بعد خالتي قفلت الخط في وشي ورمت لي كلامها الزي السم .. من الصدمة ما عرفتا أضحك ولا أبكي .. أصلا بعد الحصل لي ما مفروض أتوقع أنو في شي تاني ممكن يظبط معاي ولا مفروض أخت أحتمالية إني ممكن أفرح في يوم أو أكون مبسوطة لحدي ما أموت .. خالتي أخر واحدة فضلت لي في الدنيا وياااها هسي رفعت يدها مني وبقى ما عندي أهل بالمعنى الحرفي .. أنا بالجد بقيت ميامن المقطوعة من شجرة .. لا عندي أبو ولا عندي أم ولا عندي أخ ولا عندي خالة .. بقيت مع روحي براااي .. أتخذلتا وأتكسرتا بطريقة سيئة شدديييد .. وخسرتا أي حاجة وخسرتا معاهم نفسي وحياتي .. والله اعلم أنا عايشة بعد دا لسه ليي ... عاينت لي تلفوني لقيت في مكالمات كتيرة من خديجة .. ما قدرتا أرجع ليها لانو العبرة كانت واقفة لي في حلقي والكلام غالبني .. بس رسلتا ليها رسالة عادية وكتبتا ليها فيها: خديجة أنا كويسة ما تخافي علي وأطمنئي أنا في مكان كويس بس الكلام غالبني لاني تعبانة عشان كدا ما رجعتا ليك مكالمة .. وجوا قلبي كنت بقول إنتي ذنبك شنو عشان أشيلك همي وأخليك تتوجعي معاي إذا خالتي أقرب زول لي ما رضت تشيلو وتتقاسمو معاي! لي أجرجرك وأكلفك فوق طاقتك وأخلي الناس يهينوك ويزلوك بي سببي؟ ...
قالت لي ميامن إنتي بالجد كويسة ما تغشي علي! .. قلت ليها الفاس وقع في الرأس وأنتهى يا خديجة وبعد دا ما عندي حاجة أخسرها وبقى ما بفرق معاي شي وما مهم إذا أنا كويسة ولا لا لانو ما أظن أقدر أبقى كويسة بعد الشفتو في الفترة الفاتت ، ووجع القلب دا شكلو ح يبقى ورتين يومي مضطرة أتعود عليهو من هنا ولي قدام .. رسلت لي قلوب مكسورة وقالت لي والله ما عارفة أقول ليك شنو الإنتي فيهو ماف كلام بيخففو .. قلت ليها ولا يهمك ما إنتي قصرتي عملتي العليك وأكتر، يلا في أمان الله .. قفلت التلفون بالجنبة وجدعتو جنبي في السرير ... سرحتا بعيد .. وبقيت بفكر أنا ح يحصل لي شنو بعد دا؟ مصيري حيكون شنو؟ .. في عز تفكيري لقيت نفسي نمتا بدون ما أشعر ...
ما غفيت زي الناس وحسيت بي يدي زول بضربني على كفتي وبصحيني .. فتحتا عيوني ببطء .. لقيتو دا حمزة .. قال لي بنهرة: قومي يلا ، قومي سريع .. قمتا على حيلي وأنا بصلح في التوب وبختو على شعري كويس .. قال لي شاحني شلتيهو إنتي؟ .. بدون ما أتكلم معاهو مشيت جبتو من الكوبس وأديتو ليهو .. شالو بزهج وقال لي وأنا طالع هنا أبوي قال لي أناديك أنزلي ليهو تحت وشوفي مالو عايز شنو والحاجة البقولها ليك أعمليها بدون شوشرة وكلام كتتير مفهوم! .. وحرك لي رأسو وهو برفع في حواجبو .. عاينت ليهو ببرود وطلعتا من الغرفة بدون ما أفتح خشمي معاهو.....
وأنا نازلة في السلم وقفتا في النص عشان أصلح ربطة التوب بتاعي لانها فكت وكان ح يقع .. أثناء ما بصلح فيها حسيت بيهو جاي نازل وراي ... حاولتا أستعجل وأربطها بس قبل ما أربطها زي الناس سمعتو قال لي إنتي لسه واقفة هنا؟ .. ربطتها قوي وقبلتا عليهو .. أديتو نظرة سريعة كدا ونزلتا تحت بسرعة....
