لا حولاا يا ولد أنزل من ضهري ، بدر الدين ياااخ زح مني وخليني أتكلم مع أبوك .. الوو أيي يا حمزة قلتا ليك البامبرز ، البامبرز حق جود ما تنساهو .. يا جنا ما تنزل من ضهري! .. وأنتا والله يا حمزة تنساهو المرة دي إلا أنسيك أسمك .. قال لي خلاص فهمتا دي المكالمة الخامسة من الصباح تذكريني فيها أجيب البامبرز .. قلت ليهو وأريتك بعد دا كلو تتذكرو .. قال لي ما بنساهو يلا أقفلي أنا وراي شغل ما فاضي ليك .. قفلتا الخط وأنا بلوي في خشمي .. عليك الله شوف الراجل دا ، كان ما ضربتا ليهو وذكرتو يقعد يعمل لي موضوع من يرجع ويقول لي إنتي ما ضربتي وذكرتيني وإنتي عارفة أنو أنا وراي مليون شغلة مفروض أسويها وما بكون مركز .. وكان ضربتا يقعد يتزهج ويتنفرز فيني ، غااايتو الليله بس كدي الليجي كان ما حددتها معاهو يبقى ما أسمي ميامن .. مسكتا بدر الدين من يدينو وقلت ليهو تعال هنا أنا مش قلتا ليك لمن أكون بتكلم مع زول بالتلفون ما تجي جنبي؟؟ وكمان طالع فوق ضهري وعامل فيها ما بتسمع الكلام! .. قال لي ماما ياااخ فكيني .. وكان داير يبكي .. فكيتو وقلت ليهو أمشي البس سفنجاتك سرييع .. قال لي نازلين لي ناس حبوبة؟ .. قلت ليهو يعني حيكون وين؟ أمشي خلي النضمي .. جرى جاب سفنجاتو وأنا شلتا جود في صفحتي ونزلنا تحت .. لقينا خالتو عواطف قاعدة في الصالة .. قلت ليها خالتي قيلتي كيف؟ .. قالت لي تمام الحمد لله .. أديتها جود وقلت ليها عسجد وين؟ .. قالت لي جوا تسوي في القهوة .. قلت ليها طيب .. مشيت ليها في المطبخ .. وقلت ليها يا عرووس .. قالت لي أخخ أسكتي سااااي العروس زهجانة وزعلانة .. قلت ليها لي مالك؟ .. قالت لي كلو من عامر دا ، يعني هسي في داعي يحدد العرس بعد شهر ويختني قدام الامر الواقع ويجبرني أرضى! .. قلت ليها المشكلة شنو بالظبط لو اتحدد بعد شهر؟ .. قالت لي ميامن أنا ما جاهزة وشهر بسيط عديل عشان أجهز حاجاتي ، ولسه كمان منتظرة سمر تجي من السعودية وإنتي عارفة أنها داخلة على التاسع خايفاها تولد وما تقدر تحضر عرسي .. قلت ليها أممم الصراحة كلامك فيهو نوعا ما من المنطق ، بس إنتي كدي حاولي أقعدي مع نفسك وأحسبي لي ولادة سمر بالتفصيل وأكتبي الحاجات العايزة تعمليها كلها وشوفيها بتاخد كم وقت وتكلفتها كم ولو لقيتها ما ممكن تظبط خالص حاولي تاني مع عامر وخليهو يأجل الموعد شوية وبالهداوة بتقنعيهو .. قالت لي أن شاء الله عااد .. قلت ليها كدي خلينا من المواضيع البتعكر المزاج وأرح أدينا فنجان من قهوتك الرهيبة دي خلينا النشربو ونقوم علي شغلتنا لسه وراي غدا ما سويتو ، هيي صحي أنتو الليلة غداكم بي شنو؟ .. قالت لي فاصوليا .. قلت ليها بسس خلاص معناتو ماف داعي أسوي أكل غدو معاكم ولدكم ، وأنا وأولادي بناكل بطاطس محمره ، تعبانة وكسلانة أعمل ملاح ياااخ وحمزة ما برضى لي بي البطاطس .. ضحكت فيني وقالت لي سمح بنديك ليهو حبة ملاح .. قلت ليها أصلكم ما بتقصرو ، نسابة السرور .. قالت لي والله إنتي يا ميامن حناكة شدديد .. ضحكت وقلت ليها من يومي.....
مرت كم سنة من رجعتا من دارفور .. وفي السنين دي المضت في حاجات كتتيرة أتغيرت وأولها علاقتي مع خالتو عواطف وسمر ، أيي صاح هما لسه ما بحبوني بس بدو يتقبلوني وبقو بتعاملو معاي بطريقة عادية وأحسن من الاول ، يعني زمان خالتو عواطف لمن أجي أتكلم معاها ما بترد علي وبتسفهني .. لكن من ولدتا بدرالدين ولدي الحاليا عمرو ستة سنة بقت بتتجاوب معاي شوية شوية ، يعني مرة ترد لي ومرة لا على حسب مزاجها .. وسمر ديك من أتخرجت طوالي عرست أنس ولد عمي صالح وأستقرو هما الاتنين في السعودية وهسي حامل بي طفلها التاني ، وزي ما بقولو البعد محنة وبعد هي سافرت برة و دخلت في جو أسرة جديدة وجو نسابة قلبها حن علي شوية وبقت بتحاول تتقبل فيني ، حتى لمن تضرب تلفون وأكون قاعدة ويوروها بتقول أدوني أسلم عليها ، وهي وأمها الاتنين بموتو في حاجة أسمها أولادي ، حبوبتهم دي أساسا ما بتنزلهم من يدها وطوالي هم معاها تحت ، ما بترضى فيهم الهبشة ولو أنا شاكلتهم قدامها بتشاكلني .. أما عسجد ف أتخطبت لي زمليها في الشغل وعرسهم غالبا ممكن يكون بعد شهر لسه ما معروف .. وربا بت خالتهم كملت معانا الجامعة ورجعت أهلها .. لكن لحدي ما فاتت أنا وهي ما بنطيق بعض .. لانها كانت على طول بتحاول تتححك في حمزة مع أنو حمزة ما مديها فرصة نهائي .. بس نقول شنو اللصقة بفضل طول عمرو لصقة...
