عاين لي مسافة وبعدها قال لي يمكن عشان أنا زاتي ما عارف ، عشان لي الان ما لاقي تفسير معين لي الطريقة البقيت بتعامل بيها معاك ، عشان للإن ما عارف السبب القوي المخليني أتمسك بيك كدا شنو وأصر إنك ترضي وتسامحيني .. ما رديت عليهو وفضلتا ساكتة .. قال لي وهو بيمشي على السرير وبيشل في المرتبة: أحم المهم يا ستي أمسكي دي أشيل ليك السرير ، قبل شوية كنت بتهابل معاكي عشان كنت عايز أغيظك وداير موضوع أتكلم فيهو معاك لكن الصراحة حسيت نفسي عبييط وماف داعي لحركات الشفع دي .. وحكا شعرو بي يدو .. مسكتا منو المرتبة ونهائي ما فتحتا خشمي بكلمة .. شال السرير وداهو بي هناك وقال لي أختو ليك هنا؟ .. هزيت ليهو رأسي .. ختاهو وقال لي تمام تصحبي على خير .. وفات .. رقدتا وبقيت بتقلب في السرير ساااي وبفكر في القالو لي لمن كان حاضني .. قلتا يا ربي هو مالو! ولي أتغير شدديد كدا؟ معقولة يكون كلام خديجة صاح؟ لالا مستحييييل أصلا يحبني ، لكن طيب لي جا من الخرطوم وقال عاوز يصالحني يعتذر مني ومصر بالطريقة دي! ، مهما كان السبب الجابو ما أعتقد يكون عشان بحبني .. تاني قلتا مش ممكن يكون متفق مع أبوهو وعامل فيها ندمان على العملو قدامي عشان لمن أصدقو وأرجع معاهو يقدرو يستغلوني هو وأبوهو ويشيلو الارض مني؟ أيي لي ما ممكن! ، بس هو وقت كان بتكلم أتكلم بنبرة حنينة حسستني أنو جد صادق وجد ندمان ، أووووف ياااخ أنا مالي زاااتو بفكر فيهو كتتير؟ الموضوع دا على أساس أنو أنتهى من قبيل وأنا ما ح أرجع معاهو مالي طيب! .. قمتا على حيلي وأتنهدتا بزهج وقلتا بصوت عالي شوية: أي أي ما ح أرجع وتاني ما ح أفكر فيهو بس يلااا .. فدوى جات من المطبخ .. وقالت لي جنيتي بتتكلمي براك؟ .. قلت ليها ما جنيت لكن قربتا .. ضحكت وقالت لي يعني مصرة ما ترقدي بي هناك؟ .. قلت ليها يب .. قالت لي غاااايتو رأسك قوووي خلاص .. قلت ليها أساسا قوة الرأس دي أنا ستها .. مشيت جبتا تلفوني وقلتا بعد هو لقاني الفايدة شنو من إني أقفلو وأرميهو في الدولاب! .. رجعتا لي خديجة .. وقلت ليها خدوج .. قالت لي بت حلال هسي كنتا عايزة أضرب ليك .. قلت ليها شفتي كيف .. قالت لي اها الحصل شنو؟ قدرتي تعرفي حاجة؟ .. وريتها .. قالت لي عاد البت شقية خربتا عليك لو ما هي حمزة ما كان عرف ليك درب .. قلت ليها حرفيا ياااخ .. قالت لي بس ما قلتا ليك أنو حمزة بحبك؟ ما أتاكدي بعد جاك هناك؟ .. قلت ليها لا غلطانة لا بيحبني ولا شتين .. قالت لي أنا في وإنتي في والزمن بلف وبرجع يا ميامن وبتعرفي إذا هو بحبك ولا لا .. قلت ليها تمام تمام بس هسي عليك الله غيري السيرة دي لانها بقت تضايقني .. قالت لي أنا زاتي ح أقفل لانو وراي غسيل ماشة أغسل ملابس الشغل بكرة .. قلت ليها يا حليلك والله يا خديجة فقدتا أيام كنا بنشتغل سوا وفقدتا المصنع بكل تفاصيلو .. قالت لي واااي يا ميمي ما بتحلقيني الشغل بقى لي مسيخ من دونك .. قلت ليها أن شاء الله بنجتمع قريب يا زولة .. قالت لي أن شاء الله.....
