أول ما ركزتا في ملامحهم .. حسيت بي قبضة قووية في نص قلبي وتعابير وشي أتغيرت تلقائيا .. وهم من شافوني طوالي قامو على حيلهم ورفعو يدينهم نظام يشيلو معاي الفاتحة .. وأنا والله لو ما أتذكرتا مجدي أخوي في اللحظة ديك ما كان رفعتا يديني معاهم خالص .. وزاتو ما رفعتها زي الناس ونزلتها بسرعة ... أول واحد فيهم كان داير يسلم علي لكن أنا عملتا نفسي ما شايفاهو ومشيت قعدتا جنب خالتي وكنت بعاين ليهم بغضب وصارة وشي .. خالتي قالت لي يا بت سلمي على عمك ما شايفاهو مدا ليك يدو؟ .. ضحكتا وقلت ليها بستهزاء: ياتو عم دا؟ أنا من متين عندي أعمام يا خالتي؟ ااا من متين؟ .. هنا خالتي أدتني نظرة بعيونها وسكتت .. قبلتا عليهم وقلت ليهم الجابكم شنو! أن شاء الله خير؟ .. عمي قال لي جينا نعزيك ونشوف أحوالك ونتفقدك .. قلت ليهو هئه وجاي تعزيني بعد أربعة يوم؟؟ أربعة يوم كاملات يا العامل فيها عمي وجاي تتفقدني ياداب! ولا اااا نسيت إذا أنتو في وفاة أخوكم المن دمكم ولحمكم جيتو زي الغرباء ونصي ساعة ما عديتوها في بيت البكى ورجعتو أنا أتوقع منكم شنو في موت ولدو؟؟ كونكم جيتو بعد أربعة يوم دي حاجة بسيطة من المتوقع والله .. عمي التاني قال لي يا بتي أسمعيني.. قاطعتو بسرعة وقلت ليهو معليش لكن أنا ما بتك فما تنادي لي بتي، وبعدين دقيقة أنت أسمي بتعرفو بي الاول عشان تنادي لي بتي؟؟ .. سكت وما ردا علي .. قلت ليهو لا مش؟؟ .. عاين لي بس وما أتكلم ... قمتا على حيلي وقلت ليهم شكراً ليكم وكتر خيركم ما قصرتو أظن الزيارة أنتهت!! .. ودخلتا جوا ... قعدتا في نص السرير .. ولميت رجولي علي وبقيت ببكي .. بكيت لمن صدعتا ، وفي قلبي قلت ياداب عرفو أنو عندهم بت أخو؟ ياداب فكرو يكوسو لي ويتفقدوني؟ بعد ما بقيت براااي!! .... خالتي جات لاحقاني وقالت لي ما عيب عليك يا ميامن تتصرفي تصرف زي دا مع أعمامك؟ ديل أخوان أبوك في النهاية وواجب عليك تحترميهم .. قلت ليها ما أعمامي ولا حاجة أنا من قمتا لا بعرف لي عم ولا زول من أهل أبوي ولو ما جو يوم بكى أبوي وشفتا أشاكلهم ومجدي وراني صور لي واحد منهم يمكن قبلي شوية ما كان عرفتهم .. قالت لي برضو دا ما أسلوب ليك في الكلام معاهم .. قلت ليها خالتي علييك الله كفاية ما عايزة أسمع سيرتهم برااي الفيني مكفيني أنا فقدتا أبوي وأمي قبلي كدا وهسي فقدتا أخوي وعيالو وما أظن في أصعب من الحاجة دي ولا أظن في شي بفرق معاي بعد ما فقدتهم ولا بهمني زول تاني ، كفاية أني بقيت وحيدة .. قالت لي وأنا مشيت وين؟؟ .. قبل ما أرد عليها خديجة جات داخلة وقالت لينا الضيوف فاتو؟ .. خالتي قالت ليها ايي .. مرقت توبها وقالت لي وهي بتقعد جنبي: هم ديل منو أساسا؟ .. قلت ليها أصبري بوريك .. قالت لي طيب .. خالتي قالت ليها الملاح أنتهى؟ .. قالت ليها والله ما شوفتو كنت بغسل في العدة ومن أنتهيت جيت هنا .. خالتي قالت ليها ما مشكلة النقوم عليهو .. وفاتت...
عاينت لي خديجة مسافة بعدها قلت ليها إنتي ح تمشي بيتكم متين؟ .. قالت لي زهجتي مني ولا شنو؟ .. قلت ليها ابداً بس قبيل الصباح سمعتك لمن كنتي بتتكلمي مع أخوك وسمعتو قال ليك تعالي بعدا لانو قعدتي معاهم أربعة يوم وعملتي الواجب والصراحة كلامو صاح إنتي ما قصرتي والله وأمك محتاجة ليك برضو عشان تساعديها في شغل البيت .. قالت لي ما مشكلة بتكلم معاهو وبحنسو يخليني أقعد كم يوم زيادة .. قلت ليها خديجة ما تخافي علي أنا كويسة وخالتي ياها قاعدة معاي وبعدين أنا ختيت نفسي مكانك وأكيد لو أهلي كانو في ما كانو ح يخلوني أبيت برة البيت أربعة يوم دا حال أغلب البيوت السودانية ف متفهماكي وعارفة إنك ما عايزة تمشي بس مجبورة وعاذراك يا أختي .. قالت لي بمشي وبجيك بكرة من الصباح وبقيل معاك النهار كلو .. قلت ليها أن شاء الله تشرفي طوالي في أي وقت بس ما ح تمشي إلا تفطري .. قالت لي طيب....
