خالتي قالت لينا كلمتا فيصل يوصلكم وهو هسي منتظركم في العربية .. خديجة قالت ليها شكراً ليك يا خالتو ما قصرتي ومعليش لو عذبتكم .. خالتي قالت ليها أجي يا بتي دا كلام شنو دا! ماف أي عذاب .. خديجة أبتسمت وقالت ليها تسلمي .. خالتي قالت ليها الله يسلمك بس ما تنسي تجينا تاني بعد دا حفظتي الشارع!! .. قالت ليها أيي أن شاء الله بجيكم قريب .. وودعتها .. طلعنا برة لي فيصل .. وهو من ركبنا معاهو وأتحركنا كان بونس وبضحك فينا لحدي ما وصلنا بيت ناس خديجة ، أصلا فيصل دا بطعبو ظريف وفرفوش ما زي باقي أخوانو....
بعد وصلنا خديجة وكنا راجعين في الشارع .. قال لي رأيك شنو نشيل باسطة من المحل داك؟ .. قلت ليهو ممكن والله .. قال لي تنتظريني في العربية ولا تنزلي معاي؟ .. قلت ليهو لالا بنتظرك .. قال لي طيب ونزل .. جابها وجا قال لي شكلها ظااابطة وشكلنا ح نستمتع .. قلت ليهو الله ياااخي لي زمن ما أكلتها وكان نفسي فيها .. ضحك وقال لي كويس بركة الجبتها .. ضحكتا معاهو وسكتا .. نسبة لي أنو ناس خالتي ساكنين في أمبدة ونحنا وناس خديجة ساكنين في شمبات فالمسافة كانت شوية طويلة ووصلنا بعد مدة .. لمن جينا داخلين البيت صادفنا عمو مهدي بتوضى في الوضاية حقت الحوش .. من شافنا أنا وفيصل جايين خاشين سوا وشايلين أكياس في يدينا .. عاين لينا بصرة وش وعدم رضى لكن ما أتكلم ودخل جوا قبلينا .. فيصل بي هظار قال لي اووو الحكومة .. قلت ليهو أنت أساسا أبوك دا صعب كدا؟ .. قال لي يعني في بعض المرات بس هو برضو ظريف شدييد والله لكن لمن تكوني زولتو ... قلت ليهو وأنا بهز في رأسي: ايوااا تمام .. دخلنا جوا .. خالتي شافت الاكياس الفي يدنا .. قالت لينا جايبين معاكم شنو؟ .. فيصل قال ليها باسطة .. قالت لينا يا سلام تعالو تعالو .. مشينا قعدنا جنبها وبقينا ناكل مع بعض .. بعد أكلنا أتونستا معاهم شوية وتاني مشيت الغرفة لاني نعستا وحسيت نفسي عايزة أنوم.....
