استشهاد الامام علي ابن محمد الهادي ع
ياسيدي يالحجه
مابقت عندك مهجه
من المدينه الكربله السامره
......................
ماكو كلب مثلك صبر عالصار باهله وناسه
الحمد لله والشكر صدرك يجر انفاسه
اني ادري بعيون البشر ماتحتمل حساسه
وعيونك انته امن الدمع ذبلانه مثل الياسه
فاطمه اول جرحك
البسمار صاير رمحك
وسط الكلب وتنادي آ يزهره
من المدينه الكربله السامره
.......................
عشت العذاب وحسرتك بالروح عاشت ونه
ساكن الطف وتنظرّه تسمحلي اسولف عنه
تشوف الخيول الي اعتنت لحسينك ورضنه
وحته الي شايل محبسه خنصره وكطعو منه
ثاني جرح لحسينك
ماخله دمع بعينك
ابلا راس ومغطي تراب الغبره
من المدينه الكربله السامره
.....................
باب الفرح ماتنفتح بالحزن سدّو بابك
ولجل التحبهم سيدي مافاركاك مصابك
جان الدمع ماي وصبح دم على غياب احبابك
وبكل عزه من ينصب دمعك يصير اخظابك
وعالراس تشبج ايدك
والعزه نوح ايزيدك
ودموعك امن العين تطلع حمره
من المدينه الكربله السامره
.....................
حاربك مولاي الوكت واليل يلجم صدرك
ايضيك النفس لو ضلمت جن سوط يضرب ظهرك
تشوف الخيم من تلتهب من هاي زايد جمرك
تحرّكك نيران الخيم ونتّك تطول الخدرك
وعمتك تصيح افزعلي
عباس خويه الحكلي
ضلت وحيده ونادته هالحره
من المدينه الكربله السامره
......................
واليله ابد مامستقر تسمع اصوات اتنادي
السامره روح بدمعتك يالمهدي مات الهادي
والسفر ادري تعبك من وادي تمشي الوادي
مسموم جدك بالغدر سم الغدر مو عادي
والباري عظم اجرك
سيدي الباكي بعمرك
من هل بشر ماشفت غير الحسره
من المدينه الكربله السامره
......................
من الهادي تتعنه بحزن السبع الدجيل النيه
بالنحر عصرت منذبح بمتنك هظم علويه
يم سيد محمد ردت تدعيلي عندي امنيه
خادم عله الفطره اظل لحسين والمسبيه
وياريت اكضي اسنيني
والدمع تارس عيني
لمصاب زينب والحسين ونحره
من المدينه الكربله السامره
....................
ندعيلك الرب بالفرج ويخفف من الامك
خدامك احنه سيدي ونصير كلنه حزامك
شتاكينه والله الشوفتك وبيمنتك صمصامك
منك حجايه ننتظر با لموزمه كدامك
خافن نغمض باچر
وانته تظل مسافر
وماننظر الوجهك يمحله النظره
من المدينه الكربله السامره
#محمد هادي العقابي
🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼
قصيدة بمناسبة استشهاد الامام الهادي ع
بين العيون. چم غالي مدفون
من المدامع. مشيبات الجفون
.......
ما اسولف والتسولف دمعة العين
بدنيتي شيبن كلبي ذني الاثنين
الماي من اتحسسه ياخذني لاوين
وتربة مصلايتي تبچيني لحسين
بدمعات المصاب. بللت الثياب
والهادي ميت. من دفعة الباب
........
شما اشوفن انه علويه بخواتي
اذكر انه زينب وتوكع عباتي
ولو شفت كدامي يتمشن بناتي
يارقيه اصرخ واموت بذكرياتي
طفلي من انظره. مادامي نحره
وبمهده دافي. وماي اعله كتره
........
ويه اخواني اذا نلتم سويه
اذكر الظل ظهره خالي بلا خويه
وصاح ياعباس ما تلحك عليه
وصوت من المشرعه طاحن اديه
بعيونه حسره. وبظهره كسره
ولخيامه خالي. رد يبچي مهره
.......
انه كل قصة عذابي من محرم
منين ما اقراهه عيني تنترس دم
تهون كلهه والصعب حرك المخيم
والشمر كدام زينب من تحزم
ظل ساكت الجود. والتحچي الكيود
وتصرخ چفيلي. شيردك ردود
.........
الموت ارحم من سوالف تهدم الحيل
بلا ولي عماتي ظلت من اجه الليل
لجدي الحسين الدمه من مدمعي يسيل
عدل بعده وبي نفس من داسته الخيل
من يا الم مات. كلهن جراحات
والاصعب اعليه. كدامه شمات
.......
كلفت نسمة هوه تحمل كلامي
الهادي طاح بضيج بلغي حسين امامي
من الغريب وللغريب ابعث سلامي
بجبدتي سم وذْكرت جبدك الضامي
ياكلبي ومنين. بيا حال الحسين
البضلعه حافر. يتنفس منين
.......
نسألكم الدعاء
حسين صادق العقابي
