مشيت الميدان لكن ما لقيتو هناك .. قلتا يا ربي هسي دا بكون فات وين؟ .. إتلفتا بي جاي وبي جاي ما شفتو .. على طول مشيت على جهة الدكان بتاع الحلة .. لقيتو مترصي ليهو مع شلة من الاولاد في المصطبة بتاعت الدكان .. وفي أتنين من الاولاد كانو بسجرو جنبو وهو بضاحك معاهم .. عاينت ليهو بغضب وقلت ليهو بنهرة: وائل .. سمعتا واحد من الاولاد بتكلم مع التاني وبقول ليهو عمتو المزة جات .. حمرتا ليهم .. ورجعتا عاينت لي وائل تاني .. هو طوالي قام على حيلو وجاني .. قلت ليهو يلا قدامي سرييع .. ومسكتو من يدو ومشينا البيت .. من وصلنا سوقتو لي أمو وأبوهو ... وقلت ليهم عارفين لقيتو وين؟ .. مجدي قال لي بي أستغراب: مش في الميدان؟ .. قلت ليهو لااا ، لقيتو قاعد ليهو مع شلة من الاولاد فيهم البسجر وفيهم البتلفظ وفيهم البشاغل .. مجدي الكلام دا ما عجبو وأدى وائل نظرة حادة وصر ليهو وشو .. أما أيمان ف كانت بس واقفة بتعاين لينا وساكتة .. ولسة أحساس أنها ما عايزاني أشاكل ولدها كان واصلني .. فكيت يدو وقلت ليهو لا يا وائل دقيقة أنت فهمك شنو! يعني عامل فيها بتكسر كلامي البقولو ليك ولا شنو بالظبط؟ وعلى فكرة أنا شايفاك الايامات دي أي شي أحذرك منو بقيت بتعملو وكانك بتكاوي فيني مثلا؟؟ .. قال لي أنا ما كسرتا كلامك .. قلت ليهو بنهرة: وائل!!! الله دا كم؟ ما تستغبيني، وبعدين أنت لي ما عايز تفهم أنو أنا لمن أمنعك من حاجة معناتو الحاجة دي بتضرك ، ويا أخوي أنت كان قايلني بخليك ترجع البيت على كيفك ومتى ما عايز تبقى غلطان وهدي قدام أهلك ديل بقول ليك أنا تاني لو لقيتك برة الشارع بعد المغرب بكسر ليك رجلينك ديل، كمان داير تتابع لي الشلليه العطاله!! الليله شربو السجائر جنبك بكرة أنت ح تشربها معاهم وبعديها ما معروف الح يحصل شنو، ولا كدي أنت عارف المباريهم ديل عمرهم كم وأكبر منك بي كم؟ طيب عارف تصرفاتهم البعملو فيها دي ح تأثر عليك وعلى مستقبلك قدر شنو؟ أنت لسه صغير ولسه قدامك مشوار طويل ولسه ح تشوف حاجات أفظع من شرب السجاير والفارغة الكانو بعملو فيهو الاولاد الكنت قاعد معاهم قبل شوية .. أبوهو قال ليهو وائل الكلام دا ما صاح في حقك وبالمناسبه زعلتني شدديد منك لانو بعد ما عمتك حذرتك أنت ما أشتغلتا بي كلامها وقعدتا برة البيت لي المغرب، هي دايرة مصلحتك يا وائل .. قال ليهو لكن يا أبوي أصحابي كلهم عادي بكونو قاعدين في الشارع لي بعد المغرب .. قلت ليهو أصحابك نحنا ما عندنا شغلة فيهم نحنا البهمنا أنت وبس وأنا بهمني إنك تكون ماشي في طريق عديل عشان بعدين تكون راجل ود رجال مش واحد صايع قاعد قدام الدكاكين ومباري ليهو شلة شمال والوقت كلو حارسهم ولا شغلة ولا عملة ... أبوهو بنبرة حازمة قال ليهو أعتذر من عمتك سريع وقول ليها إنك تاني ما ح تقعد برة البيت لي المغرب .. قلت ليهو أنا ما دايرة منو أعتذار أنا دايرة فعل حقيقي، وعشان عملتا كدا أنت ممنوع تطلع من البيت غير لي المدرسة، المدرسة وبس يا وائل ولعب في الميدان ما دايراهو لمدة يومين، الترحيل ح يجي يسوقك من جنب الباب ويرجعك جنب الباب وأنت ح تدخل وتاني مرقة ماف ليومين مفهوم؟ .. كشر لي وشو وقال لي أبوهو أبوي أتكلم معاها .. أبوهو قال ليهو القالتو عمتك أنت ح تعملو ولو طلعتا فانا الح أعاقبك بدلها .. قعد يصرخ ويكورك ويقول لينا بطلع ، بطلع بس .. مسكتو من يدو فوق بقوة وقلت ليهو بنبرة حادة: حذاراك تاني مرة تصرخ في وش أبوك أو الزول الاكبر منك كدا فاهم! وائل أنت بتقعد معاي بي هناك أكتر من ما بتقعد مع أبوك وأمك وأنا مراعياك ومربياك من وأنت صغير وأنا ما ربيتك على التمرد دا وربيتك على إنك تسمع كلام أبوك والاكبر منك وما تقل أدبك عليهم، يلا بسس شفتا دي الحركات الما عايزاك تتعملها من الشوارع .. سكت وما ردا علي .. قلت ليهو قول لي أبوك أنك أسف وتاني ما ح تكرر الحركة دي .. أعتذر من أبوهو .. لكن مجدي ما قال حاجة وفضل ساكت عشان يحسسو بالذنب ودخل جوا .. أيمان قالت لي قسيتو على الشافع في النهاية هو طفل وما فاهم ليكم حاجة .. قلت ليها يا أيمان نحنا لو خليناهو على كيفو وما علمناهو الصاح من الغلط واتحججنا بي أنو هو لسه طفل بكرة فجأة ح يكبر وح نلقاهو ضاع من يدنا لاننا مدنو حريتو من هو صغير .. في اللحظة ديك يادوب حتى حسيت بيها عرفت إني ما بشاكلو ساااي وكلو عشان مصلحتو .. سوقتا وائل معاي ومشيت بي هناك .. قعدتو في الكرسي .. وقلت ليهو شفتا هسي أبوك زعل منك وتاني ما ح يتكلم معاك لانك ما أحترمتو وعليت صوتك عليهو .. عيونو رقرقو وقال لي طيب أعمل شنو عشان يرضى؟ .. قلت ليهو ما تكرر العملتو دا تاني وتسمع الكلام .. قال لي حاضر .. هبشتا شعرو بي يدي وقلت ليهو ما أكلتا صاح؟ .. قال لي ايي .. قلت ليهو دقيقة ... جبتا ليهو أكل .. أكل وبعد أنتهى قلت ليهو أمشي أستحمى عشان تجي تنوم وبكرة من الصباح دايراك تمشي لي أبوك تعتذر منو وتراضيهو طيب؟ .. قال لي طيب .. وفات الحمام...
