يحس بوجع قدامه!..يااه ياشاهين انت متعمق فيها لهدرجة ؟قاعد يتوجع قلبه بس لانه يشوف في حالتها هك..! لهدرجة صار في رابط روحي بيها!كيف وامتى صار..هادا لي قاعد هوا نفسه يفكر فيه..

مالقاش نفسه غير شادها من يدها ويدخل فيها لمكتبه وهيا كانت ساندة روحها عليه..

نرجس بهدوء وصوت تاعب: تعرف مافيش حد يهتم بيا غير امي لما نمرض زي توا.. فتحلها الباب ودخلوا وهوا ساكت وهيا تابعت تقول... كل مابوي يدير عملة على قولتك نتعب وهيا تهتم بيا ويروحي هيا بروحها تبي من يهتم بيها