انقذني من انتقامي

بارت 1

انقذني -من - انتقامي
#بقلم اوتار حزينه
#الجزء الاول
'''''''''''''''''''''''''''''''''''''''''''''''
من خلق الاعراق وصنفهم،،،
من قال ان هناك ابيض،،،واسود،،
اصفر ،،، واحمر،،،
من خلق،،،، واوجد الغني والفقير
القوي والضعيف،،،،،
ذا جاه ونسب معروف،،،ونسب
غير معروف،،،،،
الجواب،،،هو
الجاهل،، من خلقهم،،،،
هو من صنف البشريه هكذا،،،
والكثيرين بل الاغلبيه اتبعوا
هذا الجاهل،،،
وصنفوا البشريه على هذا الاساس
ليس هناك،،،اعراق ولا بشر
ارفع من بشر
انما هناك الجنس البشري
الذي خلقه الله سبحانه وتعالى
وجعل التقوى هي من تفرقهم
جعل الايمان والتواضع واخلاقهم الحميده ،،،هو من
يرفع ناس،،،،درجات وينزلهم
درجات ،،،،،وارسل رسله
تبشر بهذا الشي
وكان رسولنا العظيم منهم عندما
قال،،،،صـلى اللهُ عليهِ و سلـم "
( لا فرق بين عربي و لا أعجمي و لا أبيض ولا أسود إلا بالتقوى )
صدق رسول الله
دعوا ،،،،،،عنكم التفرقه والعنصريه
وعودوا اولادكم ان يقيسوا الغير
بالاخلاق دون غيرها وليصحى
ضميركم النائم
نقاء فطره الانسان التي خلقنا بها
فكم من رخيص بنظر جاهل ، كان عند الله أحب الناس إليه!
،،،،،،،،،،
بغداد،،،،،،، سنه1977
وتحديدا الكاظميه،،،،بحي من
احيائها الفقيره،،،،،،حيث
البيوت القديمه
والازقه الضيقه والناس الطيبه والبسيطه ،،،بدت حكايتنا
« يمه كوثر وينج،،،
« هياني يمه اجيتج،،،،
« تعالي يمه اترسي،،،،،،،الشيشه
مال الطباخ ،،،،،،،نفط خلي اركب
الغده
رحت لامي،،،واخذت الشيشه
مال الطباخ ،،،ورحت ترستها ورجعتها
الها،،،
« هاج يمه
« عفيه بيج ،،،كوكه
امي خلت الشيشه بمكانها
وشغلت الطباخ وكعدت على التخته وبدت تركب بالغده
«خواتج غسلن يمه
« اي يمه غسلن وغسلت هدومهن وشريتهن بالسطح،،،
« وهدوم اخوتج،،،،
« غسلتهن،،،،،وياهن ،،،
« وينهن. اشو مالهن،،،حس
« طلعن يم صديقاتهن ديلعبن،،
وياهن تكي
« ايي خليهن،،،،،احسن مايظلن
يفترن يمنا ،،،،،،،
امي،،،،، حجت هيج وانطتني
مصفي بي بتيته وكملت
« تعالي يمه گشري البتيته
خلي اسويلكم اليوم تبسي،،،
اخوتج اشتهوه،،،،
كعدت يم امي وبديت اگشر،،،،وهي
خلت البيتجان،،،،بالطاوه،،،،وكامت
تگلي،،،،
اني كوثر بنت تعبان ،،،،
ابوي كاسب يشتغل بالعلوه هو
واخويه الجبير راضي،،،،اخويه الخ
اسمه مرتضى،،،يشتغل،،،عامل،،
بورشه مال سيارات،،،،،وعلي حمال
يم وكيل مال طحين،،،،،
احنا 3ولد،،،و3بنات
الجبير راضي ووراه مرتضى وعلي،،،،
وبعدين اني
كوثر ووراي رقيه
وزهره،،،
عائلتنا عائله بسيطه،،،،،وحالتنا
الماديه متوسطه،،،،،،جنا كاعدين
بيت ايجار قريب،،،،،،،،،على الامام،،
احنا اصلنا من الجنوب،،،،،،،
