غريبــــات رجعنه ومحد ويانه
وحيــــدات بعد ياهو يتلكـــــانه
يا عباس يحسيـــــن
شنهي الموت ميتين
غريبــــات غريبــــات
،،،،،،،،،،،،،،،،،،،،،،،،،،،،،،،،،
رجعنه بيا وضع يخوان حيل اتغيرينـــــــه
من گد التعب والنوح علهزل غفيــــــــــنه
صعبه الكلمه من تنگال بس عالو عليـــنه
ها يخواني من السوط أذونه وخويـــــــــنه
مسافات::: طويله وراسك الرايه
يعباس ::: اريد احچيلك حچـــايه
شتمو امي والديـــن
شنهي الموت ميتين
غريبات غريبات
،،،،،،،،،،،،،،،،،،،،،،،،،،،،،،،
اجينه وبالچفوف احبال وين اهل الحميه
انه ام الخدر يحسين هيچ يصير بيـــــــه
اني بذمة العباس جيت الغاضريـــــــــــه
الف وسفه اردن ليك مجتوفـــــــات اديه
بعد ويـــــن :: اذا تسألني شحچيــــلك ؟
على النـوگ :: اجاوب خويه وابچيلك
يا ضيم البعيديـــــــن
شنهي الموت ميتين
غريبات ،، غريبات
،،،،،،،،،،،،،،،،،،،،،،،،،،،،،،،،،،
وصلنه لكربله وناديت ها يلفارگــــــــــــونه
سكنه تصيح عمه ارجوچ خلي نگعد ابـونه
عندي حچايه وي عباس خي فتح عيــــونه
عمي چفوفك اعلى الگاع غيرك شربــــونه
بالسيـــاط ::: ضربني واني عطشانه
الف اااااه ::: صحت عباس هاي انه
يعمي الماي چا وين
شنهي الموت ميتين
غريبات ،، غريبات
خلوني اعله گبر حسين واتلمس تــــرابه
باب الله شعجب مدفون ما يفتحلي بـــابه
اجيت وما اجت وياي ماتت بالخــــــرابه
ذيچ الحظنتك وتصيح لا تتركني بـــــــابا
عزيزه ::: ادري وداعت عيونك
رساله ::: رقيـــــه تگلك شلونك
شوگ اموات عدلين
شنهي الموت ميتين
غريبات ،، غريبات
،،،،،،،،،،،،،،،،،،،،،،،،،،،،،،
اروح اعله النهر والماي يخنگني من اشوفه
مو حسرة عطش والله بس فرگة جفــــــــوفه
هم عندك گلب يــــــــا ماي گمت اسال جروفه
لو عندك مثل عبــــــــــــاس تتحمل تعوفه ؟؟
تركته ::: بعدهه الصـــوره البالي
حسافه ::: اشوفه مگطع گبــــــالي
حگچ من تونيـــــــن
شنهي الموت ميتين
غريبات ::: غريبات
،،،،،،،،،،،،،،،،،،،،،،،،،،،،،،،
ها يعيوني يا عبـــاس تدري عيـــــــــوني ظلمه
سوط ودمعه لطم خـــدود واعرف والله زحمــه
اجيت وحيــــــــــلي طاح وياك بس ياهو أليلمه
من گبرك طلــع دخــــــــان مـــــن دنگت اشمه
على الراح ::: يخويه الندم مــــــا ينفع
وانه وياك ::: التقينه ارواح بالمصرع
اخيرآ احنــه ماشين
شنهي الموت ميتين
غريبات غريبات
لخادم الحسين / رعـــد الفريــــجي
