كنت بلولي فيها وبقول ليها دا وائل دا مش؟ خلاص ما تبكي بكرة من الصباح بدقو ليك سمح!! .. هزت لي رأسها وهي بتشهق من البكى .. بوستها في خدها ومسحتا ليها دموعها وكنت لسه بهز فيها وبغني ليها في اللول اللول يالله لدونة حبيبتي تنوم ، اللول اللول يالله بنيتي الحلوة تنوم .. ما عديت مسافة طويلة من بديت أغني ليها لقيتها نامت .. غطيتها ومررت يدي على شعرها وأنا ببتسم .. بعدها حضنتها ونمتا على طول....
الصباح صحيت بدري .. قومتهم عشان يمشو يجهزو .. وأول ما وائل قام .. مسكتو من جضمو وقلت ليهو تعال هنا أنت أمبارح ضارب أختك مالك؟؟ أنا مش قلت ليكم أوعى تتشاكلو أو تهبشها؟ بقيت ما بتسمع كلامي يعني يا وائل ولا شنو؟ .. قال لي أنا ما ضربتها .. قلت ليهو وكمان بتكذب؟ أنا عارفة أنو لو ما أنت ضربتها بالجد ما كان هي بكت ولا كان جات ورتني .. لمن قلتا ليهو كدا طوالي هو سكت .. رفعتا ليهو أصبعي بتحذير وقلت ليهو هووي يا وائل الله دا كم؟ أحسن ليك تفتح عيونك ديل كويس أنت عارف أنا الزول البكذب علي ولا بستغبيني بعمل ليهو شنو وبزعل منو كيف مش؟ .. حرك لي رأسو .. قلت ليهو طيب معناتو حركتك دي ما تتكرر تاني ويدك ما تصل أختك عشان ما نختلف وأوريك وشي التاني الانت حافظو زي أسمك فاهم! .. قال لي معليش .. قلت ليهو بحزم: المهم ما تكرر ، ويلا قوام أمشو أتسوكو أنت وأختك وتعالو .. قال لي طيب .. ومشو .. أتحركتا على دولابي عشان أطلع حاجاتي .. لقيت في كم حاجة ماف .. أتنفرزتا بزهج وعدم صبر ومرقتا برة .. بقيت بكورك بصوت عالي وقلتا: أستغفرك الله ربي ياااااخي أنا مش مليون مرة كلمتكم وحذرتكم وقلت ليكم حاجاتي دي ماف زول يهبشها؟ طيب الكلام دا ما عربي؟؟ ما بتفهمو أنتو؟ أوريكم أنا لي متين يعني؟ ..
خالتي جات طالعة من المطبخ وهي شايلة الكمشة البتقلب بيها الزلابية في يدها .. عاينت لي وقالت لي أصبحنا وأصبح الملك لله مالك بتكوركي من الصباح كدا؟ .. قلت ليها يعني حيكون في شنو غير أنو لدن ووائل هبشو دولابي ونفو لي الملابس وعندي كم حاجة ما لقيتها ما عارفهم لعبو بيها وودوها وين، والله فترتا من الكلام معاهم الاولاد ديل ح يجلطوني يا خالتي ... قالت لي إنتي براك عارفهم ما بسمعو الكلام وبهبشو أي شي .. قلت ليها يصبرو لي ح أدبهم .. قالت لي كدي هسي خليك من المشاكل وأمشي أستحمي والبسي عشان تجي تشربي الشاي قبل ما تمرقي الشغل .. قلت ليها طيب .. طلعتا برة الحوش لقيتهم لسه قاعدين في الوضاية وبتسوكو .. قلت ليهم بنهرة: خففو حركتكم دي شوية، أنا صحيتكم من متين لسه قاعدين لي هنا؟ .. هزو لي رأسهم وسريع سريع غسلو وشوشهم وقامو .. قلت ليهم: أمشو أشربو الشاي لحدي ما أنا أصلي وأجيب ليكم ملابسكم من الحبل مفهوم .. قالو لي حاضر ومشو .. أتوضيت وبعد خلصتا صلاة دخلتا ليهم في المطبخ .. لقيتهم شربو الشاي .. أديت وائل ملابسو .. وسقتا لدن من يدها ومشينا الغرفة عشان البسها .. وأنا بلبس فيها قالت لي ميامن .. عاينت ليها بحزم وقلت ليها في شنو؟؟ .. قالت لي خالتو منى ح تقعد معانا لي متين؟ .. قلت ليها ح تقعد لحدي نهاية الاسبوع لي مالك بتسالي؟ .. قالت لي لالا بس عشان بحبها وما دايراها تمشي مننا .. قلت ليها وأنا بلبس فيها الشراب: ما تخافي بتجينا تاني ، يلا أنزلي أمشي الجزامة جيبي جزمتك ألبسيها أنا خاشة أستحمى .. قالت لي طيب وجرت .. خشيت أستحميت ولبستا ملابسي وطلعت برة .. لقيت لدن جاهزة ومنتظراني .. وخالتي منى قاعدة جنبها وبتحضر في قناة الشروق .. شربتا الشاي بي الزلابية العملتها .. وقلت ليها اها يا خالتي أنا بعدا طالعة ح أغشي لدن الروضة أول وبعدها أمشي الشغل، وأنت يا وائل خليك منتظر الترحيل وأول ما يجي وتسمع صوت البوري أطلع طوالي وما تتاخر عشان ما يفوتك .. قال لي سمح ... خالتي قالت لي بس هاك عليك الله أدي معاك أيمان الزلابية والشاي ديل قبل تمرقي .. قلت ليها حاضر جيبيها .. شلتهم منها ومشيت حوشنا البي هناك لي أيمان مرت مجدي أخوي .. لقيت مجدي ماف صبحتا عليها وأديتها الشاي .. سألتني من لدن ووائل طمئنتها إني صحيتهم وجهزتهم ... قالت لي بالجد شكراً ما قصرتي معااي ماسكهم كأنهم أولادك .. قلت ليها ما هما فعلاً أولادي .. أبتسمت لي .. رديت ليها الابتسامة وطلعتا .. أول حاجة وديت لدن الروضة زي كل مرة يعني ووريتها أنها ما تطلع من الروضة مالم تجي خالتي تسوقها .. هي أصلا في العادة أنا بوديها وأيمان بتجيبها بس هسي عشان أيمان حامل وفي شهورها الاخيرة ما بتقدر على المشوار ف بقت تجيبها خالتي .. بعد وصلتها مشيت المصنع .. لقيت الشباب الشغالين معاي كلهم قاعدين وأنا جاية متأخرة كالعادة .. نحنا أساسا مكتبنا دا فيهو أربعة موظفين .. ولدين اللي هما إبراهيم ومحمد والبنات أنا وخديجة .. صبحتا عليهم وقلت ليهم عمو الطيب الليله برضو ما جا؟ .. خديجة قالت لي ايي ما جا قالو تعبان لسه .. قلت ليها يا حليلو أن شاء الله ربنا يتمم عافيتو فقدتو الصراحة .. خديجة قالت لي كلنا فقدناهو والله .. قلت ليهم طيب واها ح نعمل شنو في موضوع الحسابات الفترة الجاية! إنتو براكم شايفين كمية السوبر ماركت والدكاكين البطلبو بكتات الشاي ونحنا ما ح نقدر نتصرف مالم يرجع عم الطيب لي إدراة المالية!! .. إبراهيم قال لي على الأغلب ح يجيبو زول تاني يمسك المالية لحدى ما عم الطيب يبقى كويس لانو الشغل كلو متوقف على الحسابات البتدخل وتطلع من المصنع .. خديجة قالت ليهو شكلو ح يحصل كدا فعلا لانو أنا قبل كم يوم سمعتا كلام زي دا .. قلت ليهم غايتو ربنا يسهل .. وبقيت براجع في الملفات بتاعت المنتجات الطلعت خلال الاسبوع المضى وقارنتا بين كميتها وبين القروش الاندفعت فيها عشان أعرف هل حصل نقص ولا لا .. وفضلتا شغالة كدا لحدي نهاية الدوام....
