لمن شفتو قدامي أتخلعتا شدديد وأتحيرتا دا الجابو مع أعمامي شنو!! .. بس هو كان واضح عليهو أنو ما أتخلع زي ما أنا أتخلعتا يمكن عشان وصلني المرة الفاتت وهسي لمن جا هنا عرف أنو دا بيتنا وعرف أنو ح يقابلني .. أتجاهلتو ولا كاني بعرفو عشان أساسا ما شغالة بيهو كتتير ولا بهمني أعرف صلة القرابه بينو وبين أخوان أبوي شنو لانها ما ح تفرق معاي بي شي .. قلت لي أعمامي وأنا مستغربة من جيتهم: غريبة جيتو مرتين في أسبوعين! دي ما حاجة طبيعية أهم شي تكونو كويسيين وما عليكم عوجة بس؟ .. واحد منهم قال لي خلينا ندخل ونتفاهم .. قلت ليهم والله لو ما أهلي ربوني على إني أحترم أي زول بجينا في البيت وأستقبلو حتى ولو كان أكتر زول بكرهو وعندي معاهو مشاكل ما كان خليتكم تخشو لانو ماف حاجة بتخليكم تجوني ولا في حاجة بتخليكم تتكلمو معاي بعد الزمن دا كلو .. وزحيت ليهم من جنب الباب .. سكتو ودخلو جوا .. بعد قعدو جبتا ليهم موية وطفيت النار الولعتها لاني عارفة جيتهم دي ما ح تعدي علي خير وشكلها ح تتطول .. أديتهم الموية وقعدتا في طرف الكرسي .. عمي قال لي والله يا بتي وبصراحة نحنا من يوم المات أخوك وبالنا مقلق عليك وشايلين همك لانك بقيتي وحيدة وعمك البدري دا قال لي إلا نجي ونسوقك معانا عشان تكوني قدام عيونا وزااتو عشان ما بنقدر نخليك قاعدة في البيت مرا براك وما معاك راجل .. لحظتها قعدتا أعاين ليهو مسافة وأنا بحاول أستوعب المسلسل الدرامي القاعد يحصل قدامي .. وقلت ليهو بالله يعني أنت هسي جاي وعايز تقنعني إنك خايف علي ودايراني أصدقك وأمشي معاك بكل بساطة؟؟ مفتكر أنو الموضوع بالسهولة دي؟ يا حليلك والله .. قال لي إنتي بت أخونا ونحنا أهلك في النهاية وشي طبيعي نخاف عليك .. طبعا لمن قال لي كدا الغضب أتملكني وقمتا على حيلي بسرعة وقلت ليهو بعصبية وأنا منفعلة وحاسة نفسي بتنفس بي ضلوعي من الغضب: أخوكم؟؟؟ هو أنتو بتعرفو شنو لي أخوكم لدرجة جايين وعاملين فيها خايفين علي!! يعني بس عشان جيتو كم دقيقة في بكاهو بقى أخوكم خلاص؟ على فكرة أبوي لحدي ما مات ما كان معتبر أنو عندو أخوان أنتو كنتو بالنسبة ليهو مجرد ناس بتربطو بيهم علاقة دم غصب عنو، أبوي ما كان بيجيب لينا سيرتكم ولو ما بالصدفة ما كان عرفنا أنو هو عندو أخوان ونحنا عندنا أعمام، أبوي مات وهو زعلان وشايل في قلبو منكم وكان طوالي بقول لينا أنتو ما عندكم زول غيري ولا عندكم أهل أبو، أنا لي هسي ما بقدر أفرز بينكم ولا بعرف أنت عمي بدر الدين ولا عمي صالح وأشكالكم دي لو ما وراني ليها مدثر يوم وفاة أبوي ووراني صورة واحد منكم قريب وشبه أبوي الواضح في ملامحكم يمكن لو كان لاقتيكم في الشارع ما كان عرفتكم ولا جبت ليكم خبر، وبقولها ليكم أنا مااا مااااشة معاكم أي مكااان .. عمي التاني أتكلم وقال لي مشاكلنا مع أبوك خليها على جنب لانها أنتهت من يوم هو مات وماف داعي نبقيها سبب عشان نقطع صلة الرحم البينا وبينك .. ضحكت ليهو بي أستهتار وسكتا ... قال لي بنبرة حادة: على فكرة نحنا ما عندنا بنات بترد كلمتنا وبتابا تسمع كلامنا وما عندنا بنات بتقعد في بيت براها من غير راجل وولي وغصب عنك نحنا أعمامك وبعد كدا بقينا أولياء أمرك والمسؤولين منك ومفروض البنقولو ليك تنفذيهو من سكات .. أتحرقتا شدييد من كلامو وقلت ليهو بصوت عالي: أولياء أمري؟؟ ههه لالا لحدي هنا وكفاية مهزلة أتفضلو أطلعو برااا كمان جايين أخر حاجة وبعد أكتر من تلاتة وعشرين سنة عاملين فيها خايفين علي وفي أخر عمري دايرين تبقو لي أولياء أمر وأنتو أسمي ما أظنكم بتعرفوهو؟؟ قايليني برضى ليكم؟ هئه في أحلامكم .... عمي بدر الدين أو البدري زي ما بقولو ليهو ما قدر يتحمل كلامي والطريقة القولتو بيها وقام على حيلو وهو معصب وقرب علي وكان عايز يكفتني لكن عمي التاني مسكو وقال ليهو يا البدري هدي شوية .. وعمل ليهو حركة بي رأسو .. عمي البدري قال ليهو فكني ليها قليلة الادب هسي دي طريقة تتكلم بيها مع أعمامها؟؟ يعني نحنا عشان ساكتين ليها من المرة الفاتت أفتكرت الموضوع ماشي وبقت تقل في أدبها زيادة؟ هي ما بتعرفني والله أنا رأسا دا إلا اكسرو ليها وماف زول بيسألني .. قلت ليهو لي المرة المليووون أنتو ما أعمامي ما أعماااامي ولا عندي علاقة بتربطني بيكم، أنا ما عندي أهل أبوو زي ما قال أبوي ولا عايزة يكون عندي من الأساس وما ماشة معاكم مكااان فما تعملو نفسكم خايفين علي وتقولو لي ما بتقعدي براااك، أنتو عمركم دا كلو ما فكرتو تسألو مني، تشوفوني عايشة ولا ميتة جايين هسي تبقو لي أهل وتكوسو لي حجة عشان تسوقوني بيها معاكم؟ لا معلييش .. عمي البدري قبل علي وقال لي وهو برفع في أصبعو وبتكلم بنبرة تحذير: الدلع عندو حد وأظن أحمد أخوي دلعك شدديد لكن أمانة ما أعملك التربية الصح ورأسك فوق رقبتك ح تمشي معانا .. قلت ليهو أنا لو مشيت مكان وقعدتا فيهو ح يكون بيت خالتي بس لانو هي الوحيدة الفضلت لي من أهلي أنتو مجرد ناس غرباء بالنسبة لي قابلتكم مرتين في حياتي ولا أكتر ولا أقل ... عمي قال لي الغريب دا راجل خالتك ما نحنا ونحنا أهلك لو رضيتي ولا أبيتي وما بنخلي بت أخونا تمشي تقعد مع راجل غريب ووسط رجال ونحنا قااعدين، الضمنك شنو أنو راجلها راضي تجي تقعدي معاهم؟؟ .. قلت ليهو دي ما حاجة بتخصكم يلااا أطلعوو من بيتي كفااااية .. عمي صالح قال لي يا بتي صلحي أسلوبك دي ما طريقة كلام ليك معانا .. قلت ليهو بصوت عالي وأنا بنفض في يديني بقوة: ياااااخي أنا قولت ليك إني ما بتك أفهمممم أنا ما بتك يااااخ ولو سمحتو أمشو وخلوووني في حالي .. وأشرت ليهم على الباب ودموعي جااارية .. عمي البدري قال لي بغضب: تف عليك وعلي تربيتك يا قليلة الحياء تصيحي في وش عمك كدا! ما بتخجلي يا وسخة؟ .. عاينت ليهو بطرف عيني وما رديت .. عمي صالح قال ليهو خليها على قولك دي عديمة تربية غلطانين نحنا الجيناها .. عمي البدري قال ليهو اللييله عشان قلة أدبها دي ح تجي معانا وغصب عن عينها .. حمزة مسكو من يدو وقال ليهو لا يا أبوي يلا نمشي دي واحدة ما محترمة ولا مربية وما تستاهل زااااتو إنك تسوقها معانا ولا عندك شغلة فيها تحيا ولا تموت بي طريقتها .. وعاين لي بنظرات أستحقار....
