رغم إني أتوترتا من الطريقة الكان قريب بيها مني وأتوترتا من تعليقو على الاستوري بتاعي بس خالص ما حسستو أني متوترة أو أديتو وش وكنت بعاين ليهو بغضب وأنا ساكتة .. قال لي: لي ما أكلتي؟ عسجد ورتني إنك مابيه الاكل! .. قلت ليهو بطرف لساني: ما يخصكك .. أتجاهل الطريقة الاتكلمت بيها معاهو وقال لي: للمرة التانية مالك مابية الاكل؟ .. ما رديت عليهو وفضلتا ساكتة وبتنفرز .. قال لي لمن أكون بتكلم معاك ردي .. قلت ليهو ما دايرة أرد مش علي كيفي!! ياااخي حتى الكلام دا عايز تغصبني ليهو؟؟ .. قال لي على ما أعتقد لو رديتي ما فيها حاجة ولا الكلام بنقص منك شي!! .. طبعا كان بتكلم ومرة بعاين لي في عيوني ومرة بعاين لي الخربيش الفي طرف وشي .. وأخر حاجة قال لي الخربشك في وشك ورقبتك شنو؟ .. وأشر لي عليهم .. عاينت ليهو بضيق وقلت ليهو بزهج: يااااااخ أنت مالك؟ داير مني شنو؟ لي بتتصرف معاي بالطريقة دي؟؟ اااا؟ كل مرة بوش جديد! ما ممكن تخلوني في حالي وتبطلو تتدخلو في أي حاجة بتخصني؟؟ يااااخي أنا أمبارح حاولتا أنتحرتا بي سببكم ، أنت تكفتني وتبكيني وأمك تجي تتم الناقصة وتضربني بي وصلة الشاحن وتخربشني في رقبتي وأخر شي تجي حضرة سيادتك وبكل دم بارد تسألني منو الخربشني وتسالني لي ما عايزة تاكلي وكانو بهمك أمري!!! طيب يا سيدي ما عايزة أكل لانو أنتو ما خليتو لي نفس لي الاكل ، لانكم أنتو قتلتوني وأنا حية ، الموت أرحم لي منكم ، أنا عمري ما أحتقرتا زول زيك أنت وأهلك، ما تصدق بكرهكم قدر شنو .. قال لي بي أستغراب: أمي ضربتك؟؟ .. قلت ليهو ايي لي مستغرب؟ على فكره هي أمك أنت لكن ما أمي أنا عشان ما تضربني ، وبعد دا أريتها كان براها أختك وبت خالتك برضو ما قصرو وفشو غليلهم كلو فيني .. قال لي: ولي ضربوك؟ .. ربعتا ليهو يديني وقلت ليهو أمشي أسالهم .. قال لي بستهزاء: يعني إنتي ما ممكن توريني؟ .. قلت ليهو لا ما ممكن ولو سمحتا زح لي من الشارع لانو نفسي كتم وأنا واقفة جنبك .. زحا لي وقال لي على فكرة هي في النهاية مشاكل حريم بينك إنتي وهم وحتى ولو وريتيني ولا لا أنا ما كنت ح أتدخل فيها بس عايز أعرف السبب ومنو الغلط على التاني عشان لو جا يوم وأتفتح الموضوع دا أكون عارف الحكاية .. ضحكتا وقلت ليهو أصلا دا المتوقعاهو منك .. وأتحركتا من جنبو .. لمن قربتا أصل الباب قال لي بعد تبقي كويسة وتحسي نفسك أحسن لو دايرة تنزلي الشغل وريني عشان أرجع ورقك المصنع .. إتلفتا عليهو وقلت ليهو والغير رأيك فجاة شنو؟ مش قبل كم يوم كنت معترض ورافض الفكرة!! .. قال لي ما ضروري تعرفي المهم بس لو دايرة وريني .. يالله أساسا هو لو ما أستفزاني ما برتاح .. لويت ليهو خشمي ومشيت .. في قلبي قلتا يا ربي دا مالو؟؟ لي بتكلم معاي كدا ولي داير يرجع يوظفني تاني! أكيدد عندو فهم معين في رأسو داير يعملو ، أي أي أكيد..
بالمغريبة كنت مصدعة شدديد ورأسي كان ح يتفجر من الصداع لاني الصباح ما شربتا الشاي .. فتشتا لي حبوب بندول ما لقيتها ... مشيت المطبخ عشان أعمل الشاي لقيت مافي لا حليب ولا لبن بدرة .. رجعتا الغرفة لبستا توبي وشلتا معاي قروش وتلفوني ومشيت لي حمزة في غرفتو لقيتو برضو مافي .. نزلتا تحت عشان أفتشو شفتا خالتو عواطف والبنات قاعدين في الهول وبتكلمو .. وخالتو عواطف بتقول لي عسجد: فترتا زاااتو من الكلام الكتير معاك ، يا بت إنتي ما بتفهمي؟؟ أنا مش قلتا ليك العفنة دي تختيها وتاني ما أشوفك بتتعاملي معاها؟؟ .. عسجد قالت ليها أمي البت كانت عيانة وتعبانة ما فيها حاجة لو شلتا ليها الاكل ... خالتو عواطف قالت ليها العياا اليقتلا، دي لا عيانة ولا شتين مشينا ليها أنا وسمر لقيناها نصيحة زي الحصان تتفاصح سااي كان كاتلة حيلها قدامكم أنتو ، وبعدين تاكل ولا لا دي ما حاجة بتخصك بطريقتها مالك ومالا! تاكل متى ما دايرة ، بالله هي منو يا يمة لمن شايله ليها الاكل لي سريرها!! .. عسجد قالت ليها أمي إنتي ما فاهماني .. خالتو عواطف قالت ليها ولا دايرة أفهمك زاااتو وكان ناسية يختيي خالتك حذرتك وقالت ليك لو شافتك معاها بتخاصمك .. عسجد قالت ليها وح تعرفني كيف؟؟ إلا كان تجينا هنا أو أنتو توصلو ليها الكلام ولو وصلتو ليها ح تعملو فجوة بيني وبينها بس ما أكتر .. أمها قالت لي سمر وربا: عليكم الله أتكلمو مع اختكم دي وفهموها مصلحتا وين أنا غلبتني عددديل، غااايتو بس يا عسجد ما عارفاك رايدة فيها شنو لمن بتتجاري وراها كدي!! .. عسجد قالت ليها أمي والله ميامن مسكينة إنتي ظالماها ساااي .. خالتو عواطف قالت ليها ماف زول هنا مسكين غيرك إنتي المصاحباها ، المسكينة البتقولي عليها دي أمبارح حمزة كفت أختك بي سببا .. عسجد قالت ليها بخلعة: دا متيين؟؟ .. سمر قالت ليها قبل ما تعمل الدراما الحاليا غاشاكم بيها ، وأنا حالفة ما أخليها وكان ما قطعتا ليها لسانها البتتفاصح بيهو دا يبقى ما أسمي سمر .. أمها قالت ليها عفيييت منك يا بت بطني، شفتي كل ما عينك تقع في عينها أصلك ما تقصري معاها .. سمر قالت ليها ما بتوصي حريص وزي ما وريتك يا أمي بنظما ليك الصبر بس .. عسجد قالت ليهم كفاية ياااخ خلو البت في حالا خلاص الحصل حصل .. ربا قالت ليها: ولي تخليها؟؟ .. وقالت لي سمر: ما تشتغلي بي عسجد دي كتتير شكلو فلانة لاحسه ليها مخها عشان بقت تقعد معاها كتتير ... سمر قالت ليها أصلا ما شغالة بيها ....