اليوم البعديهو كنت قاعدة في الهول وبتفرج على التلفزيون بشرود .. والقناة الفاتحاها كان في زول سألني منها ما عارفاها شنو .. بس بعاين لي الشاشة وبالي بعيدد .. خالتي جات قعدت في الكرسي الجنبي وقالت لي لالا دي ما حالة دي .. أنتبهتا معاها وقلت ليها مالك؟؟ .. قالت لي كان ما شفتي الاولاد مكركبين لي البيت كيف قبل شوية مشيت الصالون بي هناك لقيت عليهو حالة بطاله أسكتي ساااي بس وسخ هو نان وجنس بشتون والعجب الغرف الملايات نصها في الارض ونصها التاني في السرير والاكياس حقت الشبس واللغويس البياكلوها دي مجدعة تحلفي تقولي كوشة .. قلت ليها دا حال الاولاد .. قالت لي غااايتو بس الحمد لله هسي عايزة أرتاح شوية وقايمة عليهم وتاني جاية أسوي الفطور .. قلت ليها أنا ممكن أساعدك وأنضفهم ليك وإنتي سوي الفطور بس .. قالت لي ممكن برضو .. قلت ليها مش الصالون وغرفة مصطفى وغرفة فيصل وعبدالرحيم؟ .. قالت لي ايي .. قلت ليها تمام ماشة أنضفهم مسافة إنتي تسوي الاكل .. قالت لي طيب الله يديك العافيه يا بتي .. أبتسمتا ليها ومشيت .. بديت أول حاجة بي الصالون وعلى قول خالتي عليهو حالة بطالة هو وغرفة فيصل وعبد الرحيم، الوحيدة الاخف قدرا كانت غرفة مصطفى لانها ما كانت محتاجة نضافة شديدة بس شوية تنظيم وترتيب .. بعد نضفتهم جبتا ملايات جديدة وبقيت بفرش فيهم .. وأنا بفرش في سرير غرفة مصطفى في ورقة صغيرة مكرفسة وقعت من الملاية الكانت أصلا مفروشة .. أنا أساسا قبل ما ابدا أفرش فضيت السلة من الوسخ الكان فيها وما جبتا ليها كيس تاني.. ف مشيت جبتا كيس جديد .. لبستو السلة ورميت الورقة فيهو بعدم أهتمام ورجعتا رتبتا الغرفة وبخرتها .. بعد خلصتا خالتي قالت لي شكراً ليك يا بتي تعبتي الليله ... قلت ليها أجي يا خالتي من متين ونحنا في بينا شكر؟ ... قالت لي جات عفوا ما تركزي .. هزيت ليها رأسي وقلت ليها اها الفطور شنو؟ .. قالت لي كسرة رهيفة بملاح نعيمية .. قلت ليها احاااااا ريالتي من هسي سالت .. قالت لي ما تخافي ما ح تنتظري كتير لاني زاتي أنتهيت يلا أرح .. شلنا الاكل ومشينا الهول .. ونحنا بنفطر خالتي قالت لي والله يا ميامن صحبتك الاسمها خديجة دي عجبتني شدييد ودخلت في مزااجي .. عاينت ليها برفعة حاجب وقلت ليها عجبتك!! .. قالت لي ايي ، هي مخطوبة؟ .. ضحكتا وقلت ليها ما مخطوبة لكن شفتي لو عايزاها لي واحد من أولادك أنا ممكن أخليها تعرس أي واحد منهم ما عدا مصطفى دا نهائي ما بعرس ليهو صحبتي .. قالت لي غااايتو نفسي يوم تتفقو إنتي ومصطفى .. قلت ليها اليوم دا إلا يكون واحد فينا عيان ولا داير يموت .. ضحكت وقالت لي عاااد أنتو أستغفر الله بس .. قلت ليها صحي بمناسبة خديجة ذكرتيني أتصل ليها لانو أنا من وصلناها أمبارح تاني ما أتكلمتا معاها .. قالت لي سمح أضربيلها .. أتناولتا تلفوني من الطربيزة ورنيت عليها .. من ردت قلت ليها خديجة عثمان .. قالت لي أهلين بالحلوة .. قلت ليها كيفك؟ .. قالت لي تمام الحمد لله .. قلت ليها في الشغل ولا في البيت؟ .. قالت لي في الشغل .. قلت ليها ايواا بس حبيت أطمئن عليك لانو.... قبل ما أكمل كلامي سمعتا صوت زول بقول: زميلتكم الرابعة الليله برضو ما جات؟ .. خديجة قالت ليهو أيي لسه ما نزلت من الاجازة، أخوها أتوفى زي ما وريناك .. من سمعتا صوتو وسمعتا رد خديجة ليهو تلقائيا عرفتا أنو دا أستاذ حمزة .. سمعتو قال ليها: تاخد أجازة كل المدة دي عشان الوفاة الليها أكتر من أسبوعين؟ المعروف أنو الفراش بكون تلاتة يوم بس وبعدها الناس بترجع لي حياتها الطبيعية ومفروض تكون نزلت من رابع يوم لانو الشغل شغل والحياة الشخصية ما ليها دخل فيهو .. خديجة قالت ليهو والله يا أستاذ هي نفسيا ما كويسة ولا قادرة تتخطى موت أخوها بسهولة والشغل صعب عليها الفترة دي .. قال ليها برضو دا ما مبرر ليها عشان تغيب مدة طويلة كدا وإذا ما بتقدر تستقيل طوالي ماف زول ماسكها من يدها وجابرها تستمر في الشغل، أنا كل يوم بجي مكتبكم هنا وبقول ح أنها تداوم الليله وبديها فرصة لكن بلقاها مافيشة والصراحه إتساهلتا معاها كتتير .. هنا خديجة سكتت .. قال ليها قولتي لي أسمها منو هي؟؟ .. قالت ليهو ميامن ، ميامن أحمد .. قال ليها أمممم المهم كلميها وقولي ليها أنو معاها لي يوم التلات إذا ما جات تعتبر نفسها مفصولة ... قالت ليهو طيب .. أظنو بعد خلص كلامو وفات حتى هي أنتبهت لي وقالت لي هيي إنتي لسه معلقة في المكالمة؟ .. قلت ليها أيي وسمعتا القالو ليكم السخيف دا كلو .. قالت لي اها وح تعملي شنو؟ .. قلت ليها ح أعمل شنو يعني للإسف ح أضطر أنزل يوم التلات ما عندي حل وما حابة أخسر شغلي لاني ما ح القى واحد تاني زيو بسهولة وأنا بقيت مسؤولة من نفسي ولازم يكون عندي دخل ثابت أقدر أعيش منو .. قالت لي فعلاً ربنا يسهل .. قلت ليها احيي شاحدة ربي الايام تمشي بطيء عشان ما أقابل خلقتو الشينة دي قريب .. قالت لي ما تحلمي كتتير يختي التلات قريب وبكرة تلقيهو جا ومصيرك تقابليهو وتتعذبي معانا .. قلت ليها ههه ما ظريفة خالص يلا أقطعي وشك .. وقفلتا الخط فيها .. خالتي قالت لي دا منو الما دايرة تقابليهو قريب دا؟ .. قلت ليها مديرنا الجديد والله يا خالتي إنتي ما شفتيهو واحد كدا لئيم لامة وكلنا بنكرهوو، بس جنو يتآمر فينا ومختلف تماماً عن عمو الطيب .. قالت لي أوريك نوعو دا نوع الناس الجادة شديد في حياتها والدايما بتمشي دغري ودايرة الناس الحولينها برضو تكون دغرية زيها وتعمل شغلها على أكمل وجه وبدون تقصير ف بس أنتو حاولو أتعاملو معاهو بي مسايسه وجدية في أمور الشغل والبقولو ليكم أعملوهو زي ما هو طلب وأموركم بتظبط معاهو .. قلت ليها مع أنو ما أظن لكن نحاول نجرب نتعامل معاهو بالطريقة القولتيها ما خسرانين شي .. قالت لي ايي اها وتاني خديجة قالت ليك شنو؟ .. قلت ليها قالت لي أنو هو نبه على وقال لازم أنزل الشغل يوم التلات البعد بكرة دا ولا أعتبر نفسي مفصولة وقال شنو قال غيابي طويل وما ليهو مبرر ومفروض من رابع يوم لي البكى أجي المصنع وأشتغل وأنسى إني قبليها بكم يوم فقدتا أخوي وأولاودو بكل بساطة وبرودة دم عليك الله شوفي الكائن الما طبيعي دا! .. قالت لي على قولك بصِح ما طبيعي أتفقو يوم إنتي وزملائك الفي المكتب أدوهو دقة نضيفة وبعدها ودوهو التجاني الماحي .. وضحكت .. ضحكتا معاها وقلت ليها بهظار فكرة برضو عشان نتخلص منو ونعالجو في نفسي الوقت .. قالت لي مش؟ .. قلت ليها وأنا لسه بضحك: أيي.....
