ياشمس الغروب ..لمن تسلمين
سلميني وياچ ..عالغايب حسين
ياشمس الغروب ..ياشمس الغروب
،،،،،،،،،،،،،،،،،،،،،،،،،،،،،
ياشمس وصليله اخباري الحزينه
امـك تگـلك تطـول لـو تـجينـه
اخلاف عينك گلبي مايبطل ونينه
وصعبه هالفرگه يايمه ومو بدينه
موحشه بعدك يبواليمه المدينه
يمه دولبنه الزمان ودار بينه
عذبني الغياب ..واشتاگت العين
سلميني وياچ ..عالغايب حسين
ياشمس الغروب ..ياشمس الغروب
،،،،،،،،،،،،،،،،،،،،،،،،،،،،،
ياشمس گوليله امك فاگده احباب
عيونها مشبوحه وتعاين على الباب
يادوه اليشفي گلبها بهجرك انصاب
تگول مااعتب بعد شيفيد العتاب
تريد بس ترجع عليها وتنهي الغياب
والگلب مو راسي يبني بغيبتك شاب
مااحمل افراگ ..ليگلي بعدين
سلميني وياچ ..عالغايب حسين
ياشمس الغروب ..ياشمس الغروب
،،،،،،،،،،،،،،،،،،،،،،،،،،،،،
ياشمس اتمنى يرجع باچر اليوم
امك الياهم عفتها اهواي الهموم
يمه دلالـي برحيلك حيل ملـچوم
وبسبب هالغيبه جدمي يطيح وتگوم
حـرمـه مـابياش مااحمل بـعـد لـوم
وهو شيسوي اليعيش بدنيا محروم
يشوف العذابات ..ويموت كل حين
سلميني وياچ ..عالغايب حسين
ياشمس الغروب ..ياشمس الغروب
،،،،،،،،،،،،،،،،،،،،،،،،،،،،،
اوياچ وصليله خبر من العليله
تـنتـظر يرجع عليها ليـله ليـله
ادري جيت حسين صارت مستحيله
بعيد ودروب المشوا كلش طويله
يمه انا ادعيلكم وانتوا الوسيله
فاگده ومابيدي يالغـياب حيله
بالدمعه والنوح ..اصرخ يطيبين
سلميني وياچ ..عالغايب حسين
ياشمس الغروب ..ياشمس الغروب
،،،،،،،،،،،،،،،،،،،،،،،،،،،،،
امنت روحي بغيابك بين الاحزان
مااحس بالماي يمكن انت عطشان
ياشمس وديت وياه اربعه اخوان
كلهم يروحون فدوه ولجله قربان
هو تسبيحي وصلاتي وهو وقرأن
بلزمة اچفوفه يحس گلبي ابأمان
منتظره ظليت ..بالغربه والبين
سلميني وياچ ..عالغايب حسين
ياشمس الغروب ..ياشمس الغروب
،،،،،،،،،،،،،،،،،،،،،،،،،،،،،
عاودت شمس الله يوم الثاني ليها
شلـون اخبـرها شفت جـثت وليها
على هونچ يالحنينه تهدي بيها
ميت العباس شفته وكل بنيها
وشفت بالطف زينب ولحظة سبيها
هيا تبچي وانا گمت ابچي عليها
ميتين الاعزاز ..حگچ تونين
سلميني وياچ ..عالغايب حسين
ياشمس الغروب ..ياشمس الغروب
الشاعر فاروق الغنامي