جدي اجه من زمان،،،،وسكن
ببغداد،،،،،
جان المفروض،،،،حياتنا
تظل هيج
مثل بساطه عيشتنا بس ،،راضي
اخويه الجبير،،،جان
وكح وشراني،،،،،،،وابو مشاكل
وجان متعب ابويه كلش،،،،،
ومأساتي،،،،صارت من وراه
وبيوم اسود، ،،،،خلتني اعرف
عرف
عشائري
اسمه الفصليه،،،،،،،،
« ريحه البيتجان تخبل،،،،
« جيبي خبزه خلي الف الج
لفه،،،،
رحت لجدر الخبز وفتحته
وطلعت خبزه ورجعت لامي
« هاج يمه
« ديربالج يمه دشاشتج طخت
باللهبه
مال الطباخ،،،
« ههههه تخافين عليه يمه
« يااا وشلون مااخاف عليج،،،
انتي نظر عيوني انتي وخواتج
واخوتج
« تسلم عيونج يمه،،،،
حجيت هيج،،،واخذت اللفه من
ايدها،،،،وبديت اكل بيها ابتسمت
وحجيت وي امي
« الله يمه البصل وي البيتجان
يخبل،،،،
« اي ينطي طعم،،طيب
حجيت هيج واختي رقيه طبت
هي وزهره،،،
« ههههه ريحه البيتجان الواصله
للدربونه جابتنا بسرعه
« ههه تعالن اكعدن يم كوكه
هسه اسويلجن لفه
خواتي الاصغر مني كعدن يمي
واخذن اللفه من ايد امي،،،،،
من لفتها الهن
« يمه اريد ساهون،،،،
« اي رقيه العصر اسويلكم،،،،
« اي واني من يجي ابويه اخذ
منه فلوس وادز لفات حب
للتعلوله مال الليل،،،
« كوثر من تصعدين،،،للسطح
صيحيني حتى ارشه وياج،،،،
« ايي،،زهوره،،،بس لاتصعدين على
الحايط مال بيت عمو شكري
« لاا كوكه،،،اني كبرت وبعد
ماأسوي هيج
باوعت لاختي الصغيره،،وضحكت
ورقيه حجت
« والله اني البارحه مانمت من
وره البگ
« اي واني هم،،،،
جاوبت اختي،،،وكمت
« وين رايحه كوثر،،،،
« اكنس باب البيت وارشه،،،
« بسرعه يمه لايجي اخوج
راضي
« اي يمه
اخذت المكناسه،،،وطلعت
نظفت من الباب ورشيته، ،،
ورجعت
« يمه محتاجه شي راح اطب
اسبح،،،
« روحي يمه ماعندي،،،،شي
اني هسه
هم من اكمل اطب وراج
عفت امي وخواتي كاعدات،،،
ويسولفن،،،ورحت اخذت هدومي
من الكنتور،،،،ورحت للحمام،،،،
بيتنا شرقي مو غربي
الحمام والمرافق
جان قريبات على المجاز
الي يودي على باب الحوش،،،،
طبيت اسبح،،،، واني بالحمام
سمعت صوت ابويه يحجي،،،ويصيح
كملت على السريع وطلعت
وشفته بالطرمه هو
وراضي
« ولك انته ليش ماتجوز من المشاكل
هااا تريد،،،،،،،،،تبليني وي الناس
واني ضعيف حال ولك اذا
اخذوك اني وين اروح
المن انطي وجهي
« يابه هو تجاوز وعيرني،،،بأصلي
ماسمعته شكال
« سمعته بأذني،،،وهوايه سمعتها
وجنت ابلعها لان مايفيد الحجي
ناس تعلمت تباوع علينا هيج
شنسويلها،،،نذبحها
« ايي وعلي ،،،،، اذا بعد احد
حجه وياي هيج الا اذبحه
« عزه العزاني ولك المن تذبح،،،
تخبلت انته تريد يعدموك،،،
«چا اسكت واخليهم يهينون بي
شنوو اني مو زلمه كدامهم
« زلمه يمه بس شنسويلهم
هاي اطباع
بشر ربك،،،،ومانكدر نغيره،،