اليوم التاني الجو من الصباح كان رهيب شدديد والمطرة صبت لكن ما كانت كتيييرة ووقفت في ساعتا .. بعد أتجهزتا وقفتا جنب باب الهول وقلتا لي صفا بصوت عالي: يلا يااااخ أمرقينا قبال ما المطرة تصب لينا هنا .. قالت لي جاااية جاااية .. حمزة جا لقاني بكورك ليها .. قال لي صباح الخير .. عاينت ليهو بطرف عيني وما رديت وقلت لي صفا: صفووية أسرعيي ... قال لي لو طالعين هسي ممكن أوصلكم بالعربية .. برضو ما رديت عليهو ولا أشتغلتا بيهو الشغلة .. صفا جات وقالت لي اها أنتهيت يلا أرح .. قلت ليها أخرتينا الطابور قرب يبدأ .. قالت لي خلاص ياني جيت .. أنتهبت لي حمزة وقالت ليهو صباح الخير .. قال ليها صباح النور ، ماشين المدرسة؟ .. قالت ليهو ايي .. قال ليها طيب تعالو أوصلكم معاي .. قالت ليهو طوالي ماف مشكلة .. في الأول كنتا عايزة أعترض وأقول ليها لا خلينا نمشي بي رجلينا أحسن بس تاني قلتا ماف داعي لي العباطة ما ح يفرق معاي كتتير إذا هو وصلنا ولا لا ، أنا مفترض أعتبر وجودو وعدمو حاجة واحدة وأوصل ليهو الاحساس دا عشان يعرف إني بالجد طويت صفحتو من حياتي وما ينتظر مني شي وما ينتظر حكاية رجوعي لي بيتهم تاني .. وكمان عشان أحيرو زيادة ركبت معاهو قدام .. قال لي بتقري شنو في المدرسة؟ .. سفهتو ولا قلتا ليهو أنت بتقول في شنو .. صفا قالت ليهو بتقرينا رياضيات وما شاء الله عليها شراحة شدديد البنات كلهم بتكيفو من شرحها وبحبو حصتها .. لاحظتا ليهو أداني نظرة سريعة وقال ليها ايي هي دايما في أي شي مميزة دي ما حاجة جديدة عليها بت العم .. صفا قالت ليهو فعلا مميزة أنا شخصيا أكتر مادة كنتا بكرهها وما بحب أقراها ولا أحضر صحتها هي الرياضيات لكن بعد جاتنا ميامن وبقت تقرينا ليها بي أسلوبها الحلو والمختلف بقيت بحبها جداً ، يعني مثلا لمن تكون في مسألة صعبة بتمثلها لينا بي حاجة حولينا ومن الواقع عشان نقدر نتخيل الحل ممكن يكون كيف وأهم شي أنها بتشرح شرح مبسط وبتبعد من التعقيد وبتميل لي أنها تكتر لينا من الامثلة وفي مسائل بتخلي جزء من البنات يحلوها عشان تشوف مدى أستيعابنا للفهم الهي قدرت توصلو لينا .. قال ليها طيب كويس شديد ياااخي .. قالت ليهو ايوا .. خلصو كلامهم كدا نحنا وصلنا المدرسة .. بعد خشينا صفا قالت لي مالك كنتي ساكتة وما شاركتينا في الونسة؟ .. قلت ليها لمن أكون زهجانة وما طايقة زول ما بحب أتكلم وبسكت .. قالت لي هسي عليك الله في واحدة عندها راجل وجيه وظريف زي راجلك دا بتزهج وتتضايق؟ .. قلت ليها في أنا .. قالت لي جاحدة نعمة بس .. قلت ليها عايني خليك من الفارغة دي عندي موضوع لازم أتكلم فيهو معاك .. قالت لي أها احكي .. قلت ليها دايراك تصاحبي سلوى .. قالت لي كيف كيف ما فهمتك! .. قلت ليها يعني تحاولي تتقربي منها وتبقي صاحبتها ، عايزاك تطلعيها من حالة الأكتئاب الهي فيها ، إنتي قولتي لي أنها كانت شاطرة ومستواها أتدهور ، وأنا عايزة أرجعها شاطرة زي زمان وعايزاها تجيب نسبة عالية ، الجانب النفسي مهم في أي حاجة بيعملها الواحد ، وما لم هو يكون مرتاح نفسيا ماف حاجة بتظبط معاهو ، وسلوى محتاجة زول يحسن من نفسياتها ويساعدها تتغلب على الظروف البتمر بيها عشان شغفها وحبها لي القراية يرجعو ، والمشكلة أنا برااي ك أستاذة ما بقدر أعمل الكلام دا ما لم إنتي تساعديني بما إنك زميلتها في الفصل ، يعني لمن يكون عندكم واجب في أي مادة أمشي ليها هي وأتغابي العرفة وقولي ليها إنك ما فاهماهو وخليها تشرحو ليك وشجعيها على القراية ومثلا لو بعد مشيتي ليها قالت ليك ما فاهمة إنتي أعملي نفسك بتعايني لي الواجب مسافة وبعدها قولي ليها اهااا ياداب فهمتها خلاص تعالي أشرحها ليك بما إنك قبل شوية قلتي ما فاهماها برضك وقريها معاك وكدا ، ومن ناحيتي أنا فما ح أقصر معاها وح أغصبها على تقرا .. قالت لي من عيوني ما عندي مانع ... قلت ليها ممتاز .. قالت لي صحي إنتي مالك مركزة مع سلوى دي شدديد كدا! .. قلت ليها ما قصة مركزة بس والله شفتها واحدة مسكينة وبتستاهل كل خيرر قلتا أساعدها ، وأنا الصراحة بعتبركم كلكم أخواتي الصغار وعايزة مصلحتكم وهسي لو كانت دي أي بت تانية من فصلكم غير سلوى كنتا أتعاملتا معاها بنفس الطريقة .. قالت لي أممم على فكرة نحنا محظوظين لانو عندنا أستاذة زيك .. أبتسمتا وقلت ليها شكراً ، يلا بعد دا أمشي فصلك .. هزت لي رأسها وفاتت...
