ياعشيرتنه واهلنه وناسنه
وخدمتك يحسين تاج ابراسنه
ــــــــــــــــــــــــــــــــــــــ
امبيض اوجوه الخدم وامعلي شان
خادمك سويته قائد عالزمان
الناس تحترمه وتقدره بكل مكان
مانطيح وانته راكم ساسنه
ــــــــــــــــــــــــــــــــــــــ
اوياك تاجَرنه وتجارتنه ابربح
واليعوفك ماعليَّ يطلع صبح
والله لو ماراسك الفوگ الرمح
چا خسرنه وچا علنّه افلاسنه
ــــــــــــــــــــــــــــــــــــــ
لازم ابابك نأدي السجدتين
سجده لله وسجده بأسمك ياحسين
مالتك يحسين سجدة عاشگين
ومالت الله اتطيب بيهه انفاسنه
ــــــــــــــــــــــــــــــــــــــ
نسجد ابابك كأملاك السمه
سجدت الآدم وربك علمه
علّمه الاسماء يابن فاطمه
واسمك الخامس يشع باحساسنه
ــــــــــــــــــــــــــــــــــــــ
اسمك العالي واسم غيرك نصي
ولـمن انعد نعمتك ما تنحصي
ياعشگنه الـما برد يبن الوصي
مانعوفك لا وحگ عباسنه
ــــــــــــــــــــــــــــــــــــــ
ياهو كال انعوفك وانته الطبيب
واحنه چم احسين عدنه وچم حبيب
ياغريب وبس علينه مو غريب
يالتظل ناموسنه ونوماسنه
ــــــــــــــــــــــــــــــــــــــ
تربتك هيه الدوه واكبر شفاء
وللخدم مستشفه صارت كربلاء
يمك الكشفيه بس دمعه ودعاء
وانته ترفع كل بلاء لو جاسنه
ــــــــــــــــــــــــــــــــــــــ
احنه اصلاً چنه في دنيه الوهم
كلشي مانعرف ولا جرة قلم
ياحسين واوجدتنه امن العدم
وخلصتنه من جهل وسواسنه
ــــــــــــــــــــــــــــــــــــــ
واجب انصليلك ابكل ركعه دم
ومن قميصك بالحشر نرفع علم
وبجهنم تنشمر نار الخيم
وفاطمه اهناك وعلي حراسنه
ــــــــــــــــــــــــــــــــــــــ
نعبر اوياك الصراط ابلا أذه
الخادم ابراية اخوك اتعوذه
يالمصابك أخذ منه مأخذه
ريت ماداسك الحافر داسنه