« باوع عليه ولك بالعباس ابو فاضل، ،
اذا تعاركت بعد وي واحد
اني بايدي هاي اسلمك للشرطه
واخلص منك،،،ومن طلايبك
« تعوذ من الشيطان تعبان
وتعال اكعد
« ولج،،،فطم ابنج. صاير شقاوه ومستهتر،،،وكام
يجر السجين على الاوادم،،،،
« ياساتر يارب،،،،يمه الله يخليك
تره ،،،،،،مالنا حيل للمشاكل
شوف حالنا،،،،،،،،،،فقره ولكمتنا
كوه مدبريها
راضي،،،،ماحجه شي
وطلع كعد بره،،،،
« فطم احجي وي ابنج،،،،،تره
تعبت منه ومن طلايبه،،،،
امي هزت راسها باي
وابويه
راح للحوض،،،،، كعد وفتح البوري
وغسل وجهه وهو يستغفر الله
صفنت علي،،،،شلون كمل
ومشه وهو حاني ظهره،،،
ابويه ضعيف،،،
وجان يلبس دشاشه،،،
ويتحزم بحزام عريض،،،،،
ويلف على راسه يشماغ،،،،،
اسود وابيض،،،،طيب الگلب
والي يحجي
عليه ويأذي يسلمه بأيد الله
عكس اخويه، ،،الجبير الي جان
مايتحمل حجايه،،،،تمسه او تمس
اصلنا،،،،،،،وجان على طول يتعارگ
« يابه كوثر ماجيبلي التتن
من الغرفه
« اي يابه هسه
جاوبت ابويه ورحت جبت، ،
التتن اله،،،وهو اخذه وكام يلف
جگاره حتى يدخن،،،،
عفته هو وامي بحجون بالحوش،،
وطبيت لغرفتنا اني وخواتي، ،،
حتى امشط شعري
كملت بسرعه،،،،لان سمعت اخوتي
مرتضى وعلي اجوي،،،،
ولازم نصب الغده،،،بس
يسبحون
«الله يساعدك مرتضى
« هلا كوثر،،،هاج هذا الكيس
«شنو هذا
« تمر ولبن،،،خلي بالغده
« اي هسه،،،،
اخذت الكيس ورحت،،للمطبخ
الجوه الدرج ،،،،
حظرنا الغده،،،،وكعدنا كلنا،،،
نتغده،،،،
« كوثر امشي صيحي راضي
توني اريد اكوم وابويه حجه
« عوفي بنتي واكعدي كملي غداج،،،
باوعت لامي،،،الي هزت راسها
باكعدي،،،،،،
« صاير شي يابه، ،،
مرتضى سأل،،،،وابويه حجاله
الصار
« استغفر الله يارب شوكت
نخلص من هاي السالفه
عار خوما عار اصلنا،،،،،
« لا يابه مو عار،،،بس هذا
چم واحد
عم علينا ،،،،،وخله سمعتنا
بحلوك الناس
« اي والناس ماتصدگ تجلب
بسالفه وصرنا علچ بحلوگ اليسوه والمايسوه ،،،،،،
علي جاوب ابوه،،،،وهو ضايج،،،
وامه حجت
« سدوا هاي السالفه،،،،وكملوا
غداكم،،،حتى تشربون جاي
« ايي والله يايمه اريد جاي وبسرعه
لان اريد ارجع للورشه،،
« يااا ،،،،، بهل الظهريه تطلع
« اي يمه،،،،،الشغل هوايه
ومدنلحك علي،،،وعمو ناظم
كلي ارجع،،،،حتى انكمله،،،،
قبل الليل
« اي يابه روح،،،،وديربالك
على شغلتك
تره صنعه زينه وتفيدك
بالمستقبل
« اي،،،،،يابه،،،هاا صدك علي
عمو ناظم كال اذا واحد من اخوتك
اله واهس للشغل خلي يجي
لان حسن بطل،،،
« اي اني اجي،،،لان تعبت من
الحماله وظهري انكسر،،،
« چا خوش،،،اني راح اكله وتره
يجوز باجر تطلع،،،،وياي
« علي خاف يزعل حجي قاسم
« خلي يزعل يابه،، شسويله،،
