بعد مرور أكتر من أسبوعين .. في يوم صحيت من الصباح جهزتا ملابسي لي الشغل وقلتا أمشي بي هناك أشوف لدن ووائل لو صحو أجهزهم عشان ترحيل وائل قرب يجي ، اليوم داك كانو مبيتيين مع ناس أمهم .. مشيت ليهم .. أتلقاني وائل مع باب النص .. لابس ملابسو وجاهز .. قلت ليهو صباح الخير .. قال لي صباح النور .. قلت ليهو صحيت متين وشربتا الشاي ولا لا؟ .. قال لي صحتني أمي قبل شوية وياداب ماشي أشرب الشاي .. قلت ليهو ولدن ما جهزت؟ .. قال لي لدن عيانة .. قلت ليهو بخلعة: لي مالا الجاها شنو؟؟ .. قال لي ما عارف بس لمن صحيت كانت راقدة في السرير وأمي قالت لي أنها عيانة وما ح تمشي الروضة الليله .. قلت ليهو طيب أنت أمشي أشرب الشاي بتديك ليهو خالتي وأنتظر الترحيل برة، معاك قروش؟ .. قال لي ايوا أبوي أداني .. قلت ليهو تمام .. وجريت جري لي ناس أيمان .. لقيت أيمان لابسه عبايتها وطرحتها وبتخت بطاقة تأمين في شنطتها .. ولدن نايمة في السرير الجنبها ومن شكلها كان باين عليها الارهاق والمرض .. قلت ليها بلهفه وأنا بتحسس في جبتهها: مالا لدن؟ الحصل ليها شنو؟ .. قالت لي والله يا ميامن فجأة أمبارح بليل تعبت والليل كلو ما نامت وكانت بتستفرغ وبتقول أنو بطنها واجعاها .. قلت ليها ولي ما جيتو صحيتوني ووديناها المستشفى سوا؟؟ .. قالت لي مجدي قال ما نصحيك ونقلق بيك سااي وهي زاتها أبت تمشي معانا المستشفى وبكت لمن قلنا سايقناها .. قلت ليها لكن كدا ما ينفع عاني وشها أصفر كييف وكمان محمومة شدييد ، يا حليلا حبييبتي .. قالت لي مودنها هسي مجدي مشى يسخن العربية .. قلت ليها خلاص أنا ح أمشي البس وأجي .. قالت لي طيب .. مشيت بسرعة لبستا ملابسي وشلتا شنطتي في يدي ورجعتا ليهم .. لقيت مجدي بقول لي أيمان: يعني مصرة تمشي معانا؟ مش قولتي ميامن ماشة خلاص أقعدي إنتي! .. قالت ليهو لالا ما بقدر أقعد هنا وأنا ما عارفة بتي مالا ... مجدي قال لي أتكلمي معاها يا ميامن وقولي ليها ح تتعبي لو مشيتي .. قلت ليها بالجد يا أيمان مجدي كلامو صح القعدة حقت المستشفى حتكون حارة عليك وطويلة ف شنو أحسن تقعدي وما تخافي نحنا معاها .. قالت لي لا ما مشكلة بمشي .. بقيت بصر عليها تقعد مع خالتي .. وبعد تعب حتى قعدت .. مشينا أنا ومجدي المستشفى وفحصنا ليها .. الدكتور قال أنو حصل ليها تسمم .. وكتب لينا العلاجات .. أخدناها ورجعنا البيت .. الزمن داك الظهر كان أذن .. لقينا أيمان مقلقة شدديد وقاعدة على أعصابها ومن شافتنا طوالي جات علينا .. وقالت لينا أها الدكتور قال ليكم شنو؟؟ .. قلت ليها حصل ليها تسمم .. قالت لي كر علي .. قلت ليها بتكون أكلت حاجة بايتة في الروضة .. قالت لي أيي شكلها كدا .. رقدتها جوا في الغرفة .. وخليت أيمان معاها ومشيت أتوضيت وجيت صليت الظهر جنبهم .. وأنا في الركعة الاخيرة تلفوني ضرب .. خلصتا صلاتي وقبلتا عليهم .. أيمان قالت لي دي خديجة ضربت ليك .. قلت ليها ايي عارفاها .. قالت لي عرفتيها كيف بدون ما تشوفي التلفون؟ .. قلت ليها من النغمة عاملة ليها نغمة براها .. قالت لي أشي أشي .. ضحكتا معاها ورجعت لي خديجة .. قلت ليها خديجة عثمان .. قالت لي بت أحمد .. قلت ليها الاخبار؟ .. قالت لي وين إنتي الليله ما جيتي الشغل؟ .. قلت ليها لدن دي تعبت شوية ووديناها المستشفى .. قالت لي بسم الله مالا سلامتها! .. قلت ليها تسمم والله .. قالت لي يا حليلها وهسي هي كيف؟ .. قلت ليها يعني لسه ما أتحسنت كويس .. قالت لي ايواا ربنا يواليها بالعافية .. قلت ليها أمين .. قالت لي طبعا ما شفتي حمزة جانا هنا في المكتب ولمن لقاك ماف وغايبة بدون استئذان وكمان ماف زول فينا كان عارف إنتي غايبة لي قوم الدنيا وقعدها .. قلت ليها الليييله سجمي .. قالت لي سجمك وبس ساااي غاايتو بكرة الله يستر عليك يختي .. قلت ليها الله يطمنك يا خديجة .. قالت لي يلا هيي أنا زااتي ما فاضية ليك ووراي شغل، بااي .. قلت ليها بااي .. رقدتا جنب أيمان ولدن وأنا بالي مشغول .. وقلتا شكلو كدا بكرة ح يفصلني نهائيا هو في العادي عندو معاي مشكلة وعلى طول بهزئني أجي كمان هسي أغيب وبدون أستئذان كمان! والله ياااهو الطردني زاااتو .. تاني بعد مسافة حاولتا أتناسى الموضوع وبقيت مركزة مع لدن وجرعات الادوية بتاعها .. لحدي بليل أنا وأيمان كنا قاعدين معاها .. وهي الحمة مرة تخف منها ومرة تزيد عليها .. وأغلب البتاكلو بترجعو .. وما نامت إلا بعد تعب .. ونحنا عشان كنا مرهقين شدديد أول ما نامت نمنا وراها ..
