"السيدة زينب في مخيلتي كأنها مرت على سامراء لاحياء ذكرى شهادة الامام العسكري علية السلام هي والسبايا بعد زيارة الاربعين
،،،،،،،،،،،،،،،،،،،،،،،،،،،،،،،،،
اجيتك حيل تعبانه
وبنات حسين ذبلانه
خلصنه اربعينه وگال ردي
مري اعله الغريب الصاح چبدي
يبو المهدي تلگانه
اجيتك حيل تعبانه
،،،،،،،،،،،،،،،،،،،،،،،،،،،،،،،،،،
يعمه ما گدرنه نروح ونطب المدينه
ها يلعسكري تمنيت تحضرنه وتجينه
زلمنه امگطعه وشمات تتفرج علينه
حرمكم گمت اصيح بصوت هيچ يصير بينه
رجعنه بلا أمتون ولا سلامه
بوجهنه السوط تارك چم علامه
الهظم يا عمه اذانه
اجيتك حيل تعبانه
،،،،،،،،،،،،،،،،،،،،،،،،،،،،،،،
اريد ادخل ضريحك كون واحچيلك هضمنه
بختنا اللم جميع الناس بالطف ياهو لمنه
لا عباسنه ولا حسين ماتت كل زلمنه
تالي اعله الارض محروگ يا منظر علمنه
الرماح ادوسهم ويه الحوافر
اريدن چثه ظلت ما تسافر
جثثهم چانت هنانه
اجيتك حيل تعبانه
،،،،،،،،،،،،،،،،،،،،،،،،،،،،،،
وصلنه بزحمة الزوار يم گبرك گعدنه
حيل اعذرنه ماكو دموع نبچي هواي ردنه
هاي عيون ذبلانات شوف آثار خدنه
حدنه ويا النظر لحظات راح نموت حدنه
تدري الغاضريه اتطيح المتون
لا خلت چتف لا خلت عيون
ضيم حسين بچانه
اجيتك حيل تعبانه
،،،،،،،،،،،،،،،،،،،،،،،
لا صوت من اريد انعاك خلص عمه حيلي
لو شايف مصاب حسين شمسوي بدليلي
شسولفلك مشه العباس حسبالي ويجيلي
تالي موزع اعله الگاع يا شدة كفيلي
چفه اعلى النهر تارك رساله
أليك المشتكى رب الجلاله
اليمك هسه مو انه
اجيتك حيل تعبانه
،،،،،،،،،،،،،،،،،،،،،،،،،،،،،،،،
ادري لكربله اشتاگيت هاي التربه منهه
خلهه اعلى الچبد ويطيب دم حسين چنهه
شمهه وخلي سامراء يتجدد حزنهه
علردت بدون اخوان يا وحشة ضعنهه
يا شيعه تلگو ام المصايب
ردت لا كفيل ولا حبايب
الوكت للضيم ودانه
اجيتك حيل تعبانه
،،،،،،،،،،،،،،،،،،،،،،،،،،،،
ادري الشيعه ميقصرون وي اهل الحميه
اليوم هنانه عاشوراء وارض الغاضريه
صح ماكو سبيه هنا بس انه السبيه
آه يا كربله وللموت ضيمچ باقي بيه
اموت وما اخلص من عذابچ
دفنت اچم عزيز انه بترابچ
روحي اليوم خلصانه
اجيتك حيل تعبانه
كلمات الخادم / #رعد #الفريجي