اني بعد مااكدر،،،اشتغل هاي الشغله
وهو هم بخيل وماينطي
حگ الحمال وتعبه
علي كمل كلامه،،،وابويه سكت
ومرتضى حجه
« هاهي ابو حسين،،،باجر اطلع وياي
هم تتعلم صنعه وياي وهم حتى
نروح ونرجع
سوه
« براحتكم يابه،،،
ابوهم حجه وكام،،،وكمل
« جايج ام راضي راسي
يوجعني ،،،،،،
« اي هسه،،،يله بنات لمن الاكل
واغسلن المواعين،،،
امي حجت هيج وكامت وره
ابويه،،واني لميت الفضلات كلها
بماعون حتى
انطيهن لحمامات،،،راضي
كعدت يم الحوض وبديت اجلف
بالاماعين واني ادندن اغنيه،،
طالعه من بيت ابوها،،،مااعرف
هاي الاغنيه ليش لزكت
بلساني وراسي
انساها فتره وترجع هي ولحنها
براسي،،،،،
« رقيه،،،صعدي التمن والخبز
لحمامات راضي،،،وبدلي ميهن
خطيه
هسه صار حار،،،
« اي كوكه هسه،،،
اختي شالت، ،،الاكل،،،
وراحت للدرج،،،،،،
« زهوره،،،،،امشي تمددي شويه
لاتظلين تفترين،،،
« حاره جوه،،،مااريد انام،،،
« تعالن يمه ،،،نامن،،،بالهول
على البنكه،،،،،
خواتي راحن،،،واني،،
كملت شغلي،،،،ورحت
تمددت بغرفتنا
طلعت مجله جنت اخذتها من مهى
بنت جيرانه،،
اني اعرف اقره وصلت للسادس
ابتدائي،،،وبطلت لان امي ماتكدر
على الشغل وحدها وراضي هم
ماقبل ادوام ،،،،،
ظليت اقره واباوع للصوره،،،
وتالي غفيت،،بمكاني
،،،
العصر كعدت على ريحه الجاي
المهيل،،،،،،وصوت الاستكان
من يطخ بالماعون،،،،وعرفت ابويه
ديشرب جاي،،،العصريه
كمت ورحت للحوض غسلت،،
وجهي،،،
« كوثر يمه،،،تعالي اشربي
جاي ،،،،،واكلي خفيفي،،،،
كملت غسل وجهي وايدي
ورحت،،،،،،،،كعدت يم خواتي،،
واخذت استكان الجاي من امي
والخفيفي
اشتميته وحجيت بضحك
« والله الخفيفي بالتنور الطين
طالعه ريحته تخبل،،،،
« اي يمه،،، الله ينطيها العافيه
لسهامه لوما تنورها،،،جان ماشبعنا
خبز،،،
« اني لوما بيتي ايجار جان جبت
واحد. من زمان وخليته بالسطح،،،
« لا مايحتاج ابو راضي،،،سهامه
خطيه هي تجي وادكول
تعالي اخبزي يمي،،،
« خلفه عليها ادميه بنت اوادم،،،
« اي والله،،،،،،
امي جاوبته واني ظليت اكل خفيفي
واشرب جاي
« يله فطم اني رايح اكعد شويه
بالكهوه محتاجه شي،،،
« لاا ابو راضي عساك طيب،،
مامحتاجه شي،،،
« يابه اني اريد فلوس حتى اشتري
حب
« هاج يابه،،،
اخدت الفلوس من ابويه،،
وهو طلع،،،
قبل المغرب صعدت اني وزهوره
ورقيه،،،حتى نرش السطح،،،
جنت. اتعمد
اذب المي على الحايط،،،
حتى تطلع الريحه الاحبها،،،
ريحه تخليك تشعر براحه،،،،،وانته
مغمض عيونك ريحه شكد ماتشتمها
ماتمل منها،،،،،
كملنا رش وفرشنا الفراش حتى يبرد ونزلت اني وياهن،،،
اني رحت «للحب» حتى اشرب مي
وخواتي طلعن بالباب،،،كملت
ورحت صحت زهوره
« زهوره هاج الفلوس وجيبي حب
عاشق الشمس
