لمن قال لي كدا رفعتا رأسي عاينت ليهو مسافة ببرود وملامح وشي كانت أكتر من عادية وما بتبين أنا بفكر في شنو اللحظة ديك .. وبنفس البرود قلت ليهو ما محتاج وصية يا باشمهندس لانو الحصل لي خلاني عديمة أحساس والانسانة الشايفها قاعدة قدامك دي حاليا جسد بدون روح فما تفتكر أنو كلامك ممكن يآثر معاها بي شي، ومش العقد دا تما بدون موافقتي مع أنو طالما أبوك وعمي صالح كانو موافقين عليهو وهما باعتبارهم أولياء أمري والمسؤولين مني هو بتم لكن برضو موافقتي كانت مهمة وبدونها العقد دا باطل ، ايي لي بتعاين لي كدا؟ ما تستغرب لانو حتى ولو أنا ما معترفة بي صلة قرابتي بيهم بس هما في النهاية أعمامي ودي حقيقة ما بتتغير لو قعدتا لو أبييت، المهم مش تما بدون موافقتي؟؟ يلا أنا هسي موافقة عليهو وراضيانة بيهو ورضيانة بي أنك تكون راجلي ودا ما كلام ساي لا لا أنا بالجد موافقة والداير تعملو فيني أعملو أنا صرحتا ليك وما ح أمنعك أبدا ولو قتلتني تكون ريحتني بالمرة .. حمزة أتخلع شدييد من كلامي ونهائي ما أتوقع أنو ردي ممكن يكون بالطريقة دي وأفتكر أني ح أتشاكل معاهو ونقعد نتناقش بس أنا صدمتو .. ودا هدفي من البداية أني تاني أتعامل وأتكلم ببرود في كل موقف وأهم شي من يطلب مني حاجة أنفذها بسكات وأسفهو وخالص ما أتكلم بس أنفذ .. عشان الحاجة دي ح تمغصو وتحرق روحو .. من الصدمة ما عرف يرد لي بي شنو وبقى ساكت وبعاين لي بي أستغراب ومتحير في القولتو .. بكل أستفزاز أبتسمتا ليهو أبتسامة صفراء وقبلتا منو .. لقيت أغلب الناس مركزة معانا وبتعاين لينا ومفتكرنا مبسوطين وبنتهامس زينا وزي أي عرسان .. تاني عمة أبوهو قالت عاوزة تجرتقنا وقالت لي البنات يمشو يجهزو الصينية ويختو فيها حاجات الجرتق .. في كم بت قالو ليها حاضر ومشو جهزوها وجو .. جرتقونا وباقي البنات مسكو الدلوكة وبقو يغنو....
مع العصر العزومة أنتهت والضيوف مشو إلا خالات حمزة قعدو معانا .. وطبعا الوضع ما كان عاجبهم .. وكل ما أعاين لي واحدة منهم بالغلط بلقاها بتعاين لي بي عين بايظة وبتحمر لي .. بس أحلى شي أنو كل ما واحدة تحمر لي أنا ببتسم ليها وبعمل نفسي رايحة ولا كاني فاهمة نظراتها لي وبمغصها بي أبتسامتي .. قعدتا معاهم شوية وتاني قمتا وكنت طالعة فوق .. عسجد قالت لي مالك قايمة؟ .. قلت ليها تعبانة ماشة أنوم .. قالت لي الغداء بختو فيهو سمر وربا أستني لمن تتغدي وأمشي فوق مرة واحدة لانك من الصباح ما أكلتي .. والله لمن قالت لي كدا أمها أدتها عيين وقربت تقوم تشاكلها وتضربها قدامي ... ما حبيت أحرجها وقلت ليها طيب أغير ملابسي وأجي .. قالت لي كويس .. طلعتا فوق أستحميت وجيت نازلة .. قبل ما أصلهم سمعتا خالتها الاسمها مواهب بتقول ليها: أسمعي هنا يا عسجد نحنا الموضوع دا قفلناهو خلاص وزي ما قالت ليك أمك البت دي أوعى تتعاملي معاها، وأنا أوعى أشوفك مصاحباها وإلا والله أقطعو معاك ستة صفر .. عسجد قالت ليها يا خالتي هي ما عندها ذنب أبوي جبرها تعرس حمزة أخوي وأنتو مفروض تعاملوها كويس .. أمها قالت لي خالتا: عليك الله عان البت دي هسي دي فيها عقل؟ لا يعني يا عسجد إنتي عاجبك الحصل لي أخوك لمن بتبرري وبتدافعي ليها وبتقولي لينا أنو أنتو المفروض ترضو وتتعاملو مع البت كويس لانو ما عندها ذنب!!! كييف ما عندها ذنب يختيي وهي سبب المشاكل دي كلها؟؟ أبوك ولو ما شافها واحدة صايعة وضايعة وداير يأدبها ما كان جبر أخوك يعرسها ، شبهو هي يا يمة ولا بتستاهلو؟؟ .. عسجد قالت ليها لكن يا أمي... خالتها قاطعتها وقالت ليها بحزم: يا بت هيي هسسس كفى بلاش قلة أدب أمك قالت ليك البت دي ما توريها غير العين الحمرا يعني ما توريها غيرها خلي بلا ما عندها ذنب بلا زفت معاك...
