ما عرفتا أرد ليهو بشنو وكل العملتو هو أني أبتسمتا وقلت ليهو يلا كدا رأسي ح يكبر .. قال لي لا بالجد أنا جادي معاك ، إنتي أنسانة مميزة وذكية كمان .. قلت ليهو عارف المحيرني أكتر من كلامك دا شنو؟ .. قال لي اها؟ .. قلت ليهو إنك أنت القاعد تمدح فيني، يعني والله أنا حتى في أحلامي ما كنتا متخيله أنو أنت ممكن تمدحني .. ضحك وقال لي الليله بالذات كان ضروري أقول ليك الكلام دا لانك حقيقي بتستاهلي المدح يا بت العم .. قلت ليهو دقيقة أنت كلمة بت العم الشابكني فيها دي شنو؟ ما عجبتني ياااخ بفضل إنك تناديني بي أسمي بس .. قال لي لا ، خلي بقية الناس هم الينادوك بي أسمك وأنا ح أناديك بيها من هنا ولقدام خصوصي بعد وريتيني أنها ما بتعجبك ما هو لازم أغيظك .. قلت ليهو أصلا أنت لو ما غظتني يعرفوك حمزة البدري كييف؟ .. ضحك وقال لي مش؟ .. هزيت ليهو رأسي ولملمتا الكبابي ومشيت .. خديجة من جيت قعدت تشاغل فيني وقالت لي أشي علييك يا خطيرة أبدعتينا بذكائك .. قلت ليها أحم أحم صحبة منو في النهاية؟ .. قالت لي بتفاخر: خديجة عثمان .. قلت ليها بالظبط كدا ، المهم هسي تعالي نشوف موضوع الاعلان .. قالت لي طيب .. وقعدنا كلنا مع بعض وبقينا نفكر ونفتش لي حوار يكون أساس الاعلان .. خديجة قالت لينا أنا عندي ليكم أقتراح .. ابراهيم قال ليها قوليهو .. قالت لينا الحوار ممكن يكون بين شلة من البنات ساكنين في نفسي الفريق ويكونو متجمعات في بيت واحدة منهم بالضهرية كدا ، وكل واحدة تكون بتتكلم مع التانية وداير بينهم كلام لطيف زي كلام البنات المعتاد داك ، بعد شوية واحدة منهم تمسك الجردل وتقعد تغني وباقي البنات يشيلو معاها لكن على شرط الاغنية اليغنوها تكون واحدة من أغانينا السودانية العادية دي وما تكون أغنية مخصصه لي الشاي عشان ما يبقى الاعلان زي باقي الاعلانات ، وممكن نختار أغنية متادولة حاليا في السوشل ميديا والناس بغنوها كتتير وبحبوها عشان تحببهم في الاعلان أكتر ، المهم وهما بغنو وعاملين جو فجأة تجيهم صحبتهم ست البيت وتقاطعهم وتكون شايلة صينية شاي في يدها وتقول ليهم القعدة دي ما ناقصها إلا الشاي ، وواحدة تانية تشيل منها كباية وتقول ليها وشاي كوفتي أصلو ما بقصر معانا ودايما موجود في أحلى جمعاتنا وهكذا يعني ، ممكن لو بقينا على الحوار ننسق الكلام سوا ... قلت ليها حلووو والتنفيذ حيكون أحلى لانو الزول لو أتخيل سااي شكل بنات وهما متجمعات وبضحكو وبتونسو وفجاة بقو يغنو ويشربو في الشاي بشوف أنو المنظر حلو وكيوت .. قالت لي فعلا .. قلت ليها تمام ح نعتمد فكرتك ، في زول عندو أعتراض أو أي أقتراح تاني؟ .. قالو لي لالا .. وأبراهيم قال لينا أها طيب وبالنسبة لي القناة ح نختار ياتا؟ .. قلت ليهم أنا غاايتو بقول سودانية 24 .. محمد قال لي وأنا البلد .. خديجة قالت لينا وأنا مع ميامن .. ابراهيم قال ليها وأنا البلد .. قلت ليهم يا سلام تعادل معناتو ح نمشي لي أستاذ حمزة وهو الحيحسم التعادل لكن عاينو ما نوريهو أنو أتعادلنا بس نسألو وبعد يختار نوريهو .. قالو لي طيب .. ومشينا ليهو .. محمد قال ليهو أستاذ حمزة لقينا أعلان ظريف نسويهو وحاليا بنختار في القناة وعايزين نسألك أنتا بتصوت لي ياتو واحدة من الاقترحتهم ميامن؟ .. سكت مسافة وبعدها قال لينا أممم بختار سودانية 24 .. قلتا ليهو يسسس والله قلبي كان حاسي أنو ح تختارها .. قال لي لانو هي فعلا بلد في شاشة زي ما بقولو وما شاء الله شعبيتها كبيرة وجودة العروض عندهم زااتها ممتازة وجبارة .. ضربتا يدي مع يد خديجة وقلت ليهم يييي فزنا عليكم ، ولاااا .. ابراهيم قال لي بغيظ: خلاص عرفنا أسكتي .. قلت ليهو أبيت .. وبقيت بكاوي فيهو لحدي ما رجعنا المكتب .. قلت ليهم يالله أتحمستا شدديد لي الموضوع .. محمد قال لي ما بتلحقيني ، مع أنو المفروض الشغل الزي دا ما يكون قسمنا مسؤول منو بس نعمل شنو لو نحنا مبدعين وبنفكر بطريقة ذكية أكتر من غيرنا .. قلت ليهو حرفيااا ياااخ .. خديجة قالت لينا لو سمحتو بطلو تفاخر يا سلاطين زمانكم وأرجعو لي شغلنا الاساسي الحسابات راجيانا .. قلت ليها أخخ ما تذكريني .. قالت لينا يلا يلا كل واحد على شغلو .. عملنا زي ما هي قالت وبقينا نشتغل......