من بلال
« اي جيبي ريحته فاحت،،،وترست
الدربونه،،،،
اختي اخذت الفلوس وراحت
ورجعت وره دقائق،،،جايبه اربع
لفات حب
تعشينا وره مرجع ابويه واخوتي من الشغل،،،،،،،وتعللنا بالساهون والحب
وراها صعدت دولكه،،،مي
لليفوك وامي وابويه اجوي ورانا ،،،،ووتمددت اني
وخواتي وظلينا،،،،، نباوع للسما
وزهره سالتني
« اليوم ماكو،،الگمر
« بالعته الحوته،،،،
جاوبتها رقيه،،،وكامت تغني
« ياحـوتـَه يامـَنـْحـوتـَه هـدّي
گـُمـَرْنـَه العالي
وانْ چـانْ مـَتـْهديـنـَه إنـْدُگـْـلچْ
ابْصينـيـَه
سمعتها وكمت اردد وياها وزهره
ويانا،،،،،
« ولجن نامن ابوجن غفى
باوعت لامي،،،،النايمه هي وابويه
بجهه مو بعيده علينا،،،،
وهي اشرت على راضي
« ياله نامن،،،،،لايصيح،،بيجن
راضي،،،،
خواتي خنسن لان يخافن من
راضي
ووره دقائق نامن
اني ظليت اباوع للنجوم ،،
واعد بيهن وسكتت،، من تذكرت
امي كالت لاتعدن النجم يطلع فالول
بأيدجن،،،،
بس تخيلت منظره بايدي
صحت
« يمه،،،،
حجيت هيج وغطيت وجهي
بالجرجف ،،،،،،
طفوله بريئه،،
وقلوبنا جانت فطيره،،،،ماتعرف
الحقد
ولا الكره،،،جنا اذا نسمع
بالجار مريض بدون مانحجي
نسويله صينيه من،،، هذا
القاسم الله ،،،،،،ونودي الهم
وجنا العصريه،،،،،،،نكعد ونشرب
جاي العباس،، من تنذره وحده،،،
من الجوارين
ونسولف،،،،على العيشه وزلمنا
شلون تتعب
حتى تحصل رزقها،،،،،،،
ايام حلوه،،،مغلفه بنكهه الطيبه
والموده والرحمه،،،بين
الاهل والجيران
جان وكتنا هوو
زمن الطيبين،،،،،
،،،،،،
الصبح كعدت ولميت الفراش،،،
وخليته بمكان مسگف حتى
لاتضربه
الشمس،،،ونزلت
امي تريگ ابويه هو وراضي، ،،
من الفجر حتى يطلعون للعلوه،،،
ومرتضى وعلي،،،بالسبعه طلعوا،،،
غسلت وجهي،،،،ورحت
غسلت المواعين،،،
« كوثر عوفيهن وتعالي تريگي
وي خواتج،،،
« هسه يمه بس اكملهن اجي
« ولج عوفيهن مو طايرات تعالي
فگي ريگج بلكمه
نفضت ايدي من المي،،،ورحت
كعدت،،،يم الصينيه،،،
مديت ايدي ولفيت لفه جبن مالح
وكمت اكل،،،
« والله اليوم دخت بالغده،،،
شنسوي يبنات،،،،
امي سالتنا ورقيه جاوبتها
« باميه يمه ،،،،
« اي والله مادام عدنا لبن،،،حامض
خلي نسوي باميه،،،
« هاهي ست كوكه ادللي
راح اركب باميه،،،
« عود ليش. بس هي تدلل مو اني
هم حجيت قبلها
ضحكت من سمعت كلام زهوره،،،
وامي جاوبتها وهي تضحك هم
« يابه لاتزعلين انتي هم ادللي ورقيه
وياج حتى لاتزعل
« لا اني جبيره ماأزعل،،،،
« يمه فدوه للجبيره،،،،،الي تفتهم
امي حجت هيج،،،وطلعت من جيبها
فلوس وانطتها لرقيه،،
« هاج اشتري انتي واختج،،،
من بلال ،،،،بس قبل لاتروحين
اغسلي المواعين لان
كوثر راح تنظف البيت
« ادللي يمه،،،
« عفيه ببنتي،،،الورده
