..
بقلمي
زينب
....
تصويت
....
كاعد امكيج لبنيه خطوبتها جانت جاي تتصفح ب البرامج وطلعت قصيده استوقفتني حيل اسمعها بتمعن لحد ماوصلت المقطع اليحبه روحه
شلون اغطي جروحي بيها
وانا صورة وهيه جامه
شلون اخلص روحي منها
وانا ليلة وهيه دفتر روزنامه
اسمع الكلمات القصيده اليحبها بنيامين جان دوم يحجيها واضحك اكله هاي الصفات كلهن مو بيه وهاي القصيده ماتمثلني جان يكول يجي يوم وتشوفيها تمثلنه واجه هل يوم الي جنت استبعده
غرغرت عيوني بالدموع بعد مابجيت البارحه بيأس من رحت الاخواني وماشفتهم ب البيت جان بابهم مقفول ومن سألت الجيران كالو بليل مايباتون هنا بس بالنهار يجون تملكني الخوف وانا افكر بفائق ياخذهم المكان قذر ماتحملت كل هل ضغط علي عفت المكياج من ايدي وانا اكل الام الصالون
_خلي وحده تكمل هاي البنيه
_وين رايحه افنان
شلت جنطتي وانا احاجيها وامسح بدموعي التنزل بلا توقف
_صار عندي ظرف ب البيت لازم اطلع
عفتهم ومشيت طلعت من الصالون احاول اتنفس احاول تروح مني هاي الخنكه احاول اتجاوز لبست جاكيتي فوك ملابسي وانا احط الجنطه على كتفي اخذت تكسي ورحت للمكان الافرغ بي طاقتي ماهمني ممكن اشوف بنيامين هناك او لا الهمني خواني الكتل تفكيري بيهم
بس بنفس الوقت ماريد اخرب الخططت اله وارجع البنيامين وانا بهذا الضعف اذا مجرد ذكرياته اذتني شوفته شلون بيها
غيرت مكاني وانا اكل الابو التكسي ينزلني على كورنيش العشار
حطيت ايدي بجيوبي نسمت هوى بارد تلامس بشرتي
نزلت ع الدرجات وكعدت على حافه الشط كل ما اباوع للاطفال اتذكر طفولتي واللحظات العشتها بهذا المكان
هسه انا ضايعه بارض جبيره ماعندي معين غير ربي ماعرف اخواني وين صفه بيهم الوكت ولا اصيل اكدر اتواصل وياها لان تنقهر اكثر مني علي جنت اريد ارجعلها بوكت انا لامه قهري ولامه نفسي ارجعلها مثل قبل اشيل همها مو هيه تشيل همي
دنكت راسي ودموعي تنزل بهدوء لحد ما الهدوء اخترقته شهكاتي وانا اكول بكلبي شوكت تتلفت الحالي ياربي تعبت اريد اتنفس هوى نظيف اريد اكعد بدون خوف وانام مرتاحه
لهسه كلبي محترك لهسه روحي تعبانه
مسحت دموعي كمت من مكاني امشي بهدوء
رجعت للبيت وبالي مو وياي اريد بس ارتاح ماريد هذا التعب يهد حيلي ويرجعني النقطه البدايه
خالة جانت تلاحظ تفكيري الزايد وشرودي من كلشي بس تسكت وهيه تتحسب بالله
رجعت جان ظهر صليت ونمت بدون ما اتغده وياهم
كعدت العصر وانا اشوف خالة تنظف ب الطرمه كعدت ع المكينه اخيط الخياط العلي بدون نفس بس شغل اريد اخلصه ووقت اريد امرره قاطعتني خالة وهيه تكول