« واني هم،،،
« وانتي هم زهوره،،،
امي حجت هيج وباوعت عليه
وضحكت
خواتي طلعن،،،،وره نص ساعه،،
وامي كعدت تگرم الباميه،،،
وتمرد بالطمامه،،،،
« كوثر جيبلي من،،،، من
السرداب معجون
بيتنا بي سرداب،،،وجنا المربى
والمعجون من تسوي امي،،،،
تخلي،،،،بجرات مال فخار،،،حتى
ماتفسد،،،،جو السرداب البارد
جان يحفظ الشي من التلف
عاده توارثنها من زمان،،،وامي ظلت محافظه عليها لان ماعدنا ثلاجه
او مجمده
نزلت جوه،،،واخذت معجون
من الجره
وسديتها زين،،،،،،،ورجعت
لامي،،،،
كملنا الغده،،،،وكعدت وي امي نندف
القطن مال المخاديد،،،مالتنا
« هاج مالتج،،،ولبسي الها وجهه
احنا دنشتغل اندك الباب وطبت سهامه وهي جايبه صفطه خبز،،،
« شلونجن ياحبايب ،،،،
امي كامت عليها،،،،واخذت الخبز منها
وبوستها، واني وياها
« هاي شنوو سهامه ليش
مكلفه نفسج،،،وخابزه النا
سهامه كعدت على الجودليه،،،
وذبت عبايتها،،،،وحجت وي امي
«شنوو هذا الحجي،،،فطم
احنا اهل،،،انتي البارحه مو دزيتي
ماعون تبسي النا،،،وساهون بليل
بعد شكوو
« بالعافيه، ،،عليكم بس لو دازه عليه
اني اخبز وياج جان احسن
وبعدين اني ماانطيتج طحين،،،
« اخذت من عدنا معجانه عندج
رديها ماعندج بالعافيه عليكم،،،
« الله يعافيج،،،بعد عيوني ويخليلج
قحطان وابوو ويوما،،،تفرحين بي
واوكفلج،،،،بعرسه
« ساعه المباركه،،،ويكول اريد
اتزوج،،،،،،،والله كلشي جاهز
والعروس هم موجوده،،،،،،،
سهامه حجت وباوعت عليه
وضحكت
وامي اشرت الي وحجت
« يمه كوثر،،،كومي سوي شربت
لخالتج سهامه،،،
« اي يمه هسه،،،
ام راضي،،،،باوعت لبنتها من كامت
وبس طبت للمطبخ،،،سهامه
حجت
« ام راضي اني مااريد اخذ
غريبه لابني،،،،اريد بنتج كوثر،،
اله
«والله ياسهامه هي الج ماتروح
لغيرج
بس خليها تكبر بعد،،،
« هي شكد صار عمرها هسه
« توها طبت ب16
« بعد شكوو يا ام راضي،،،
احنا بعمرها تزوجنا،،،وخلفنا
ولدنا
« وكتنا غير وكتها ام قحطان،،،
واني اريدها بعد تكبر يله ازوجها
وابوها هم،،،من حجيت ويا
ماقبل وكال شنوو واكع
حملها بالداودي،،،بنتي صغيره
ومنا لبعد سنه سنتين يله
ازوجها
« هاهي،،،فطم الي تريدي يصير
بس امانه الله ورسوله لاتنطوها
لغيرنا،،،
« لاا خيه هي الكم وروح ابويه
ماتصير غير لقحطان،،،،
سهامه من سمعت كلام ام راضي
بوستها وهي فرحانه
لو،،،،،، ابويه منطيني لقحطان
ومو مأجل
زواجي منه،،،جان مارحت فصليه
بذنب اخويه سواه،،ولا شفت العذاب،،،والمهانه والضرب
الي تركت ندوب بجسمي،،،
وروحي،،،،،
ذنب اخويه دفعت ثمنه
من عمري،،،،الي
ماافتهمت منه شي،،،،وحسيت
السنين ركضت بي ركض
وطحنت
عظامي وشبابي،،،،،، بحجر الرحى ،،،
القاسي،،،،،،
،،،،،،،
يِّتّبِعٌ